ଭୁବନେଶ୍ବର :ସୁନାମଧନ୍ୟ ହକି ତାରକା ପ୍ରବୋଧ ତିର୍କୀ କଂଗ୍ରେସରେ ଯୋଗ ଦେଇଛନ୍ତି । ରାହୁଲ ଗାନ୍ଧୀଙ୍କ ଆଦର୍ଶରେ ଅନୁପ୍ରାଣୀତ ହୋଇ ପ୍ରବୋଧ କଂଗ୍ରେସରେ ସାମିଲ ହୋଇଛନ୍ତି । ଜାତୀୟସ୍ତରରେ ହକି ଖେଳରେ ସେ ବେଶ ସୁନାମ ଅର୍ଜନ କରିଛନ୍ତି । ୧୯୮୫ ମସିହା ଡିସେମ୍ବର ୧୫ରେ ପ୍ରବୋଧ ତଳସରାର ଲୁକିଡିହି ଠାରେ ଜନ୍ମଗ୍ରହଣ କରିଥିଲେ । ମାଟ୍ରିକ ପାଶ କରିଥିବା ପ୍ରବୋଧ ହକି ଖେଳରେ ବେଶ ପ୍ରତିଷ୍ଠା ଅର୍ଜନ କରିଛନ୍ତି । ୧୯୯୯ ମସିହାରେ ସେ ପ୍ରଥମ ଥର ପାଇଁ ଭାରତୀୟ ଜାତୀୟ ଦଳର ପ୍ରତିନିଧିତ୍ୱ କରିଥିଲେ । ୨୦୧୦ ପର୍ଯ୍ୟନ୍ତ ସେ ୧୬୧ ମ୍ୟାଚରେ ଭାରତର ପ୍ରତିନିଧିତ୍ୱ କରିଛନ୍ତି । ଭାରତୀୟ ହକି ଦଳର ଅଧିନାୟକ ଭାବେ ସେ ବେଶ ସଫଳତା ହାସଲ କରିଛନ୍ତି । ତାଙ୍କ ଅଧିନାୟକତ୍ୱରେ ୨୦୦୭ରେ ଭାରତ ଏସିଆ କପ ଚମ୍ପିଆନ ହୋଇଥିଲା । କ୍ରୀଡ଼ା କ୍ଷେତ୍ରରେ ପାରଦର୍ଶିତା ପାଇଁ ତାଙ୍କୁ ଏୟାର ଇଣ୍ଡିଆରେ ନିଯୁକ୍ତି ମଧ୍ୟ ମିଳିଥିଲା । ତଳସରାରୁ କଂଗ୍ରେସ ଟିକେଟରେ ଲଢ଼ିବା ପାଇଁ ସେ ଆଗ୍ରହୀ ଥିବାବେଳେ ଦଳ ତାଙ୍କୁ ଟିକେଟ ଦେବାକୁ ନିଷ୍ପତି ମଧ୍ୟ ନେଇଛି । ଯାହାକୁ ନେଇ ତଳସରା ରାଜନୀତି ବେଶ ସରଗରମ ହୋଇଯାଇଛି । ଏକଦା ତଳସରା ଥିଲା କଂଗ୍ରେସର ଗଡ଼ । ଗତ ନିର୍ବାଚନରେ ବିଜେପି ସେଠାରୁ ବାଜିମାତ କରିଥିଲା । ତେବେ ପ୍ରବୋଧଙ୍କ ରାଜନୀତିକ ପ୍ରବେଶ ତଳସରାର ରାଜନୀତିକ ସମୀକରଣକୁ ବଦଳାଇ ଦେଇଛି । ଯୁବପୀଢ଼ିଙ୍କୁ ମାଗଣାରେ ହକି ପ୍ରଶିକ୍ଷଣ ଦେଉଥିବା ପ୍ରବୋଧ ସ୍ଥାନୀୟ ଅଂଚଳରେ ଅନେକ ସାମାଜିକ କାର୍ଯ୍ୟକ୍ରମ ସହ ଜଡ଼ିତ ଅଛନ୍ତି । କଂଗ୍ରେସରେ ଯୋଗଦାନ ପୂର୍ବରୁ ପିସିସି ସଭାପତି ଶରତ ପଟ୍ଟନାୟକ, ପିସିସି ପ୍ରଭାରୀ ଚେଲ୍ଲାକୁମାର, କଟକ ଜିଲ୍ଲା କଂଗ୍ରେସ ସଭାପତି ମାନସ ଚୌଧୁରୀଙ୍କ ସହ ସେ ଭୁବନେଶ୍ବରରେ ଆଲୋଚନା କରିଥିଲେ ।
admin
