ବିଶ୍ୱାସ ପ୍ରକଟ କଲା ଆଇଏମ୍ଏଫ୍
ବିଶ୍ୱାସ ପ୍ରକଟ କଲା ଆଇଏମ୍ଏଫ୍
admin
3484
ଆସନ୍ତା ବର୍ଷ ଭାରତର ଅଭିବୃଦ୍ଧି ୭% ହେବ
ସିଙ୍ଗାପୁର : ଦେଶର ଅଭିବୃଦ୍ଧି ୫% ଭଳି ନିମ୍ନ ସ୍ତରକୁ ଖସିଯାଇଥିଲେ ମଧ୍ୟ ଭାରତର ଅର୍ଥନୀତି ଉପରେ ଆନ୍ତର୍ଜାତିକ ମୁଦ୍ରାପାଣ୍ଠି (ଆଇଏମ୍ଏଫ୍) ବିଶ୍ୱାସ ପ୍ରକଟ କରିଛି । ଆସନ୍ତା ବର୍ଷ ଭାରତର ଅଭିବୃଦ୍ଧି ହାର ୭% ହେବ ବୋଲି ଏହି ଖ୍ୟାତିନାମା ଆନ୍ତର୍ଜାତିକ ସଂସ୍ଥା ଆକଳନ କରିଛି । ଚଳିତ ବର୍ଷ (୨୦୧୯-୨୦) ରେ ଭାରତର ଅଭିବୃଦ୍ଧି ୬.୧% ହେବ ବୋଲି ଆଇଏମ୍ଏଫ୍ ଜଣାଇଛି ।
ଅର୍ଥନୀତିରୁ ମାନ୍ଦାବସ୍ଥା ଦୂର କରିବା ଲାଗି ସରକାର ଘୋଷଣା କରିଥିବା ବିଭିନ୍ନ ପ୍ୟାକେଜ ଓ କର୍ପୋରେଟ ଟିକସରେ କରାଯାଇଥିବା ହ୍ରାସର ଲାଭ ଖୁବ୍ ଶୀଘ୍ର ମିଳିବ । ଏହି ସବୁ ପଦକ୍ଷେପ ପ୍ରଭାବରେ ଭାରତୀୟ ଅର୍ଥନୀତି ଆହୁରି ଦ୍ରୁତ ଗତିରେ ଆଗକୁ ବଢ଼ିବ ବୋଲି ଆଇଏମ୍ଏଫ୍ର ଡେପୁଟି ଡାଇରେକ୍ଟର ଜୋନାଥନ୍ ଓଷ୍ଟି୍ର କହିଛନ୍ତି ।
ଆର୍ଥିକ କ୍ଷେତ୍ରରେ ଯେଉଁ ଦୁର୍ବଳତା ରହିଛି ତାହାକୁ ଦୂର କରିବା ଲାଗି ଗ୍ରହଣ କରିଥିବା ପଦକ୍ଷେପର ପ୍ରଭାବ ଶୀଘ୍ର ଅନୁଭୂତ ହେବ । ତେବେ ଭାରତୀୟ ଅର୍ଥନୀତିରେ ଦେଖାଦେଇଥିବା ମାନ୍ଦାବସ୍ଥାକୁ ନେଇ ସେ ଆଶ୍ଚର୍ଯ୍ୟ ପ୍ରକଟ କରିଛନ୍ତି । ସେ କହିଛନ୍ତି, ଭାରତରେ ମାନ୍ଦାବସ୍ଥାର କୌଣସି କାରଣ ଆମେ ଖୋଜି ପାଉନୁ । ଆମେ ମଧ୍ୟ ଏହା ଜାଣି ଆଶ୍ଚର୍ଯ୍ୟ ହେଉଛି । ତେବେ ଭାରତରେ କର୍ପୋରେଟ୍ ଏବଂ ନିୟାମକ ବ୍ୟବସ୍ଥା, ଆର୍ଥିକ କ୍ଷେତ୍ରରେ ଏନପିଏ ଏବଂ ଗ୍ରାମାଞ୍ଚଳ ଅର୍ଥନୀତିରେ ସଙ୍କଟ ଭଳି ଅଲଗା ପ୍ରକାର ସମସ୍ୟା ରହିଥିବା ସେ କହିଛନ୍ତି ।
ଆଞ୍ଚଳିକ ବ୍ୟାପକ ଅର୍ଥନୈତିକ ସହଯେଗାିତା (ଆରଇସିପି) ଉପରେ ମତ ରଖି ସେ କହିଛନ୍ତି ଯେ, ଏହି ଚୁକ୍ତି ଆସନ୍ତା ମାସ ସୁଦ୍ଧା ସ୍ୱାକ୍ଷରିତ ହେବାର ସମ୍ଭାବନା ରହିଛି । ଏହି ମୁକ୍ତ ବାଣିଜ୍ୟ ରାଜିନାମାକୁ ନେଇ ଭାରତ ସତର୍କତା ଅବଲମ୍ବନ କରିଛି । ଏହି ରାଜିନାମାରେ କେବଳ ସାମଗ୍ରୀ ପାଇବାର ଉପରେ ଗୁରୁତ୍ୱ ନ ଦେଇ ସେବାକୁ ମଧ୍ୟ ସମାନ ପ୍ରାଧାନ୍ୟ ଦେବାକୁ ସେ ଆହ୍ୱାନ ଦେଇଛନ୍ତି ।
