ଧାରା ୩୭୦ ଉଚ୍ଛେଦ ପରେ ଜାମ୍ମୁ-କାଶ୍ମୀର ଦୁଇଭାଗ
ଧାରା ୩୭୦ ଉଚ୍ଛେଦ ପରେ ଜାମ୍ମୁ-କାଶ୍ମୀର ଦୁଇଭାଗ
admin
3736
ନୂଆଦିଲ୍ଲୀ: ସପ୍ତାହେ ବ୍ୟାପୀ ଜାମ୍ମୁ-କାଶ୍ମୀରରେ ଲାଗି ରହିଥିବା କଳ୍ପନାଜଳ୍ପନା ଏବଂ ଅନିଶ୍ଚିତତା ଶେଷ ହୋଇଛି। ସୋମବାର କେନ୍ଦ୍ର ସରକାର ଏକ ବଡ଼ ଏବଂ ଐତିହାସିକ ନିଷ୍ପତ୍ତି ନେଇଛନ୍ତି, ଯାହା ଜାମ୍ମୁ-କାଶ୍ମୀରକୁ ଦୁଇଭାଗ କରିଦେଇଛି। କ୍ୟାବିନେଟ ବୈଠକରେ ହୋଇଥିବା ନିଷ୍ପତ୍ତି ସମ୍ପର୍କରେ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ ରାଜ୍ୟସଭାରେ ବିବୃତି ଦେବା ସମୟରେ ଜାମ୍ମୁ-କାଶ୍ମୀରକୁ ସ୍ବତନ୍ତ୍ର ସୁବିଧା ପ୍ରଦାନ କରୁଥିବା ସମ୍ବିଧାନର ଧାରା ୩୭୦ ଉଚ୍ଛେଦ କରିବା ଲାଗି ସଙ୍କଳ୍ପ ପ୍ରସ୍ତାବ ଆଣିଥିଲେ। ଏହି ସଙ୍କଳ୍ପକୁ ରାଷ୍ଟ୍ରପତି ମଞ୍ଜୁରୀ ପ୍ରଦାନ କରିଛନ୍ତି। ତେବେ ସଙ୍କଳ୍ପକୁ ବିରୋଧୀମାନେ ପ୍ରବଳ ବିରୋଧ କରିବା ସହିତ ହଟ୍ଟଗୋଳ କରିଥିଲେ। ବିବୃତି ଦେବା ସମୟରେ ଶାହ କେନ୍ଦ୍ର କ୍ୟାବିନେଟ ବୈଠକରେ ହୋଇଥିବା ନିଷ୍ପତ୍ତି ଉପସ୍ଥାପନ କରିଥିଲେ। କେନ୍ଦ୍ରର ନିଷ୍ପତ୍ତି ଅନୁସାରେ ଜାମ୍ମୁ-କାଶ୍ମୀରକୁ ଦୁଇଭାଗ କରିଦିଆଯାଇଛି। ଲଦାଖ ଅଞ୍ଚଳ ଜାମ୍ମୁ-କାଶ୍ମୀରଠାରୁ ଅଲଗା ହୋଇଯାଇଛି। ଫଳରେ ଜାମ୍ମୁ-କାଶ୍ମୀର ରାଜ୍ୟ ମାନ୍ୟତା ହରାଇଛି ଏବଂ ତା’କୁ କେନ୍ଦ୍ରଶାସିତ ଅଞ୍ଚଳ ମାନ୍ୟତା ମିଳିଛି। ଏହାର ବିଧାନସଭା ଶ୍ରୀନଗରରେ ରହିବ। ସେହିପରି ଲଦାଖକୁ ଅଲଗା କରି ତା’କୁ ମଧ୍ୟ କେନ୍ଦ୍ରଶାସିତ ଅଞ୍ଚଳ କରାଯାଇଛି। ଧାରା ୩୭୦ ବଳରେ ଜାମ୍ମୁ-କାଶ୍ମୀରକୁ ସ୍ବତନ୍ତ୍ର ପାହ୍ୟା ମଳୁଛି। ରାଜ୍ୟରେ ଧାରା ୩୭୦ ହଟାଇବା ଲାଗି ସରକାର ବିଲ୍ ଆଣିବେ ବୋଲି ଶାହ ତାଙ୍କ ବିବୃତିରେ କହିଛନ୍ତି। ତେବେ ସଙ୍କଳ୍ପ ପ୍ରସ୍ତାବ ଆଗତ ପରେ ରାଜ୍ୟସଭାରେ ପ୍ରବଳ ହଟ୍ଟଗୋଳ ଜାରି ରହିଛି।
ତେବେ ଧାରା ୩୭୦ ଏବଂ ୩୫(ଏ) ଉଚ୍ଛେଦ ସଙ୍କଳ୍ପକୁ ରାଷ୍ଟ୍ରପତିଙ୍କ ମଞ୍ଜୁରୀ ମିଳିସାରିଥିବାରୁ ଏହା ଆଜିଠାରୁ ଉଚ୍ଛେଦ ହୋଇସାରିଛି। ଫଳରେ ଏଣିକି ଜାମ୍ମୁ-କାଶ୍ମୀରର ଆଇନଶୃଙ୍ଖଳା ନିୟନ୍ତ୍ରଣ କେନ୍ଦ୍ର ସରକାରଙ୍କ ହାତରେ ରହିବ। ଧାରା ୩୭୦ ଏବଂ ୩୫(ଏ) ଉଚ୍ଛେଦ ହେବା, ଜାମ୍ମୁ-କାଶ୍ମୀରକୁ କେନ୍ଦ୍ରଶାସିତ ଅଞ୍ଚଳ ମାନ୍ୟତା ଦିଆଯିବା ଆଦି ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିବୃତି ରଖିବେ ବୋଲି ସୂଚନା ମିଳିଛି।
