ବାହାନଗା ଟ୍ରେନ୍ ଟ୍ରାଜେଡି;୩ ଗିରଫ
admin
ଭୁବନେଶ୍ବର: ଜୁନ୍ ୨ ତାରିଖରେ ହୋଇଥିବା ବାଲେଶ୍ବର ଜିଲ୍ଲା ବାହାନଗା ଟ୍ରେନ୍ ଟ୍ରାଜେଡି ମାମଲାରେ ୩ଜଣଙ୍କୁ ଗିରଫ କରିଛି ସିବିଆଇ। ସୂଚନା ଅନୁସାରେ, ସିନିୟର ସେକ୍ସନ୍ ଅଫିସର ଅରୁଣ କୁମାର ମହାନ୍ତ, ସିନିୟର ସେକ୍ସନ୍ ଇଞ୍ଜିନିୟକ ମହମ୍ମଦ ଅମିର ଖାନ୍ ଓ ଟେକ୍ନିସିଆନ୍ ପପୁ କୁମାରଙ୍କୁ ସିବିଆଇ ଗିରଫ କରିଛି। ଆଇପିସିର ଧାରା ୩୦୪ ଓ ୨୦୧ରେ ଗିରଫ କରାଯାଇଥିବା ସୂଚନା। ଜାଣିକି ଅପରାଧ ଘଟାଇ ପ୍ରମାଣକୁ ଲୁଚାଇବା ଅଭିଯୋଗରେ ତିନିଜଣଙ୍କୁ ଗିରଫ କରିଛି ସିବିଆଇ।
ସୂଚନାଥାଉକି, ଜୁନ୍ ୨ ତାରିଖରେ ବାଲେଶ୍ବର ଜିଲ୍ଲା ବାହାନଗା ଠାରେ ହୋଇଥିବା ମର୍ମନ୍ତୁଦ କରମଣ୍ଡଳ ଟ୍ରେନ୍ ଦୁର୍ଘଟଣାରେ ୨୯୩ଜଣ ଲୋକ ପ୍ରାଣ ହରାଇଥିବା ବେଳେ ୧୦୦୦ରୁ ଅଧିକ ଆହତ ହୋଇଥିଲେ। ଜୁନ୍ ୨ ତାରିଖ ସଂନ୍ଧ୍ୟାରେ ବାହାନଗା ଠାରେ ପୂର୍ବରୁ ଲାଇନଚ୍ୟୁତ ହୋଇଥିବା ଏକ ମାଲବାହୀ ଟ୍ରେନ୍କୁ ଧକ୍କା ଦେଇଥିଲା ସାଲିମାର-ଚେନ୍ନାଇ କରମଣ୍ଡଳ ଏକ୍ସପ୍ରେସ। ଏବଂ ପରେ ଅନ୍ୟ ଏକ ଟ୍ରାକ୍ରେ ଯାଉଥିବା ଯଶବନ୍ତପୁର-ହାଓ୍ବଡ଼ା ଏକ୍ସପ୍ରେସର ଶେଷ ଦୁଇଟି ବଗି ସହିତ ମଧ୍ୟ ଧକ୍କା ହୋଇଥିଲା। ଦୁର୍ଘଟଣା ପରେ ଯୁଦ୍ଧକାଳୀନ ଭିତ୍ତିରେ ଉଦ୍ଧାର କରିଥିଲେ ରାଜ୍ୟ ଓ ରାଜ୍ୟ ବାହାରୁ ନିୟୋଜିତ ହୋଇଥିବା ଉଦ୍ଧାରକାରୀ ଟିମ୍। ଟ୍ରାଜେଡିରେ ଘଟଣାସ୍ଥଳରେ ପ୍ରଥମେ ୨୮୮ ଜଣଙ୍କର ମୃତ୍ୟୁ ହୋଇଥିବା ବେଳେ ପରେ ହସ୍ପିଟାଲରେ ବାକି ୫ଜଣଙ୍କର ମୃତ୍ୟୁ ହୋଇଥିଲା।
ବାହାନଗା ଦୁର୍ଘଟଣା ପଛରେ କୌଣସି ଷଡ଼ଯନ୍ତ୍ର କରାଯାଥିଲା କି ନାହିଁ ସେ ନେଇ ସିବିଆଇ ତଦନ୍ତ କରୁଥିଲା। ଗତ ସପ୍ତାହରେ ରେଲଓ୍ବେ ସେଫ୍ଟି କମିଶନର ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରିବା ସହିତ ତାଙ୍କ ରିପୋର୍ଟ ଦେଇଥିଲେ। ସିଗ୍ନାଲିଂ ସେକ୍ସନ୍ର କର୍ମଚାରୀମାନଙ୍କୁ କମିଶନର ଏହି ଦୁର୍ଘଟଣା ପାଇଁ ଦାୟୀ କରିଥିଲେ। ଏପରିକି ସୁରକ୍ଷା ଦୃଷ୍ଟିକୋଣରୁ ଯେପରି ଯାଞ୍ଚ କରିବା କଥା ସେହିପରି ଭାବେ ଯାଞ୍ଚ ହୋଇନଥିବା ଦର୍ଶାଇ କର୍ମଚାରୀଙ୍କୁ ଦାୟୀ କରିଥିଲେ ଆରଏସସି। ତେବେ ତମାମ ଘଟଣାକୁ ଗୁରୁତର ସହିତ ନେଇ ତଦନ୍ତ କରିଥିଲା ସିବିଆଇ। ଶୁକ୍ରବାର ତିନିଜଣ ରେଳ କର୍ମଚାରୀଙ୍କୁ ଏହି ମାମଲାରେ ଗିରଫ କରିଛି ସିବିଆଇ।
