ନୂଆ ବର୍ଷରେ ନବୀନଙ୍କ ମଦ ଉପହାର, ଆଜି ରାତି ୧ଟା ଯାଏ ଖୋଲା ରହିବ ବାର୍
ନୂଆ ବର୍ଷରେ ନବୀନଙ୍କ ମଦ ଉପହାର, ଆଜି ରାତି ୧ଟା ଯାଏ ଖୋଲା ରହିବ ବାର୍
admin
6409
ଭୁବନେଶ୍ୱର - ଜିରୋ ନାଇଟ ସେଲିବ୍ରେସନ୍ ପାଇଁ ରାତି ୧ଟା ପର୍ଯ୍ୟନ୍ତ ଖୋଲା ରହିବ ବାର୍ ଓ ଠିପି ଖୋଲା ମଦ ଦୋକାନ । ଭୁବନେଶ୍ୱର, କଟକ ଓ ପୁରୀରେ ଏହା କାର୍ଯ୍ୟକାରୀ ହେବ । ସୋମବାର ଅବକାରୀ ବିଭାଗର ଅତିରିକ୍ତ ସଚିବ ଅବକାରୀ ବିଭାଗର କମିସନରଙ୍କୁ ଏଭଳି ଚିଠି ଦେଇଛନ୍ତି । ଅତିରିକ୍ତ ସଚିବଙ୍କ ଏଭଳି ଚିଠି ପରେ ଆଉ ଏକ ଘଣ୍ଟା ବାର ଓ ଠିପି ଖୋଲା ମଦ ଦୋକାନ ଖୋଲା ରଖିବାକୁ ମହଲତ ମିଳି ପାରିବ । ଚଳିତ ବର୍ଷ ପ୍ରଥମ ଥର ଲାଗି ରାଜ୍ୟ ସରକାର ଏଭଳି ନିଷ୍ପତ୍ତି ନେଇଛନ୍ତି । ସରକାରଙ୍କ ଏଭଳି ନିଷ୍ପତ୍ତିକୁ ବାର୍ ମାଲିକମାନେ ସ୍ୱାଗତ କରିଥିବାବେଳେ ବୁଦ୍ଧିଜୀବୀମାନେ କିନ୍ତୁ ଏହାକୁ ନେଇ ଅସନ୍ତୋଷ ପ୍ରକଟ କରିଛନ୍ତି ।
ପ୍ରକାଶ ଥାଉ କି, ଗତ ବର୍ଷ ହକି ବିଶ୍ୱକପ ସମୟରେ ଦେଢ଼ ମାସ ଲାଗି ରାତି ୧ଟା ପର୍ଯ୍ୟନ୍ତ ବାର ଓ ଠିପି ଖୋଲା ମଦ ଦୋକାନ ଖୋଲିବାକୁ ନିର୍ଦେଶ ଦେଇଥିଲେ ରାଜ୍ୟ ସରକାର । ଏହାପରେ ପୁଣି ପୂର୍ବ ସମୟ ଅନୁଯାୟୀ ବାର୍ ଖୋଲା ଯାଇଥିଲା । ତେବେ ଆଜି ଜିରୋ ନାଇଟ ସେଲିବ୍ରେସନ ପାଇଁ ରାତି ୧୨ଟା ବଦଳରେ ୧ଟା ପର୍ଯ୍ୟନ୍ତ ଖୋଲିବାକୁ ଚିଠି ହୋଇଛି । ଏ ସମ୍ପର୍କରେ ବାର ଓ ରେସ୍ତୋରାଁ ଆସୋସିଏସନର ସମ୍ପାଦକ ସତ୍ୟ ମହାନ୍ତି କହିଛନ୍ତି, ରାଜ୍ୟ ସରକାରଙ୍କ ଏଭଳି ନିର୍ଦେଶକୁ ଆମେ ସ୍ୱାଗତ କରୁଛୁ । ଏଥିରେ କୌଣସି ସମସ୍ୟା ନାହିଁ । ଏହା ଦ୍ୱାରା ଯୁବ ପିଢ଼ିମାନେ ନୂ୍ଆବର୍ଷକୁ ଭଲ ଭାବେ ଉପଭୋଗ କରି ପାରିବେ । ମୁମ୍ବାଇରେ ସକାଳ ୬ଟା ଓ କୋଲକାତାରେ ରାତି ୪ଟା ପର୍ଯ୍ୟନ୍ତ ବାର୍ଗୁଡିକ ଖୋଲା ରଖିବାକୁ ସେଠାକାର ସରକାର ଅନୁମତି ପ୍ରଦାନ କରିଛନ୍ତି ।
ଅନ୍ୟପକ୍ଷରେ ପୁଲିସ ପକ୍ଷରୁ କୁହାଯାଇଛି ଯେଉଁମାନେ ବିଳମ୍ବିତ ରାତି ପର୍ଯ୍ୟନ୍ତ ମଦ୍ୟପାନ କରି ଗାଡ଼ି ଚଳାଇବେ ସେମାନଙ୍କ ବିରୋଧରେ ଆଇନ୍ଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଚାଳକମାନଙ୍କଠାରୁ ଜରିମାନା ଆଦାୟ କରାଯିବା ସହିତ ଆବଶ୍ୟକ ପଡ଼ିଲେ ବାଇକ୍ ଓ ଡ୍ରାଇଭିଂ ଲାଇସେନ୍ସ ଜବତ କରାଯିବ ।
