ସୋନିଆ ଗାନ୍ଧିଙ୍କ ଅଭିଯୋଗ, କେନ୍ଦ୍ର ନେଉଛି ତରବରିଆ ନିଷ୍ପତ୍ତି
ସୋନିଆ ଗାନ୍ଧିଙ୍କ ଅଭିଯୋଗ, କେନ୍ଦ୍ର ନେଉଛି ତରବରିଆ ନିଷ୍ପତ୍ତି
admin
5761
କରୋନା ମୁକାବିଲା ପାଇଁ କେନ୍ଦ୍ର ସରକାର ଗ୍ରହଣ କରିଥିବା ନିଷ୍ପତ୍ତିକୁ ପ୍ରଥମେ ପ୍ରଶଂସା କରିଥିବା କଂଗ୍ରେସ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧି ଏବେ ଏ ନେଇ ପ୍ରଶ୍ନ ଉଠାଇଛନ୍ତି । ଲକଡାଉନ କେନ୍ଦ୍ର ସରକାରଙ୍କ ତରବରିଆ ନିଷ୍ପତ୍ତି ବୋଲି ସୋନିଆ ଅଭିଯୋଗ କରିଛନ୍ତି । କରୋନା ସହ ଲଢ଼ିବା ନିମନ୍ତେ କେନ୍ଦ୍ର ସରକାର ଏକ ବିସ୍ତୃତ ରଣନୀତି ପ୍ରସ୍ତୁତ କରିବା ଆବଶ୍ୟକ ଥିଲା ବୋଲି ସୋନିଆ କହିଛନ୍ତି । ଗୁରୁବାର କଂଗ୍ରେସ କାର୍ଯ୍ୟକାରୀ କମିଟିର ବୈଠକ ଅନୁଷ୍ଠିତ ହୋଇଥିଲା । ଭିଡିଓ କନଫରେନ୍ସିଂ ଜରିଆରେ କଂଗ୍ରେସ ସଦସ୍ୟମାନେ ଏହି ବୈଠକରେ ସାମିଲ ହୋଇଥିଲେ । ଏହି ବୈଠକ ଶେଷରେ ସୋନିଆ ଗାନ୍ଧି ଏକ ବିବୃତ୍ତି ଜାରି କରି କହିଛନ୍ତି, ଭାରତ ସମେତ ସମ୍ପୂର୍ଣ୍ଣ ବିଶ୍ୱ ପାଇଁ କରୋନା ଏତେ ସବୁଠାରୁ ବଡ଼ ସମସ୍ୟା । ଦୃଢ଼ ଇଚ୍ଛାଶକ୍ତି ଦ୍ୱାରା ହିଁ ଏହାର ସମାଧାନ ହୋଇପାରିବ । କିନ୍ତୁ କେନ୍ଦ୍ର ସରକାର ତରବରିଆ ଭାବେ ଗ୍ରହଣ କରିଥିବା ନିଷ୍ପତ୍ତି ଯୋଗୁ ଅନେକ ସଂଖ୍ୟାରେ ପ୍ରବାସୀ ଶ୍ରମିକ ଏହା ଦ୍ୱାରା ପ୍ରଭାବିତ ହୋଇଛନ୍ତି । ଏହା ବ୍ୟତୀତ ସରକାର ଡାକ୍ତର ତଥା ସ୍ୱାସ୍ଥ୍ୟକର୍ମୀଙ୍କ ସୁରକ୍ଷା ସୁନିଶ୍ଚିତ କରିବା ଆବଶ୍ୟକ ଥିବା ପ୍ରକାଶ କରି ସୋନିଆ କହିଛନ୍ତି, ଡାକ୍ତରଖାନାରେ ମାସ୍କ ଓ ଅନ୍ୟାନ୍ୟ ସ୍ୱାସ୍ଥ୍ୟ ଉପକରଣ ଘୋର ଅଭାବ ଦେଖାଦେଇଛି । ସରକାର ଏଥିପ୍ରତି ବିଶେଷ ଧ୍ୟାନ ଦେବା ଆବଶ୍ୟକ । ଏହି ମହାମାରୀକୁ ହରାଇବା ନିମନ୍ତେ ସମସ୍ତେ ସଂକଳ୍ପବଦ୍ଧ ହେବା ଉଚିତ ।
