ସଙ୍ଗରୋଧରେ ଶଙ୍କରାଚାର୍ଯ୍ୟ ଓ ୧୪ ଶିଷ୍ୟ
ସଙ୍ଗରୋଧରେ ଶଙ୍କରାଚାର୍ଯ୍ୟ ଓ ୧୪ ଶିଷ୍ୟ
admin
4381
ପୁରୀ: ବାହାର ରାଜ୍ୟରୁ ଫେରିବା ପରେ ଜଗତଗୁରୁ ଶଙ୍କରାଚାର୍ଯ୍ୟ ଏବଂ ତାଙ୍କ ସାଙ୍ଗରେ ଥିବା ୧୪ ଜଣ ଶିଷ୍ୟ ଓ ପରିବାର କ୍ୱାରେଣ୍ଟିନରେ ରହିଛନ୍ତି । ଗୋବର୍ଦ୍ଧନ ମଠ ପରିସରରେ ଜଗତଗୁରୁଙ୍କ ସହ ଅନ୍ୟମାନେ ଏହି ସଙ୍ଗରୋଧରେ ରହିଛନ୍ତି । ଜଗତଗୁରୁ ଶଙ୍କରାଚାର୍ଯ୍ୟଙ୍କ ସହ ଅନ୍ୟମାନେ ସୁସ୍ଥ ଥିବା ଗୋବର୍ଦ୍ଧନ ମଠ ମୁଖପାତ୍ର ମନୋଜ କୁମାର ରଥ କହିଛନ୍ତି ।
ଶ୍ରୀ ରଥଙ୍କ ସୂଚନା ମୁତାବକ, ଜଗତଗୁରୁ ସ୍ୱାମୀ ନିଶ୍ଚଳାନନ୍ଦ ସରସ୍ୱତୀ ମହାରାଜ ମାସେ ହେବ ବାହାର ରାଜ୍ୟର ବିଭିନ୍ନ ଧାର୍ମିକ କାର୍ଯ୍ୟରେ ଯୋଗଦେବାକୁ ଯାଇଥିଲେ । ପ୍ରଥମେ ବିହାର, ପରେ ଉତ୍ତରପ୍ରଦେଶ ବିଭିନ୍ନ ଧାର୍ମିକ କାର୍ଯ୍ୟରେ ଯୋଗ ଦେଇଥିଲେ । ଶେଷରେ ନୋଏଡାରେ ଏକ ଧାର୍ମିକ କାର୍ଯ୍ୟରେ ଯୋଗ ଦେଇ ଦିଲ୍ଲୀ ଫେରିବା ପରେ ସେଠାରୁ ବିମାନ ଯୋଗେ ସଂଧ୍ୟାରେ ଭୁବନେଶ୍ୱର ବିମାନ ବନ୍ଦରଠାରେ ପହଞ୍ଚିଥିଲେ । ପରେ ସଂଧ୍ୟାରେ ପୁରୀ ସ୍ଥିତ ଗୋବର୍ଦ୍ଧନ ମଠରେ ପହଞ୍ଚିଥିଲେ । ତଥାପି ସଂକ୍ରମଣ ଆଶଙ୍କା ରହିଥିବାରୁ ଜଗତଗୁରୁ ଶଙ୍କରାଚାର୍ଯ୍ୟ ଓ ଶିଷ୍ୟମାନଙ୍କ ସହ ଗୋବର୍ଦ୍ଧନ ମଠରେ କ୍ୱାରାଣ୍ଟିନରେ ରହିଛନ୍ତି । ଅନ୍ୟପଟେ ଦୈନିକ ଶଙ୍କରାଚାର୍ଯ୍ୟଙ୍କ ଦର୍ଶନ ପାଇଁ ଆସୁଥିବା ଭକ୍ତଙ୍କ ଗୋବର୍ଦ୍ଧନ ପୀଠ ମନା ହୋଇଛି । ଦର୍ଶନ ବନ୍ଦ କରାଯାଇଛି । ‘କରୋନା’ ଭୂତାଣୁର ସଂକ୍ରମଣକୁ ଆଖି ଆଗରେ ରଖି ଏହି ପଦକ୍ଷେପ ନିଆଯାଇଛି ବୋଲି ମୁଖପାତ୍ର ଶ୍ରୀ ରଥ କହିଛନ୍ତି ।
