ପୁଡୁଚେରୀରେ ସଂଖ୍ୟାଗରିଷ୍ଠତା ହରାଇଲେ ସରକାର

Feb 17, 2021 - 11:00 Updated: Feb 17, 2021 - 11:00

4284

ନୂଆଦିଲ୍ଲୀ: ପୁଡୁଚେରୀରେ ଆସନ୍ତା ମେ’ ମାସରେ ବିଧାନସଭା ନିର୍ବାଚନ ହେବାର ଥିଲା ବେଳେ ଏହା ପୂର୍ବରୁ ସେଠାରେ ରାଜନୈତିକ ସଙ୍କଟ ଦେଖାଦେଇଛି । କ୍ଷମତାରେ ଥିବା କଂଗ୍ରେସ ମେଣ୍ଟର ଚାରି ଜଣ ବିଧାୟକ ସପ୍ତାହକ ଭିତରେ ଇସ୍ତଫା ଦେବା ପରେ କଂଗ୍ରେସ ସରକାର ଏବେ ବିଧାନସଭା ସଂଖ୍ୟାଗରିଷ୍ଠତା ହରାଇଛନ୍ତି । ବିଧାନସଭାରେ ସମୁଦାୟ ୩୦ ଜଣ ନିର୍ବାଚିତ ସଦସ୍ୟ ଥାଆନ୍ତି । ଆଉ ତିନି ଜଣଙ୍କୁ ଉପରାଜ୍ୟପାଳ ମନୋନୀତ କରିଥାନ୍ତି । ଗତ ବିଧାନସଭା ନିର୍ବାଚନରେ କଂଗ୍ରେସକୁ ୧୫ଟି ଆସନ ଏବଂ ଏହାର ସହଯୋଗୀ ଡିଏମକେକୁ ତିନିଟି ଆସନ ମିଳିଥିଲା । ଜଣେ ସ୍ୱାଧୀନ ବିଧାୟକ ବି କଂଗ୍ରେସ ସାଥ ଦେଇଥିଲା । ଅନ୍ୟପଟରେ ବିରୋଧୀ ଦଳ ଏନଆର କଂଗ୍ରେସକୁ ୭ ଓ ଏହାର ସହଯୋଗୀ ଏଆଇଏଡିଏମକେକୁ ୪ଟି ଆସନ ମିଳିଥିଲା । ଉପରାଜ୍ୟପାଳ ବିଜେପିର ୩ ଜଣଙ୍କୁ ମନୋନୀତ କରିଥିଲେ । ଗତବର୍ଷ କଂଗ୍ରେସ ମେଣ୍ଟର ଜଣେ ବିଧାୟକଙ୍କ ସଦସ୍ୟତା ରଦ୍ଧ କରାଯାଇଥିଲା । ଏବେ କଂଗ୍ରେସର ୪ ଜଣ ବିଧାୟକ ବିଧାନସଭାରୁ ଇସ୍ତଫା ଦେଇଛନ୍ତି । ସେମାନଙ୍କ ଭିତରୁ ଦୁଇ ଜଣ ବିଜେପିରେ ଯୋଗ ଦେଇ ସାରିଥିବା ବେଳେ ଆଉ ଦୁଇ ଜଣ ବି ସମାନ ପଦକ୍ଷେପ ନେଇପାରନ୍ତି ବୋଲି କୁହାଯାଉଛି ।