ଦୁଇ ବର୍ଷରୁ ଅଧିକ ପିଲାମାନେ ବାହାରକୁ ଯିବାବେଳେ ମାସ୍କ ପିନ୍ଧାନ୍ତୁ
ଦୁଇ ବର୍ଷରୁ ଅଧିକ ପିଲାମାନେ ବାହାରକୁ ଯିବାବେଳେ ମାସ୍କ ପିନ୍ଧାନ୍ତୁ
admin
4525
ଭୁବନେଶ୍ୱର : ରାଜ୍ୟରେ ଭୟଙ୍କର ହେଉଛି କରୋନା ସ୍ଥିତି । ବଢୁଛି କରୋନାର କାୟା । ସ୍ଥିତି ହେଉଛି ବେକାବୁ । ଓଡ଼ିଶାରେ କରୋନା ମହାମାରୀର ମହାସମର ଆରମ୍ଭ ହୋଇଯାଇଛି । କରୋନା ଏବେ ଲମ୍ବ ଡିଆଁ ମାରି ଗୋଟିକ ପରେ ଗୋଟିଏ ଜିଲ୍ଲାରେ ପ୍ରବେଶ କରିବା ସହ ଆତଙ୍କ ଖେଳାଇ ଚାଲିଛି । ଦିନକୁ ଦିନ ଆକ୍ରାନ୍ତଙ୍କ ସଂଖ୍ୟା ବଢି ଚାଲିଛି । କରୋନା ମୁକାବିଲା ପାଇଁ ମାସ୍କ ଓ ସାମାଜିକ ଦୂରତାକୁ ଗୁରୁତ୍ୱ ଦିଆଯାଉଛି । ଏହାରି ଭିତରେ ରାଜ୍ୟସରକାର ଅଭିଭାବକମାନଙ୍କୁ ପରାମର୍ଶ ଦେଇଛନ୍ତି ଯେ ଦୁଇ ବର୍ଷରୁ ଅଧିକ ପିଲାମାନେ ବାହାରକୁ ଯିବାବେଳେ ମାସ୍କ ପିନ୍ଧାନ୍ତୁ । ମହାମାରୀର ଦ୍ୱିତୀୟ ଲହରରେ ପିଲାମାନଙ୍କ ମଧ୍ୟରେ କୋଭିଡ୍ ପଜିଟିଭ୍ ମାମଲା ବୃଦ୍ଧି ପାଇବା ପରେ ଏହି ପରାମର୍ଶ ଦିଆଯାଇଛି।
ମହିଳା ଏବଂ ଶିଶୁ ବିକାଶ ବିଭାଗକୁ ଲେଖିଥିବା ଏକ ଚିଠିରେ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପି.କେ ମହାପାତ୍ର ଏହି ପରାମର୍ଶ ଦେଇଛନ୍ତି।
ସେଥିରେ ଉଲ୍ଲେଖ ଅଛି ଯେ, ଇଣ୍ଡିଆନ୍ ଏକାଡେମୀ ଅଫ୍ ପେଡିଆଟ୍ରିକ୍ସର ସୁପାରିଶ ଅନୁଯାୟୀ ଦୁଇ ବର୍ଷରୁ ଅଧିକ ପିଲାମାନେ ମାସ୍କ ପିନ୍ଧିବା ଉଚିତ୍। ଅଭିଭାବକମାନେ ସେମାନଙ୍କ ପିଲାମାନଙ୍କୁ ସଠିକ୍ ଭାବରେ ମାସ୍କ ପିନ୍ଧିବା ନିଶ୍ଚିତ କରିବାକୁ ଚିଠିରେ ଦର୍ଶାଯାଇଛି।
କରୋନାର ଲକ୍ଷଣ ଥିବା ପିଲାମାନଙ୍କୁ ଅନ୍ତର୍ଭୁକ୍ତ କରି ଯେକୌଣସି ବୟସ ବର୍ଗର ବ୍ୟକ୍ତିମାନେ ହୁ ନିର୍ଦ୍ଦେଶାବଳୀ ଅନୁଯାୟୀ ପରୀକ୍ଷା, ବିଚ୍ଛିନ୍ନତା ଏବଂ ଚିକିତ୍ସା ପରାମର୍ଶ ପାଇଁ ଯିବାକୁ ପଡିବ ବୋଲି ସେଥିରେ କୁହାଯାଇଛି। ଚିଠିରେ ଆହୁରି ମଧ୍ୟ ଦର୍ଶାଯାଇଛି ଯେ କରୋନାର ନୂତନ ଲକ୍ଷଣଗୁଡ଼ିକ ହେଉଛି ଡାଇରିଆ, ବାନ୍ତି, ପେଟ ଯନ୍ତ୍ରଣା ଇତ୍ୟାଦି। ଯଦି ଶିଶୁ, ଗର୍ଭବତୀ ଏବଂ ସ୍ତନ୍ୟପାନ କରାଉଥିବା ମହିଳା ଏବଂ କିଶୋରମାନଙ୍କ ମଧ୍ୟରେ ଏହିପରି ଲକ୍ଷଣ ଦେଖାଯାଏ, ତେବେ ସେମାନେ କରୋନା ସଂକ୍ରମିତ ବୋଲି କୁହାଯାଇପାରେ ।
