ସୁଶାନ୍ତ ସିଂହଙ୍କ ମୃତ୍ୟୁକୁ ସହିନପାରି କଟକରେ ଛାତ୍ରୀଙ୍କ ଆତ୍ମହତ୍ୟା
ସୁଶାନ୍ତ ସିଂହଙ୍କ ମୃତ୍ୟୁକୁ ସହିନପାରି କଟକରେ ଛାତ୍ରୀଙ୍କ ଆତ୍ମହତ୍ୟା
admin
2209
କଟକ: କଟକର ଯୋବ୍ରା ପାରେଶ୍ୱର ସାହି ଅଞ୍ଚଳରେ ଏକ ଅଭାବନୀୟ ଘଟଣା ଘଟିଛି । କଲେଜ ଛକ ସରସ୍ୱତୀ ଶିଶୁ ବିଦ୍ୟାମନ୍ଦିରର ୯ମ ଶ୍ରେଣୀରେ ପଢ଼ୁଥିବା ଜଣେ ୧୪ ବର୍ଷର ଛାତ୍ରୀ ବେକରେ ରଶି ଲଗାଇ ଆତ୍ମହତ୍ୟା କରିଛନ୍ତି । ଛାତ୍ରୀଙ୍କ ଆତ୍ମହତ୍ୟାର କାରଣ ହେଉଛି, ବଲିଉଡ ହିରୋ ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ । ସୁଶାନ୍ତ ସିଂହଙ୍କ ମୃତ୍ୟୁ ପରେ ଭାଙ୍ଗି ପଡ଼ିଥିବା ଏହି ଛାତ୍ରୀ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଇଥିବା ସମ୍ପର୍କରେ ତାଙ୍କ ପରିବାର ଲୋକ ଥାନାରେ ଅଭିଯୋଗ କରିଛନ୍ତି । ଆତ୍ମହତ୍ୟା କରିଥିବା ଛାତ୍ରୀ ଜଣକ ହେଉଛନ୍ତି ସୌମ୍ୟଶ୍ରୀ ରାଜ । ମାଲଗୋଦାମ ଥାନା ପୁଲିସ ଏ ସଂକ୍ରାନ୍ତରେ ଏକ ଅପମୃତ୍ୟୁ ମାମଲା ରୁଜୁ କରିଛି । ବିହାରର ଜଣେ ଛାତ୍ର ଏଭଳି ଆତ୍ମହତ୍ୟା କରିଥିବା ବେଳେ ଏହା ଦେଶରେ ଦ୍ୱିତୀୟ ବୋଲି କୁହାଯାଉଛି ।
ସୂଚନା ଅନୁଯାୟୀ ଏହି ଛାତ୍ରୀ ଜଣକ ସୁଶାନ୍ତଙ୍କ ବଡ଼ ଫ୍ୟାନ ହୋଇଥିବା ବେଳେ ସୁଶାନ୍ତଙ୍କ ଆତ୍ମହତ୍ୟା ଘଟଣା ପରେ ସମ୍ପୂର୍ଣ୍ଣ ଭାଙ୍ଗି ପଡ଼ିଥିଲେ । ଗୁରୁବାର ଦିନ ପ୍ରାୟ ୧୦ଟା ବେଳେ ନିଜ ପଢ଼ା ରୁମରେ ବେକରେ ରଶି ଦେଇ ଫ୍ୟାନରେ ଝୁଲି ପଡ଼ିଥିଲେ । ପରିବାର ଲୋକ ଘଟଣା ସମ୍ପର୍କରେ ଜାଣିପାରି ତାଙ୍କୁ ଉଦ୍ଧାର କରିବା ସହିତ ବଡ଼ ମେଡିକାଲରେ ଭର୍ତ୍ତି କରିଥିଲେ । ସେତେବେଳକୁ ତାଙ୍କର ମୃତ୍ୟୁ ହୋଇଯାଇଥିବା କୁହାଯାଉଛି । ଅଭିନେତା ସୁଶାନ୍ତ ସିଂହ ରାଜପୁତଙ୍କ ଆତ୍ମହତ୍ୟା ପରେ ସୌମ୍ୟା ଭାଙ୍ଗି ପଡ଼ି ଆତ୍ମହତ୍ୟା କରିଥିବା ପରିବାର ଲୋକ ଅଭିଯୋଗରେ ଦର୍ଶାଇଛନ୍ତି ବୋଲି ମାଲଗୋଦାମ ଥାନା ଆଇଆଇସି ରବି ନାରାୟଣ ଭଞ୍ଜ ସୂଚନା ଦେଇଛନ୍ତି ।
