ବିଶ୍ୱ ତମାଖୁ ବର୍ଜନ ଦିବସ
ବିଶ୍ୱ ତମାଖୁ ବର୍ଜନ ଦିବସ
admin
4884
ବିଶ୍ୱ ସ୍ୱାସ୍ଥ୍ୟ ସଂଗଠନ ଆନୁକୂଲ୍ୟରେ ୧୯୮୭ରୁ ପ୍ରତିବର୍ଷ ମେ ୩୧ ତାରିଖରେ ପାଳନ କରାଯାଉଛି ବିଶ୍ୱ ତମାଖୁ ବର୍ଜନ ଦିବସ । ଇଂରାଜୀରେ ୱାର୍ଲଡ ନୋ ଟୁବାକୋ ଡେ । ଏହି ଦିନରେ ଚବିଶ ଘଂଟା ପର୍ଯ୍ୟନ୍ତ ପାନ, ବିଡି, ଗୁଟଖା, ଖଇନି ଆଦି କୌଣସି ପ୍ରକାରର ତମାଖୁ ସେବନ ନକରିବା ପାଇଁ ଉତ୍ସାହିତ କରାଯାଏ । ତମାଖୁର କ୍ଷତିକାରକ ଦିଗ ଗୁଡିକ ପ୍ରତି ସମସ୍ତଙ୍କର ଦୃଷ୍ଟି ଆକର୍ଷଣ ତଥା ଏ ବାବଦରେ ସଚେତନତା ସୃଷ୍ଟି, ଏହି ଦିବସ ପାଳନର ମୁଖ୍ୟ ଲକ୍ଷ୍ୟ । ପ୍ରତି ବର୍ଷ ତମାଖୁ ସେବନ କାରଣରୁ ବିଶ୍ୱରେ ପ୍ରାୟ ସତୁରୀ ଲକ୍ଷ ମଣିଷଙ୍କ ଅକାଳ ମୃତ୍ୟୁ ଘଟୁଛି । ସେମାନଙ୍କ ମଧ୍ୟରୁ ପ୍ରାୟ ନଅ ଲକ୍ଷ ତମାଖୁ ସେବନ ନକରି ସୁଦ୍ଧା ପ୍ରାଣ ହରାଉଛନ୍ତି, ଏବଂ ସେମାନଙ୍କ ଅକାଳ ମୃତ୍ୟୁ ପାଇଁ ଦାୟୀ ଅନ୍ୟର ଧୂମପାନ । ମଣିଷ ଯଦି ସମ୍ପୂର୍ଣ୍ଣ ଭାବେ ତମାଖୁ ବର୍ଜନ କରିବ ତେବେ କର୍କଟ ରୋଗୀଙ୍କ ସଂଖ୍ୟା ୩୦% ହ୍ରାସ ପାଇବ । ଗୋଟିଏ ସିଗାରେଟରେ ୪୮୦୦ ପ୍ରକାରର ରାସାୟନିକ ଥାଏ । ସେଥିରୁ ୬୯ଟି କର୍କଟ ସୃଷ୍ଟିକାରୀ । ଅତୀତରେ ମାଲର୍ବରୋ ସିଗାରେଟର ବିଜ୍ଞାପନ କରିଥିବା ତିନି ଜଣ ବ୍ୟକ୍ତି-ୱେନ ମ୍ୟାକଲରେନ, ଡେଭିଡି ମ୍ୟାକଲିନ ଏବଂ ଡିକ ହାମର ଫୁସଫୁସ କର୍କଟରେ ପ୍ରାଣ ହରାଇଥିବା ଜଣାଯାଏ ।
