ବିଦ୍ୟାଶ୍ରୀ-ବିସ୍ମିତଙ୍କ ବିରୋଧରେ ଏତଲା, ସଙ୍ଗୀନ ଅଭିଯୋଗ ଆଣିଲେ ଚିନ୍ମୟୀ
ବିଦ୍ୟାଶ୍ରୀ-ବିସ୍ମିତଙ୍କ ବିରୋଧରେ ଏତଲା, ସଙ୍ଗୀନ ଅଭିଯୋଗ ଆଣିଲେ ଚିନ୍ମୟୀ
admin
5100
ବାଲେଶ୍ୱର: ଆଦିତ୍ୟ ଦାଶଙ୍କ ମୃତୁ୍ୟ ମାମଲାରେ ତାଙ୍କର କିଛି ଭୂମିକା ନାହିଁ । ତଥାପି ଏହି ଘଟଣାରେ ଆଦିତ୍ୟଙ୍କ ପତ୍ନୀ ବିଦ୍ୟାଶ୍ରୀ ଓ ବାଲେଶ୍ୱର ଯୁବ ସ୍ୱେଚ୍ଛାସେବୀ ବିସ୍ମିତ ଦାସ ତାଙ୍କୁ ବାରମ୍ବାର ମାନସିକ ଯନ୍ତ୍ରଣା ଦେବା ପରେ ଥାନାର ଆଶ୍ରୟ ନେଇଛନ୍ତି ବାଲେଶ୍ୱର ଖଇରା ଅଞ୍ଚଳର ଯୁବତୀ ଚିନ୍ମୟୀ ମହାପାତ୍ର । ତାଙ୍କୁ ଅଯଥାରେ ଆଦିତ୍ୟଙ୍କ ହତ୍ୟା ମାମଲାରେ ଯୋଡ଼ାଯିବା ସହ ତାଙ୍କ ଚରିତ୍ର ସଂହାର କରାଯାଉଛି ବୋଲି ଚିନ୍ମୟୀ ଅଭିଯୋଗ କରିଛନ୍ତି । ବିଦ୍ୟାଶ୍ରୀ ଓ ବିସ୍ମିତଙ୍କ ସମେତ କିଛି ବୈଦୁ୍ୟତିକ ଗଣମାଧ୍ୟମ ବିରୋଧରେ ମଧ୍ୟ ସେ ମାମଲା ରୁଜୁ କରିଛନ୍ତି । ଚିନ୍ମୟୀଙ୍କ ଅଭିଯୋଗ ଆଧାରରେ ଖଇରା ପୁଲିସ ଆଇପିସି ଧାରା ୫୦୦, ୫୦୬, ୧୯୯, ୨୦୩ ଓ ୩୪ ରେ ମାମଲା ରୁଜୁ କରିଛି । ବିସ୍ମିତଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି ଚିନ୍ମୟୀ । କହିଛନ୍ତି ବିସ୍ମିତ ତାଙ୍କୁ ବାରମ୍ବାର ତାଙ୍କର ସାମାଜିକ ସଂଗଠନ ‘ଆଚ୍ଛା’ରେ ସାମିଲ ହେବା ପାଇଁ ବାଧ୍ୟ କରୁଥିଲେ । ବିଳମ୍ବିତ ରାତିରେ କଲ, ଭିଡିଓ କଲ କରୁଥିଲେ । ଏଥିରେ ବିରକ୍ତ ହୋଇ ମନା କରିଥିବାରୁ ବିସ୍ମିତ ଏବେ ରାଗ ସୁଝାଉଛନ୍ତି ଏବଂ ଜାଣିଶୁଣି ତାଙ୍କୁ ଏ ମାମଲାରେ ଫସାଇବାକୁ ଚେଷ୍ଟା କରୁଛନ୍ତି ବୋଲି ଚିନ୍ମୟୀ ଅଭିଯୋଗ କରିଛନ୍ତି । ସେହିପରି ଆଦିତ୍ୟଙ୍କ ପତ୍ନୀ ବିଦ୍ୟାଶ୍ରୀ ତାଙ୍କୁ ବାରମ୍ବାର ସାଇକୋ ଲେଡି ଓ ବ୍ଲାକମେଲର କହୁଥିବାରୁ ତାଙ୍କର ସମ୍ମାନ ହାନି ହୋଇଛି । ଗଣମାଧ୍ୟମରେ ବାରମ୍ବାର ତାଙ୍କ ଚରିତ୍ର ସଂହାର କରାଯାଉଥିବାରୁ ସେ ଓ ତାଙ୍କ ପରିବାର ଘୋର ମାନସିକ ଦୁଶ୍ଚିନ୍ତାରେ ଅଛନ୍ତି । ଏମିତିକି ଘରୁ ବାହାରିବା ବି କଷ୍ଟକର ହୋଇପଡ଼ିଛି । ଏଭଳି ପରିସ୍ଥିତିରେ ତାଙ୍କର କିମ୍ବା ତାଙ୍କ ପରିବାରର ଯଦି କୌଣସି କ୍ଷତି ଘଟେ, ତାହା ହେଲେ ବିସ୍ମିତ ଓ ବିଦ୍ୟାଶ୍ରୀ ଦାୟୀ ରହିବେ ବୋଲି ଚିନ୍ମୟୀ ତାଙ୍କ ଅଭିଯୋଗ ପତ୍ରରେ ଦର୍ଶାଇଛନ୍ତି ।
