୧୨ଟି ଗେଟ୍ରେ ହୀରାକୁଦରୁ ନିଷ୍କାସିତ ହେଉଛି ବନ୍ୟାଜଳ
user2
ସମ୍ବଲପୁର: ତଳମୁଣ୍ଡର ବନ୍ୟା ସ୍ଥିତି ସୁଧୁରିବା ବେଳକୁ ଉପରମୁଣ୍ଡରେ ବନ୍ୟାର ଭୟ ଘାରିଲାଣି । ହୀରାକୁଦକୁ ଶୁକ୍ରବାର ପାଖାପାଖି ୫ ଲକ୍ଷ କ୍ୟୁସେକ୍ ପର୍ୟ୍ୟନ୍ତ ପାଣି ପଶିଛି । ଫଳରେ ମୋଟ୍ ୧୨ଟି ଗେଟ୍ ଖୋଲି ଜଳ ନିଷ୍କାସନ କରାଯାଉଛି । ଅପରପକ୍ଷେ, ହୀରାକୁଦ ଜଳଭଣ୍ଡାରରେ ୧୨ ଫୁଟ୍ ସ୍ଥାନ ଖାଲି ସତ୍ତେ୍ୱ ଛତିଶଗଋରେ ଗତ ଦୁଇଦିନ ଧରି ହୋଇଥିବା ପ୍ରବଳ ବର୍ଷା ଯୋଗୁଁ ସୀମା ଅଞ୍ଚଳରେ ବନ୍ୟା ସ୍ଥିତି ସୃଷ୍ଟି ହେଲାଣି । ଓଡ଼ିଶା ସୀମାବର୍ତ୍ତୀ ଛତିଶଗଡ଼ର କିଛି ଗାଁକୁ ପାଣି ପ୍ରବେଶ କରିସାରିଛି । ଆଉ ବରଗଡ଼ ଏବଂ ଝାରସୁଗୁଡ଼ା ଜିଲ୍ଲାର ୪ଟି ଗାଁକୁ ଚାରିପଟରୁ ବନ୍ୟା ପାଣି ଘେରି ସାରିଲାଣି ।ଗୁରୁବାର ସୁଦ୍ଧା ମାତ୍ର ୨ଟି ଗେଟ୍ ଖୋଲାଥିବା ବେଳେ ଶୁକ୍ରବାର ମଧ୍ୟାହ୍ନରୁ ସନ୍ଧ୍ୟା ମଧ୍ୟରେ ୨ଟି ପର୍ୟ୍ୟାୟରେ ଆହୁରି ୧୦ଟି ଗେଟ୍ ଖୋଲାଯାଇଛି । ବର୍ତ୍ତମାନ ମୋଟ୍ ୧୨ଟି ଗେଟ୍ ଦେଇ ଜଳ ନିଷ୍କାସନ ଜାରି ରହିଛି ।
ଶୁକ୍ରବାର ସନ୍ଧ୍ୟା ୬ଟା ସୁଦ୍ଧା ଜଳସ୍ତର ୬୧୭.୯୩ ଫୁଟ୍ ଥିବା ବେଳେ ଜଳଭଣ୍ଡାରକୁ ପ୍ରତି ସେକେଣ୍ଡରେ ୪ ଲକ୍ଷ ୭୮ ହଜାର ୮୧୫ କ୍ୟୁସେକ୍ ପାଣି ପ୍ରବେଶ କରୁଛି । ଇନଫ୍ଲୋର ଟ୍ରେଣ୍ଡ ବି ଖସିବା ଆରମ୍ଭ କରିଥିଲେ ହେଁ ପୁଣି କେଉଁ ସମୟରେ ଏହା ବଢ଼ିବ ତାହା ଆକଳନ କରି ହେଉନାହିଁ । ସେପଟେ, ୧୨ଟି ଗେଟ୍ ଦେଇ ୧ ଲକ୍ଷ ୮୫ ହଜାର ୭୩୫ କ୍ୟୁସେକ୍ ପାଣି ମହାନଦୀକୁ ଛଡ଼ାଯାଉଛି । ଆଉ ବିଭିନ୍ନ କେନାଲ, ପାୱାର୍ କେନାଲ ଏବଂ ଶିଳ୍ପ ଜଳଯୋଗାଣ ମିଶି ମୋଟ୍ ୨ ଲକ୍ଷ ୧୮ ହଜାର ୭୩୫ କ୍ୟୁସେକ୍ ପାଣି ନିଷ୍କାସିତ ହେଉଛି ।
ଆଉ ଏହି ପାଣି ମହାନଦୀ ତଳମୁଣ୍ଡରେ ବେଲଗାଁ ଦେଇ ୩୨ ହଜାର ୮ଶହ କ୍ୟୁସେକ୍, ପଥର୍ଲା ଦେଇ ୧ ଲକ୍ଷ ୪୨ ହଜାର ୩୪୨ କ୍ୟୁସେକ୍, ଖଇରମାଲ ଦେଇ ୨ ଲକ୍ଷ ୫୯ ହଜାର ୫ ଶହ କ୍ୟୁସେକ୍, ବାରମୂଳ ଦେଇ ୩ ଲକ୍ଷ ୮୮ ହଜାର ୭୫୦ କ୍ୟୁସେକ୍ ଏବଂ ମୁଣ୍ଡଳି ଦେଇ ୫ ଲକ୍ଷ ୭୩ ହଜାର ୪୭୫ କ୍ୟୁସେକ୍ ପାଣି ପ୍ରବାହିତ ହେଉଛି ।
