ଗୁଡ଼ୁ ମୁସଲିମ୍‌ର ଓଡ଼ିଶା ଲିଙ୍କ୍ ନେଇ ପ୍ରଶ୍ନ ଉଠାଇଲେ : ସମୀର ମହାନ୍ତି

admin admin
Apr 26, 2023 - 12:05
3656
ଗୁଡ଼ୁ ମୁସଲିମ୍‌ର ଓଡ଼ିଶା ଲିଙ୍କ୍ ନେଇ ପ୍ରଶ୍ନ ଉଠାଇଲେ : ସମୀର ମହାନ୍ତି

ଭୁବନେଶ୍ୱର: ରାଜ୍ୟ କାର୍ୟ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେବିଜେପିର ପୂର୍ବତନ ରାଜ୍ୟ ସଭାପତି ସମୀର ମହାନ୍ତି ଗୁଡ଼ୁ ମୁସଲିମ୍‌ର ଓଡ଼ିଶା ଲିଙ୍କ୍ ନେଇ ପ୍ରଶ୍ନ ଉଠାଇବା ସହ ସମ୍ବଲପୁର ଘଟଣାରେ କାହିଁକି ପୁଲିସ ଉତ୍ତେଜନା ସୃଷ୍ଟି କରିଥିବା ଲୋକଙ୍କୁ ଗିରଫ କରୁନି ବୋଲି ପ୍ରଶ୍ନ କରିଛନ୍ତି। ଶ୍ରୀ ମହାନ୍ତି କହିଛନ୍ତି ଯେ ଗତ ୧୨ତାରିଖରେ ସମ୍ବଲପୁରରେ ହନୁମାନ ଜୟନ୍ତୀ ପୂର୍ବ ଶୋଭାଯାତ୍ରାରେ ଆକ୍ରମଣ ଓ କିଛି ଲୋକଙ୍କ ଘର ଛାତ ଉପରୁ ପେଟ୍ରୋଲ ବୋମା ଜବତ କରାଗଲା। ଯେଉଁମାନେ ମାରଣାସ୍ତ୍ର ଧରି ତାଣ୍ଡବ ରଚିଲେ ସେମାନଙ୍କର କ’ଣ କିଛି ଦୋଷ ନାହିଁ? ରାମନବମୀ ଓ ହନୁମାନ ଜୟନ୍ତୀ ପାଳନ ସମୟରେ ଘଟିଥିବା ବିଶୃଙ୍ଖଳା ପାଇଁ ଆୟୋଜକଙ୍କୁ ଦାୟୀ କରିବା କି ପ୍ରକାରର ମାନସିକତା? ମନ୍ତ୍ରୀ ପ୍ରତାପ ଦେବଙ୍କ ବକ୍ତବ୍ୟରୁ ସ୍ପଷ୍ଟ ହେଉଛି, ଏହି ଉତ୍ତେଜନା ସୃଷ୍ଟିକାରୀଙ୍କୁ ବିଜେଡି ସୁରକ୍ଷା ଦେଉଛି। ସରେଇପାଲି ଆଇଆଇସି ଧୀରେନ କୁମାର ସ୍ୱାଇଁ ଏଫ୍‌ଆଇଆର୍‌ରେ ସ୍ପଷ୍ଟ ଲେଖିଥିଲେ ଯେ ଗଣ୍ଡଗୋଳରେ ୧୫୦ରୁ ୧୬୦ ଜଣ ଥିଲେ। ଯାହାର ଭିଡିଓ ସାମାଜିକ ଗଣମାଧ୍ୟମରେ ଘୂରିବୁଲୁଛି। ଏତେ ବଡ଼ ଘଟଣାରେ ପୁଲିସ ମାତ୍ର ୩୦ଜଣଙ୍କୁ ଗିରଫ କରି ହାତବାନ୍ଧି ବସିଛି। ଏଥିରେ ସଂପୃକ୍ତ ଅନ୍ୟ ଗଣ୍ଡଗୋଳକାରୀଙ୍କୁ ଗିରଫ ନକରିବାକୁ କିଏ ଚାପ ସୃଷ୍ଟି କରୁଛି ଏବଂ କିଏ ପୁଲିସ ହାତ ବାନ୍ଧିଛି ବୋଲି ଶ୍ରୀ ମହାନ୍ତି ରାଜ୍ୟ ସରକାରଙ୍କୁ ପ୍ରଶ୍ନ କରିଛନ୍ତି। ଏହି ସାମ୍ବାଦିକ ସମ୍ମିଳନୀରେ ପୂର୍ବତନ ରାଜ୍ୟ ସଭାପତି କେ.ଭି ସିଂହଦେଓ, ମୁଖପାତ୍ର ମନୋଜ ମହାପାତ୍ର, ଗଣମାଧ୍ୟମ ମୁଖ୍ୟ ଦିଲୀପ ମଲ୍ଲିକ, ଲିଗାଲ ସେଲ୍ ରାଜ୍ୟ ସଂଯୋଜକ ଜୟନ୍ତ ଜେନା ପ୍ରମୁଖ ଉପସ୍ଥିତ ଥିଲେ।