କରୋନା ସଂକ୍ରମିତଙ୍କ ଦେହରେ ଦେଖିବାକୁ ମିଳୁନି ବାହ୍ୟ ଲକ୍ଷଣ
କରୋନା ସଂକ୍ରମିତଙ୍କ ଦେହରେ ଦେଖିବାକୁ ମିଳୁନି ବାହ୍ୟ ଲକ୍ଷଣ
admin
5228
ଯାଜପୁର: କରୋନା ଭୂତାଣୁ ସଂକ୍ରମିତଙ୍କ କେତେକ ଲକ୍ଷଣ ସମ୍ପର୍କରେ ସରକାର ପୂର୍ବରୁ ସତର୍କ କରାଇଛନ୍ତି । ମାତ୍ର ଜିଲ୍ଲାରେ ଏ ପର୍ଯ୍ୟନ୍ତ ଚିହ୍ନଟ ୧୯ ଜଣ କରୋନା ସଂକ୍ରମିତଙ୍କ ଦେହରେ ବାହ୍ୟ ଲକ୍ଷଣ କିଛି ଦେଖିବାକୁ ମିଳିନଥିଲା । ମାତ୍ର ସ୍ୱାବ ଟେଷ୍ଟ ପରେ ସେମାନେ କରୋନା ଆକ୍ରାନ୍ତ ବୋଲି ଜଣାପଡ଼ିଛନ୍ତି । ସ୍ୱାସ୍ଥ୍ୟ ବିଭାଗ ସୂଚନା ଦେଇଛି କରୋନା ଭୂତାଣୁ ସଂକ୍ରମଣ ୧୪ ଦିନ ପର୍ଯ୍ୟନ୍ତ ଶରୀରରେ ସକ୍ରିୟ ରହିଥାଏ । ଏଥିପାଇଁ ସଙ୍ଗରୋଧ ଅବଧି କାଳ ୧୪ ଦିନ ରଖାଯାଇଛି । ମାତ୍ର ଏହାକୁ ଭୁଲ ବୋଲି ପ୍ରମାଣିତ କରିଛି ଯାଜପୁର ବ୍ଲକ ଅନ୍ତର୍ଗତ ବାସୁଦେବପୁରରୁ ଚିହ୍ନଟ ୧୯ ନମ୍ବର କରୋନା ସଂକ୍ରମିତ । କରୋନା ସଂକ୍ରମିତ ଚିହ୍ନଟ ହେବା ପରେ ସ୍ୱାସ୍ଥ୍ୟ ବିଭାଗର ଅକଲ ଗୁଡୁମ ହୋଇଯାଇଛି । ସୋମବାର ଅପରାହ୍ନରେ ଯାଜପୁର ବ୍ଲକର ବାସୁଦେବପୁର ଗ୍ରାମରେ ଆଉ ଜଣେ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହା କରୋନା ସଂକ୍ରମିତ ବି କୋଲକତା ଫେରନ୍ତା । ସ୍ୱାସ୍ଥ୍ୟ ବିଭାଗ ଜାରି କରିଥିବା ମାର୍ଗଦର୍ଶିକାରେ ଉଲ୍ଲେଖ ଅଛି ଯେ କରୋନା ସଂକ୍ରମିତ ୧୪ ଦିନ ସଙ୍ଗରୋଧ ଅବସ୍ଥାନ ପରେ ବିପଦମୁକ୍ତ ହୋଇପାରିବେ । ବାସୁଦେବପୁର ପଞ୍ଚାୟତର ସଂକ୍ରମିତଙ୍କ ଗସ୍ତ ଇତିହାସକୁ ଅନୁଶୀଳନ କରିବା ପରେ ଜଣାପଡ଼ିଛି, ଜିଲ୍ଲାର ୧୯ ତମ ଚିହ୍ନଟ ସଂକ୍ରମିତ ମାର୍ଚ୍ଚ ୨୨ ତାରିଖରେ କୋଲକତାରୁ ଗାଁକୁ ଫେରିଥିଲେ । ସେବେଠୁ ନିଜ ଘରେ ସଙ୍ଗରୋଧ ଅବସ୍ଥାନ କରିଛନ୍ତି । ମାତ୍ର ଚଳିତ ମାସ ୨୪ ତାରିଖରେ ୧୯ତମ ଆକ୍ରାନ୍ତଙ୍କ ସ୍ୱାବ ଟେଷ୍ଟ କରିବା ପରେ ଜଣାପଡ଼ିଲା, ସମ୍ପୃକ୍ତ ବ୍ୟକ୍ତି ବି କରୋନା ସଂକ୍ରମିତ । ଅତଏବ ୩୨ ଦିନ ପରେ ମଧ୍ୟ କରୋନା ଭୂତାଣୁ ଆକ୍ରାନ୍ତଙ୍କ ଶରୀରରେ ସକ୍ରିୟ ହୋଇ ରହୁଛି ଓ କରୋନା ସଂକ୍ରମଣର କୌଣସି ଲକ୍ଷଣ ଆକ୍ରାନ୍ତଙ୍କ ଠାରେ ଦେଖିବାକୁ ମିଳୁନାହିଁ । ଏହା ହିଁ କରୋନା ଭୂତାଣୁ ଗବେଷକ ତଥା ସ୍ୱାସ୍ଥ୍ୟ ବିଭାଗ ପାଇଁ ଚିନ୍ତାର କାରଣ ସାଜିଛି ।
