ସରକାରୀ କ୍ୱାର୍ଟର୍ସ ପାଇଁ ନୂଆ ନୀତି, ଅବସର ନେବାର ୪ ମାସରେ ଛାଡ଼ିବାକୁ ବାଧ୍ୟ
ସରକାରୀ କ୍ୱାର୍ଟର୍ସ ପାଇଁ ନୂଆ ନୀତି, ଅବସର ନେବାର ୪ ମାସରେ ଛାଡ଼ିବାକୁ ବାଧ୍ୟ
admin
6601
ଭୁବନେଶ୍ୱର: ସରକାରୀ କର୍ମଚାରୀମାନେ ଚାକିରିରୁ ଅବସର ନେବାର ୪ ମାସ ମଧ୍ୟରେ ଏଣିକି ସରକାରୀ କ୍ୱାର୍ଟର୍ସଛାଡ଼ିବେ । ପୂର୍ବରୁ କର୍ମଚାରୀ ୮ ମାସ ସମୟ ମିଳୁଥିଲେ । ଏ ସଂକ୍ରାନ୍ତରେ ସାଧାରଣ ପ୍ରଶାସନ ବିଭାଗର ପ୍ରମୁଖ ସଚିବ ସଞ୍ଜୀବ ଚୋପ୍ରା ଏହି ମର୍ମରେ ରାଜ୍ୟ ସରକାରଙ୍କ ସମସ୍ତ ବିଭାଗ ଓ ବିଭାଗୀୟ ମୁଖ୍ୟ ଦପ୍ତରଗୁଡ଼ିକୁ ଜଣାଇ ଦେଇଛନ୍ତି । କର୍ମଚାରୀଙ୍କ ମୃତୁ୍ୟ ଘଟିବା ପରେ ସେମାନଙ୍କ ଉତ୍ତରାଧିକାରୀମାନେ ମଧ୍ୟ ଏହି ୪ ମାସ ସମୟସୀମା ମଧ୍ୟରେ ଘର ଖାଲି କରିବେ । ଏହାଛଡ଼ା ଯେଉଁମାନେ ସ୍ୱେଚ୍ଛାକୃତ ଅବସର ନେଉଛନ୍ତି କିମ୍ବା ଚାକିରିରୁ ଇସ୍ତଫା ଦେଉଛନ୍ତି ସେମାନଙ୍କ ପାଇଁ ବି ଏହି ନିୟମ ଲାଗୁ ହେବ । ଠିକଣା ସମୟରେ ସରକାରୀ କ୍ୱାର୍ଟର୍ସ ଖାଲି ନ କଲେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଆଇନାନୁଯାୟୀ କାର୍ଯ୍ୟାନୁଷ୍ଠାନ ନିଆଯିବା ସହ ପୁଲିସ ଲଗାଇ ଘରୁ ବେଦଖଲ କରାଯିବ । ଯେଉଁ କର୍ମଚାରୀମାନେ ଅବସର ଗ୍ରହଣ ପରେ ୪ ମାସ ପର୍ଯ୍ୟନ୍ତ ସରକାରୀ କ୍ୱାର୍ଟର୍ସ ରଖିବେ ସେମାନେ ଆଗତୁରା ୪ ମାସ ଲାଗି ସାଧାରଣ ହାରରେ ଭଡ଼ା (ନର୍ମାଲ ରେଣ୍ଟ) ପୈଠ କରିବେ । ଏହାଛଡ଼ା ସରକାରୀ କ୍ୱାର୍ଟର୍ସ ନିର୍ଦ୍ଧାରିତ ସମୟ ସୀମା ମଧ୍ୟରେ ଖାଲି ନ କଲେ ସେମାନଙ୍କ ଗ୍ରାଚୁଇଟିର ୫୦% ଦିଆଯିବ ନାହିଁ ବୋଲି କର୍ତ୍ତୃପକ୍ଷଙ୍କ ନିକଟରେ ଘୋଷଣା ପତ୍ର ବା ଅଣ୍ଡରଟେକିଂ ଦାଖଲ କରିବାକୁ ପଡ଼ିବ ।
