ଅର୍ଡର ବାଣ ଆଣିବା ପାଇଁ ଯାଇଥିବା ବେଳେ ବାଣ ବିସ୍ଫୋରଣ, ୨ ମୃତ, ଜଣେ ଆହତ
Arpit Pattnaik
ପୁରୀ ସଦରଥାନା ଅନ୍ତର୍ଗତ ବାଟଗାଁ ରାଉତ ସାହିରେ ବାଣ ବିସ୍ପୋରଣ ଘଟଣାରେ ୨ ମୃତ, ଜଣେ ଆହତ ଗୁରୁତର ଆହତ । ମୃତକ ହେଉଛନ୍ତି ସଞ୍ଜୟ ଜେନା ଓ ଲିପା ରାଉତ କ୍ଷ ମ ଆହତଙ୍କ ନାମ ହେଉଛି ଗୁଲା ରାଉତ । ଗୁରୁବାର ସଂଧ୍ୟାରେ କଟକ ବଡ ମେଡିକାଲ ନେବା ବାଟରେ ସଂଜୟଙ୍କର ମୃତ୍ୟୁ ହୋଇଥିବା ବେଳେ , ଶୁକ୍ରବାର ଅପରାହ୍ନରେ ଲିପାଙ୍କକର ଚିକିତ୍ସାଧୀନ ଅବସ୍ଥାରେ ବଡ ମେଡିକାଲରେ ମୃତ୍ୟୁ ହୋଇଛି । ସୂଚନା ଅନୁଯାୟୀ ପୁରୀ ଜିଲ୍ଲା ସଦର ଥାନା ଅଂଚଳର ବାଟଗାଁ ରାଉତ ସାହିରେ ଗୁରୁବାର ସଂଧ୍ୟାରେ ଭୟଙ୍କର ବାଣ ବିସ୍ଫୋରଣ ହୋଇଥିଲା । ଲିପା ରାଉତ ଓ ଗୁଲା ରାଉତ ନିଜ ଘରେ ବାଣ ତିଆରି କରିବା ସହ ବିକ୍ରି କରନ୍ତି । ସଂଧ୍ୟାରେ ସଂଜୟ ଜେନା ନାମକ ଜଣେ ଗ୍ରାହକ ଅର୍ଡର କରିଥିବା ବାଣ ନେବା ପାଇଁ ଆସିଥିଲେ । ଏହି ସମୟରେ ୩ ଜଣ ଘରେ ଥିବା ବେଳେ ହଟାତ୍ ବାଣ ବିସ୍ପୋରଣ ହୋଇଥିଲା । ଏଥିରେ ସଂଜୟ ଓ ଲିପାଙ୍କ ଶରୀରର ୮୦ ଭାଗ ପୋଡି ଯାଇଥିବା ବେଳେ ଗୁଲାଙ୍କର ପ୍ରାୟ ୫୦ ପ୍ରତିଶତ ବି ପୋଡି ଯାଇଥିଲା । ସମସ୍ତଙ୍କୁ ପୁରୀ ମେଡିକାଲ ସ୍ଥାନାନ୍ତର କରାଯାଇଥିଲେ ବି ଏଠାରେ ବର୍ନ ୟୁନିଟ୍ ନ ଥିବାରୁ ପ୍ରାଥମିକ ଚିକିତ୍ସା କରାଯାଇ କଟକ ବଡ ମେଡିକାଲ ପଠାଇ ଦେଇଥିଲା । ତେବେ ରାସ୍ତାରେ ଯିବା ବାଟରେ ସଂଜୟଙ୍କର ମୃତ୍ୟୁ ହୋଇଯାଇଥିଲା । ସେହିପରି ଚିକିତ୍ସାଧୀନ ଅବସ୍ଥାରେ ଶୁକ୍ରବାର ଲିପାଙ୍କର ମୃତ୍ୟୁ ହୋଇଛି । ଏହି ଘଟଣା ପରେ ବାଟଗାଁରେ ଶୋକର ଛାୟା ଖେଳି ଯାଇଛି । ବାଣ ତିଆରି ପାଇଁ ସେମାନଙ୍କ ପାଖରେ ଲାଇସେନ୍ସ ଅଛି କି ନାହିଁ ସେ ନେଇ ଘଟଣାସ୍ଥଳରେ ସଦର ଥାନା ପୋଲିସ ଓ ସିଟି ଡିଏସପି ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି ।
