ଶାନ୍ତି ବାର୍ତ୍ତା ଲାଗି ମୋଦୀଙ୍କୁ ୟୁକ୍ରେନ୍ର ଅନୁରୋଧ
user2
ନୂଆଦିଲ୍ଲୀ : ଭାରତକୁ ସହାୟତା ମାଗିଛି ଯୁଦ୍ଧରେ ବିଶେଷ ପ୍ରଭାବିତ ହୋଇଥିବା ୟୁକ୍ରେନ। ଗତ ମାସରେ ଜାପାନରେ ଅନୁଷ୍ଠିତ ଜି-୭ ବୈଠକରେ ପିଏମ୍ ମୋଦିଙ୍କୁ ଭେଟି ଦୀର୍ଘ ସମୟ ଧରି ଆଲୋଚନା କରିଥିଲେ ୟୁକ୍ରେନ ରାଷ୍ଟ୍ରପତି ଭୋଲଦିମିର ଜେଲେଂସ୍କି । ଏହା ପରେ ୟୁକ୍ରେନର ଆଶାର କିରଣ ଅଧିକ ବଢିଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକମାତ୍ର ବ୍ୟକ୍ତି ଯିଏ କି ୟୁକ୍ରେନ ଓ ଋଷ ମଧ୍ୟରେ ଲାଗି ରହିଥିବା ଯୁଦ୍ଧର ଅନ୍ତ ଘଟାଇ ପାରିବେ। ପିଏମ୍ ମୋଦି ହିଁ ଦୁଇ ଦେଶ ମଧ୍ୟରେ ଶାନ୍ତି ପ୍ରତିଷ୍ଠା କରିପାରିବେ ବୋଲି ୟୁକ୍ରେନ୍ ପକ୍ଷରୁ କୁହାଯାଇଛି।
ଏହି କ୍ରମରେ ବୁଧବାର ପୁଣି ଫୋନ ଯୋଗେ କଥା ହୋଇଛନ୍ତି ୟୁକ୍ରେନ ଓ ଭାରତର ଦୁଇ ଅଧିକାରୀ । ଜେଲେଂସ୍କିଙ୍କ ଘନିଷ୍ଠ ସହଯୋଗୀ ଏଣ୍ଡ୍ରି ୟରମକ୍, ଭାରତର ରାଷ୍ଟ୍ରୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଭଙ୍କ ସହ ଫୋନ ଯୋଗେ କଥା ହୋଇଛନ୍ତି । ଶାନ୍ତି ବାର୍ତ୍ତାରେ ମଧ୍ୟସ୍ତତା କରିବାକୁ ଭାରତକୁ ଅପିଲ କରିଛି ୟୁକ୍ରେନ୍ ।
ଅଜିତ ଡୋଭାଲ ଓ ଏଣ୍ଡ୍ରି ୟରମକ୍ ମଧ୍ୟରେ ଶାନ୍ତି ପ୍ରତିଷ୍ଠା ନେଇ ଚର୍ଚ୍ଚା ହୋଇଥିବା ବେଳେ ଜୁଲାଇ ମାସରେ ହେବାକୁ ଥିବା ବିଶ୍ବ ଶାନ୍ତି ଶିଖର ସମ୍ମୀଳନୀକୁ ନେଇ ଆଲୋଚନା ହୋଇଛି । ୟୁକ୍ରେନ ଚାହୁଁଛି କି, ପିଏମ୍ ମୋଦି ମଧ୍ୟ ଏହି ବୈଠକରେ ଉପସ୍ଥିତ ରୁହନ୍ତୁ । ରାଷ୍ଟ୍ରପତି ଭୋଲଦିମିର ଜେଲେଂସ୍କି ଶାନ୍ତି ଯୋଜନା ପାଇଁ ପ୍ରଧାନମନ୍ତ୍ରୀ ମୋଦିଙ୍କ ସମର୍ଥନ ମାଗିଛନ୍ତି । ମୋଦିଙ୍କ ହସ୍ତକ୍ଷେପ ପରେ ୟୁକ୍ରେନ ଓ ଋଷ ମଧ୍ୟରେ ଶାନ୍ତି ପ୍ରତିଷ୍ଠା ହେବାର ଯଥେଷ୍ଟ ସମ୍ଭାବନା ରହିଛି ।
ମେ’ରେ ଗୋଆରେ ହୋଇଥିବା ଜି-୨୦ ବୈଠକରେ ମଧ୍ୟ ଅନେକ ଦେଶର ବିଦେଶ ମନ୍ତ୍ରୀ ଭାଗ ନେଇଥିଲେ । ସେତେବେଳେ ମଧ୍ୟ ଶାନ୍ତି ପ୍ରତିଷ୍ଠା ପାଇଁ ଆଲୋଚନା ହୋଇଥିଲା । ଗତ ବର୍ଷ ମଧ୍ୟ ପିଏମ୍ ମୋଦି ଓ ଜେଲେଂସ୍କି ମଧ୍ୟରେ ଫୋନ ଯୋଗେ ଆଲୋଚନା ହୋଇଥିଲା । ସେତେବେଳେ ଭାରତ କହିଥିଲା କି, କୂଟନୀତି ଓ ଆଲୋଚନା ମାଧ୍ୟମରେ ବିବାଦର ଅନ୍ତ ଘଟିପାରିବ ।
