ପାୱାର କରିଡ଼ରରେ ମହକିବନି ପାଣ୍ଡିଆନ୍ ପରଫ୍ୟୁମ୍
ANGIKAR NEWS
ଭୁବନେଶ୍ୱର : ପାୱାର କରିଡ଼ରରେ ଆଉ ପାଣ୍ଡିଆନ ପରଫ୍ୟୁମ୍ ଚହଟିବନି । ପାଣ୍ଡିଆନଙ୍କ ଛାପ ଥିବା ବାବୁଙ୍କ ଉପରେ ଏବେ ମୋହନ ସରକାର ଆକ୍ସନ ନେବା ଆରମ୍ଭ କରିଦେଇଛନ୍ତି । ନବୀନ ସରକାର ଅମଳରେ ମାମଲତି କରୁଥିବା ଅଫିସରଙ୍କ ଡେଣା କାଟି ଦିଆଯାଇଛି । ଯାହାକୁ ନେଇ ଏବେ ପାୱାର କରିଡ଼ରରେ ଆରମ୍ଭ ହୋଇଯାଇଛି କମ୍ପନ । ଖାଲି ସଚିବସ୍ତରୀୟ ଅଫିସର ନୁହଁନ୍ତି ଅନେକ ଜିଲ୍ଲାପାଳ ଓ ଏସପିମାନେ ବିଜେଡ଼ିର କର୍ମୀ ଓ ନେତାଭାବେ କାର୍ଯ୍ୟ କରୁଥିଲେ । ସେମାନଙ୍କ ଚିହ୍ନଟ ପ୍ରକ୍ରିୟା ବି ଆରମ୍ଭ ହୋଇଯାଇଛି । ଧିରେଧିରେ ସେମାନଙ୍କୁ ପ୍ରଶାସନିକ କଳରୁ କୋଣଠେସା କରାଯିବ ।
ନିକଟରେ ଜି ମାଥିଭାଥନନଙ୍କୁ ଲୋକସେବା ଭବନରୁ ହଟାଇ ଦିଆଯାଇଛି । ଗତ ଏକ ଦଶନ୍ଧି ଧରି ସେ ଥିଲେ ପାୱାର କରିଡ଼ରର ପାୱାରଫୁଲ ଅଫିସର । ପାଣ୍ଡିଆନଙ୍କ ଅତ୍ୟନ୍ତ ଖାସ୍ । ଗୋଟିଏ ଗୋଟିଏ ବିଭାଗରେ ଦଶନ୍ଧିରୁ ଉଦ୍ଧ୍ୱର୍ ଦିନ ଧରି ସେ ରାଜ୍ କରୁଥିଲେ । ସେହିପରି ଭୀନିଲ କ୍ରୀଷ୍ଣାଙ୍କ ଡେଣା ବି କଟିସାରିଛି । ଅପରପକ୍ଷରେ ଆଇପିଏସ ଆଶିଷ ସିଂହଙ୍କ ଉପରେ ବି କାର୍ଯର୍୍ୟାନୁଷ୍ଠାନ ନିଆଯାଇଛି । ଦିନେ ମୁଖ୍ୟମନ୍ତ୍ରୀଙ୍କ ସୁରକ୍ଷା ଦାୟିତ୍ୱରେ ଥିବା ଆଶିଷଙ୍କୁ ଏବେ ଗୃହ ବିଭାଗରେ ବସାଇ ଦିଆଯାଇଛି । ଯାହାକୁ ନେଇ ପାଣ୍ଡିଆନଙ୍କ କୋଟରୀରେ କମ୍ପନ ସୃଷ୍ଟିହୋଇଛି । ଏବେ ବିଭିନ୍ନ ଜିଲ୍ଲାପାଳ ଓ ଏସପିମାନେ ବି ଭୟଭୀତ ହୋଇପଡ଼ିଲେଣି । ଆଗାମୀ ଦିନରେ ମୋହନ ସରକାର କି ଆକ୍ସନ ନେବେ ତାହା ଉପରେ ଏବେ ନଜର ।
