ବୋଲେରୋ ଧକ୍କାରେ ବୃଦ୍ଧା ମୃତ,କ୍ଷତିପୁରଣ ଓ ଫ୍ଲାଏ ଓଭର ବ୍ରିଜ ନିର୍ମାଣ ଦାବୀରେ ଜାତୀୟ ରାଜପଥ ଅବରୋଧ
ବୋଲେରୋ ଧକ୍କାରେ ବୃଦ୍ଧା ମୃତ,କ୍ଷତିପୁରଣ ଓ ଫ୍ଲାଏ ଓଭର ବ୍ରିଜ ନିର୍ମାଣ ଦାବୀରେ ଜାତୀୟ ରାଜପଥ ଅବରୋଧ
admin
5294
ବାରିପଦା (ଦିଲ୍ଲୀପ ମହାନ୍ତି) - ମୟୂରଭଞ୍ଜ ଜିଲ୍ଲାର ସଦର ମହକୁମା ବାରିପଦା ମଧ୍ୟ ଦେଇ ଯାଇଥିବା ୧୮ ନମ୍ବର ଜାତୀୟ ରାଜପଥର ବାଇଗଣବାଡିଆ ଛକ ନିକଟରେ ଆଜି ପୂର୍ବାହ୍ନ ପ୍ରାୟ ୧୧ ଟା ବେଳେ ଘଟିଯାଇଛି ଏକ ମର୍ମଦୁନ୍ତ ସଡକ ଦୂର୍ଘଟଣା । ବାଇଗଣ ବାଡିଆ ନିକଟସ୍ଥ ଚାଉଳଘେରି ଗ୍ରାମର ୫୫ ବର୍ଷୀୟ ବୃଦ୍ଧା ସୁନି ସିଂ ବାର୍ଦ୍ଧକ୍ୟ ଭତ୍ତା ନେବାକୁ ଆସିବା ବାଟରେ ରାଜପଥ ଅତିକ୍ରମ କରୁଥିବା ସମୟରେ ଏକ ଦୃତଗାମୀ ବଲେରୋ ଗାଡ଼ି ତାଙ୍କୁ ଧକ୍କା ଦେବାରୁ ଘଟଣା ସ୍ଥଳରେ ବୃଦ୍ଧାଙ୍କର ମୃତ୍ୟୁ ହୋଇଥିଲା । ଦୁର୍ଘଟଣା ଘଟାଇବା ପରେ ବୋଲେରୋଟି ଘଟଣା ସ୍ଥଳରୁ ଫେରାର ହୋଇଯାଇଥିଲା । ତେବେ ଏହି ଘଟଣାକୁ ନେଇ ସ୍ଥାନୀୟ ଜନସାଧାରଣଙ୍କ ମଧ୍ୟରେ ଉତ୍ତେଜନା ଦେଖା ଦେଇଥିଲା ଏବଂ ଉତ୍ୟକ୍ତ ଜନସାଧାରଣ ମୃତ ସୁନି ସିଂଙ୍କ ପରିବାର ବର୍ଗଙ୍କୁ ଉପଯୁକ୍ତ କ୍ଷତିପୁରଣ ପ୍ରଦାନ ସହିତ ଏଠାରେ ଏକ ଫ୍ଲାଇ ଓଭର ବ୍ରିଜ ନିର୍ମାଣ ଦାବୀ କରି ଲୋକେ ଜାତୀୟ ରାଜପଥକୁ ଅବରୋଧ କରି ଧାରଣାରେ ବସିଥିଲେ । ଫଳରେ ରାସ୍ତାର ଉଭୟ ପାଶ୍ୱର୍ରେ ଶହ ଶହ ଗାଡ଼ିମୋଟର ଅଟକି ରହିଥିଲା । ଖବର ପାଇ ଘଟଣା ସ୍ଥଳରେ ଅତିରିକ୍ତ ଆରକ୍ଷୀ ଅଧିକ୍ଷକ ଅଭିମନୁ୍ୟ ନାୟକ, ବାରିପଦା ଏସଡିପିଓ କେ.କେ. ହରିପ୍ରସାଦ ପ୍ରମୁଖ ପହଁଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରାଇ ରେଡକ୍ରସରୁ ନଗଦ ୧୦ହଜାର ଟଙ୍କା , ପରବର୍ତ୍ତି ସମୟରେ ୧୦ ହଜାର ଟଙ୍କାର ଚେକ ପ୍ରଦାନ କରିବାର ପ୍ରତିଶ୍ରୁତି ଦେଇଥିଲେ । ସେହିପରି ଶବ ବ୍ୟବଚ୍ଛେଦ ପରେ ପରେ ନିୟମ ଅନୁ୍ସାରେ ୨ଲକ୍ଷ ଟଙ୍କା ଯୋଗାଇ ଦେବା ସହ ଏନ.ଏଚ. ବିଭାଗକୁ ଲୋକଙ୍କ ଦାବୀ ବିଷୟରେ ଅବଗତ କରାଯିବାର ପ୍ରତିଶୃତି ଦେବା ପରେ ରାସ୍ତା ଅବରୋଧ ହଟିଥିଲା । ପ୍ରକାଶ ଥାଉକି ଗତ ୬ ମାସ ତଳେ ମଧ୍ୟ ଏଠାରେ ଜଣଙ୍କର ଦୁର୍ଘଟଣାରେ ମୃତ୍ୟୁ ଘଟିଥିଲା ସେତେବେଳେ ମଧ୍ୟ ଫ୍ଲାଇ ଓଭର ନିର୍ମାଣ ପାଇଁ କର୍ତ୍ତୃପକ୍ଷ ପ୍ରତିଶୃତି ଦେଇଥିଲେ ।
