ଉପନିର୍ବାଚନ : ୧୧୦ଟି ଉତ୍ତେଜନାପୂର୍ଣ୍ଣ ବୁଥରେ କଡା ସୁରକ୍ଷା
ଉପନିର୍ବାଚନ : ୧୧୦ଟି ଉତ୍ତେଜନାପୂର୍ଣ୍ଣ ବୁଥରେ କଡା ସୁରକ୍ଷା
admin
ଭଦ୍ରକ: ଆଜି ଧାମନଗର ଉପନିର୍ବାଚନ । ସକାଳ ୭ଟାରୁ ମତଦାନ ଆରମ୍ଭ ହୋଇଛି ।ଏହା ସନ୍ଧ୍ୟା ୬ଟା ପର୍ୟ୍ୟନ୍ତ ଚାଲିବ।। ନିଜ ବିଧାୟକ ବାଛୁଛନ୍ତି ଧାମନଗର ବାସୀ। ଧାମନଗର ଉପନିର୍ବାଚନକୁ ଅବାଧ ଓ ନିରପେକ୍ଷ କରିବା ଲାଗି ବ୍ୟାପକ ବ୍ୟବସ୍ଥା । ୧୧୦ଟି ଉତ୍ତେଜନାପୂର୍ଣ୍ଣ ବୁଥରେ କଡା ସୁରକ୍ଷା ବଳୟରେ ଭୋଟ ଗ୍ରହଣ ଚାଲିଛି । ୧୨୬ଟି ବୁଥରେ ଓ୍ବେବକାଷ୍ଟିଂ କରାଯିବ । ବୁଥର ଶହେ ମିଟର ମଧ୍ୟରେ ବିଚରଣ ଅପରାଧ । ବିନା ଓ୍ବାରେଣ୍ଟରେ ହୋଇପାରିବେ ଗିରଫ । ଦୃଷ୍ଟିହୀନଙ୍କ ପାଇଁ ବ୍ରେଲ୍ ଇଭିଏମ୍ ବ୍ୟବସ୍ଥା ହୋଇଥିବା ବେଳେ ଭିନ୍ନକ୍ଷମ ଭୋଟରଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି ।
ଭୋଟର ପରିଚୟ ପତ୍ର ଛଡା ୧୨ ଟି ଅନ୍ୟ ଡକ୍ୟୁମେଣ୍ଟ ଦେଖାଇ ବି ଭୋଟ ଦେଇ ପାରିବେ ଭୋଟର । ସବୁ ବୁଥରେ ହେଲ୍ପ ଡେସ୍କ ରହିଛି । ଉପନିର୍ବାଚନ ପାଇଁ ସୁରକ୍ଷା ବ୍ୟବସ୍ଥା କଡ଼ାକଡି କରାଯାଇଛି । ନିର୍ବାଚନମଣ୍ଡଳୀରେ ମୋଟ ୧୩ଟି ଚେକ ପଏଣ୍ଟରେ ଗାଡି ଗୁଡିକୁ କଡାକଡ଼ି ଚେକିଂ କରାଯାଉଛି । ୧ହଜାର ପୋଲିସ ନିୟୋଜିତ ହେବା ସହ ୪ କମ୍ପାନୀ ସିଆରପିଏଫ୍ , ୨୨ ପ୍ଲାଟୁନ୍ ରାଜ୍ୟ ସଶସ୍ତ୍ର ପୋଲିସ ବଳ, ୨୪ଟି ମୋବାଇଲ ପେଟ୍ରୋଲିଂ ଭ୍ୟାନ୍ ମୁତୟନ ହୋଇଛନ୍ତି । କୌଣସି ଅପ୍ରୀତିକର ପରିସ୍ଥିତି ଯେପରି ନହୁଏ ସେନେଇ କଡ଼ା ନଜର ରଖାଯାଇଛି।
ଏହି ନିର୍ବାଚନରେ ବିଜେଡିରୁ ଅବନ୍ତୀ ଦାସ, ବିଜେପିରୁ ଦିବଂଗତ ବିଧାୟକ ବିଷ୍ଣୁ ସେଠୀଙ୍କ ପୁତ୍ର ସୂର୍ୟ୍ୟବଂଶୀ ସୂରଜ, କଂଗ୍ରେସରୁ ବାବା ହରେକୃଷ୍ଣ ସେଠୀ ଓ ବିଜେଡି ଟିକେଟ୍ ନପାଇ ସ୍ୱାଧୀନ ଭାବେ ରାଜେନ୍ଦ୍ର ଦାସ ପ୍ରାର୍ଥୀ ହୋଇଛନ୍ତି । ଏହି ୪ ଜଣଙ୍କ ବ୍ୟତୀତ ଅନ୍ୟ ଜଣେ ପ୍ରାର୍ଥୀ ସ୍ୱାଧୀନ ଭାବେ ପ୍ରାର୍ଥିପତ୍ର ଦାଖଲ କରିଛନ୍ତି ।
