ଆଗୁଆ ବାତ୍ୟା ପ୍ରସ୍ତୁତି : ମେ’ ପହିଲାରୁ ସମସ୍ତ ବିଭାଗ ଓ ପ୍ରତି ଜିଲ୍ଲାରେ କାର୍ୟ୍ୟକ୍ଷମ ହେବ କଣ୍ଟ୍ରୋଲ ରୁମ୍
admin
ଭୁବନେଶ୍ୱର: ଯଦିଓ ଏଯାଏ ଚଳିତ ଗ୍ରୀଷ୍ମରେ ବାତ୍ୟା ସମ୍ପର୍କରେ କୌଣସି ପୂର୍ବାନୁମାନ କରାଯାଇନାହିଁ, ତଥାପି ଆଗୁଆ ପ୍ରସ୍ତୁତି ଆରମ୍ଭ କରିଛନ୍ତି ରାଜ୍ୟ ସରକାର । ନିର୍ଦ୍ଦେଶ ଦିଆଯାଇଛି, ଆସନ୍ତା ମେ’ ପହିଲାରୁ ସମସ୍ତ ବିଭାଗ ଓ ପ୍ରତି ଜିଲ୍ଲାରେ ନିୟନ୍ତ୍ରଣ କକ୍ଷ (କଣ୍ଟ୍ରୋଲ ରୁମ୍) କାର୍ୟ୍ୟକ୍ଷମ ହେବ। କଣ୍ଟ୍ରୋଲ ରୁମ୍ ଦାୟିତ୍ୱରେ ଜଣେ ପ୍ରଥମ ଶ୍ରେଣୀ ଅଧିକାରୀ ରହିବେ । ଆସନ୍ତା ୧୯ରେ ପ୍ରତି ଜିଲ୍ଲାରେ ବାତ୍ୟା ପ୍ରସ୍ତୁତି ନେଇ ମକ୍ ଡ୍ରିଲ୍ ହେବ । ରଥଯାତ୍ରା ପରେ ପୁରୀରେ ମକ୍ ଡ୍ରିଲ୍ କରାଯିବ । ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନାଙ୍କ ଅଧ୍ୟକ୍ଷତାରେ ଗ୍ରୀଷ୍ମକାଳୀନ ସମ୍ଭାବ୍ୟ ବାତ୍ୟା ମୁକାବିଲା ପାଇଁ ସମସ୍ତ ବିଭାଗକୁ ନେଇ ଅନୁଷ୍ଠିତ ବୈଠକରେ ଏହି ନିଷ୍ପତ୍ତି ହୋଇଛି । ବିଦ୍ୟୁତ ବିତରଣ କମ୍ପାନିକୁ ସେମାନଙ୍କର ବିପର୍ୟ୍ୟୟ ପରିଚାଳନା ଯୋଜନା ସମୀକ୍ଷା କରି କାର୍ୟ୍ୟକାରୀ କରିବାକୁ ନିର୍ଦ୍ଦେଶ ଦିଆଯାଇଛି ।
ବାତ୍ୟା ପ୍ରଭାବିତ ଅଞ୍ଚଳରେ ବିଦ୍ୟୁତ ଯୋଗାଣର ଶୀଘ୍ର ପୁନରୁଦ୍ଧାର ପାଇଁ ପ୍ରସ୍ତୁତ ରହିବାକୁ କୁହାଯାଇଛି । ବାତ୍ୟା ସମୟରେ ଯେଭଳି ଟେଲିକମ ସେବା କାର୍ୟ୍ୟକ୍ଷମ ରହିବ, ସେଥିପାଇଁ ବିଏସ୍ଏନ୍ଏଲ୍ ଓ ଟେଲିକମ ସେବା ପ୍ରଦାନକାରୀ ଅନ୍ୟ କମ୍ପାନି ଦ୍ୱାରା ଆପଦକାଳୀନ ବ୍ୟବସ୍ଥା କରାଯାଇଛି । ସମ୍ବେଦନଶୀଳ ସ୍ଥାନରେ ଆଗୁଆ ବିକଳ୍ପ (ଷ୍ଟାଣ୍ଡବାଇ) ମୋବାଇଲ ଟାୱାର ନିୟୋଜିତ କରାଯିବ । ସମ୍ଭାବ୍ୟ ବାତ୍ୟା ପ୍ରବଣ ଅଞ୍ଚଳରେ ସମସ୍ତ ମୋବାଇଲ୍ ଫୋନକୁ ଭଏସ୍ ମେସେଜ ଓ ଏସ୍ଏମ୍ଏସ୍ରେ ବାତ୍ୟା ଚେତାବନୀ ଓ ପାଣିପାଗ ବିଭାଗର ସତର୍କ ସୂଚନା ପଠାଇବା ଲାଗି ବିଏସଏନଏଲ୍କୁ ନିର୍ଦ୍ଦେଶ ଦିଆଯାଇଛି ।
ବୈଠକ ସମ୍ପର୍କରେ ଗଣମାଧ୍ୟମକୁ ସୂଚନା ଦେଇ ରାଜସ୍ୱ ଓ ବିପର୍ୟୟ ପରିଚାଳନା ମନ୍ତ୍ରୀ ପ୍ରମିଳା ମଲ୍ଲିକ କହିଛନ୍ତି, ସମ୍ଭାବ୍ୟ ଗ୍ରୀଷ୍ମକାଳୀନ ବାତ୍ୟାର ମୁକାବିଲା ପାଇଁ ରାଜ୍ୟ ସରକାର ପ୍ରସ୍ତୁତ ରହିଛନ୍ତି । ଏ ନେଇ ସମସ୍ତ ବିଭାଗ, ଜିଲ୍ଲା ପ୍ରଶାସନ ସହ ଆଲୋଚନା ହୋଇଛି ।
