ଦୁଇକିଲୋ ସୁନାରେ ଗଢ଼ାଯିବ ୯୩ ଶ୍ରୀମୁଖ ପଦ୍ମ ପାଖୁଡ଼ା, ରତ୍ନଭଣ୍ଡାର ସବ୍ କମିଟିକୁ ଗଲା ପ୍ରସ୍ତାବ
ଦୁଇକିଲୋ ସୁନାରେ ଗଢ଼ାଯିବ ୯୩ ଶ୍ରୀମୁଖ ପଦ୍ମ ପାଖୁଡ଼ା, ରତ୍ନଭଣ୍ଡାର ସବ୍ କମିଟିକୁ ଗଲା ପ୍ରସ୍ତାବ
admin
5605
ପୁରୀ:ମହାପ୍ରଭୁଙ୍କ ବିଭିନ୍ନ ବେଶରେ ଲାଗି ହେଉଥିବା ଶ୍ରୀମୁଖ ସୁବର୍ଣ୍ଣ ପଦ୍ମ ପାଖୁଡ଼ା ନଷ୍ଟ ହୋଇଯାଇଛି । ବେଶରେ ଆଉ କାମଚଳା ଭାବେ ଏହି ଲାଗି ହୋଇପାରିବ ନାହିଁ । ପଦ୍ମ ପାଖୁଡା ଗୁଡ଼ିକ ଗଳି ପଡ଼ିବା ସ୍ଥିତିରେ ରହିଛି । ସମ୍ପୂର୍ଣ୍ଣ ମରାମତି ନିତାନ୍ତ ଜରୁରୀ । ଏଭଳି ପ୍ରସ୍ତାବ ଶ୍ରୀମନ୍ଦିର ପ୍ରଶାସନକୁ ସେବକମାନେ ଦେଇଥିଲେ । ପରିଚାଳନା କମିଟି ଏବେ ସୁପାରିଶ କରିଛି ଶ୍ରୀମନ୍ଦିର ରତ୍ନଭଣ୍ଡାର ସବ କମିଟିରେ ଏହି ଆଭୁଷଣ ମରାମତି ପ୍ରସ୍ତାବକୁ ଉପସ୍ଥାପନ କରିବେ ।
ଆଭୂଷଣର ୯୩ଟି ସୁବର୍ଣ୍ଣ ପଦ୍ମ ପାଖୁଡାକୁ ନୂତନ କରି ପ୍ରସ୍ତୁତ କରାଯିବ । ଏଥିପାଇଁ ଏକ କେଜି ୮୬୦ ଗ୍ରାମ ସୁନା ଏବଂ ସମାନ ପରିମାଣର ରୂପା ଆବଶ୍ୟକ ହେଉଛି । ରତ୍ନ ଭଣ୍ଡାର ସବ୍ କମିଟିର ସୁପାରିଶ ଆଧାରରେ ସୁବର୍ଣ୍ଣ ପଦ୍ମ ପାଖୁଡ଼ା ପୁନଃ ଗଢ଼ାଯିବ । ଅଳଙ୍କାର ମରାମତି ପାଇଁ ଆବଶ୍ୟକ ସୁନା ଓ ରୂପାର ଠିକ୍ ଆକଳନ କରି ପରିଚାଳନା କମିଟିର ଅନୁମୋଦନ ପାଇଁ ଉପସ୍ଥାପନ କରାଯିବ । ଏହି ପରିପ୍ରେକ୍ଷୀରେ ଶ୍ରୀମନ୍ଦିର ରତ୍ନ ଭଣ୍ଡାର ସବକମିଟିର ନିଷ୍ପତ୍ତିକୁ ସମସ୍ତେ ଅପେକ୍ଷା କରିଛନ୍ତି ।
ସୂଚନା ମୁତାବକ ମହାପ୍ରଭୁଙ୍କ ଶ୍ରୀମୁଖ ସୁବର୍ଣ୍ଣ ପଦ୍ମ ପାଖୁଡା ଆଭୂଷଣ ଆଉ ବ୍ୟବହାର ଉପଯୋଗୀ ନଥିବା ନେଇ ସେବାୟତମାନେ ପ୍ରଶାସନକୁ ସୂଚନାଦେଇଥିଲେ । ଏହି ସମସ୍ୟାର ସମାଧାନ ପାଇଁ ନୀତି ପ୍ରଶାସକଙ୍କ ଅଧ୍ୟକ୍ଷତାରେ ଏକ ବୈଠକ ଡକାଯାଇଥିଲା । ଏହି ବୈଠକରେ ପାଟ୍ଟଯୋଷୀ ମହାପାତ୍ର, ଭଣ୍ଡାର ମେକାପ. ଦେଉଳକରଣ, ଫୌଦାର ସେବକ, ଦେଉଳ କମାଣ୍ଡର ପ୍ରମୁଖ ଉପସ୍ଥିତ ଥିଲେ । ବୈଠକରେ ନଷ୍ଟ ହୋଇଥିବା ପଦ୍ମ ପାଖୁଡ଼ାକୁ ମରାମତି କଲେ ପୁଣି ନଷ୍ଟ ହେବାର ଆଶଙ୍କା ପ୍ରକାଶ ପାଇଥିଲା । ତେଣୁ ସୁବର୍ଣ୍ଣ ପଦ୍ମ ପାଖୁଡାକୁ ନୂତନ ଭାବେ ପ୍ରସ୍ତୁତ କରିବାକୁ ବୈଠକରେ ମତ ମିଳିଥିଲା । ମତ ଦେଇଥିଲା । ଗତ ୫ ତାରିଖରେ ଅନୁଷ୍ଠିତ ପରିଚାଳନା କମିଟିରେ ଏହା ଉପସ୍ଥାପନ କରାଯାଇଥିଲା । ଉଲ୍ଲେଖଯୋଗ୍ୟ ଯେ, ଶ୍ରଦ୍ଧାଳୁମାନେ ମହାପ୍ରଭୁଙ୍କୁ ଦାନ କରୁଥିବା ସୁନା, ରୁପା ଜାତୀୟକରଣ ବ୍ୟାଙ୍କ ଲକର ଏବଂ ଶ୍ରୀମନ୍ଦିର ନାଜରଖାନାରେ ରହିଛି । ପାଖାପାଖି ୧୭ କିଲୋ ସୁନା ବ୍ୟାଙ୍କ ଲକରରେ ରହିଛି । ସେହିଭଳି ୬୨ ମିଲୋ ଖାଣ୍ଟି ରୁପା ଏବଂ ୨୧୦ କିଲୋ ରୁପା ଅଳଙ୍କାର ଶ୍ରୀମନ୍ଦିର ନାଜରଖାନାରେ ମହଜୁଦ ରହିଛି । ଏଥିରୁ ଆବଶ୍ୟକ ସୁନା ଓ ରୂପା ଅଣାଯାଇ ବ୍ୟବହାର ହେବ ।
