ଭୁବନେଶ୍ୱର: କୁଆଖାଇ ନଦୀରେ ଏକ ଅଭାବନୀୟ ଘଟଣା ଘଟିଛି । କୁଆକାଇରେ ବୁଡ଼ି ଦୁଇ ଯୁବ ଇଞ୍ଜିନିୟରଙ୍କ ମୃତ୍ୟୁ ଘଟିଛି । ସତ୍ୟଭାମାପୁର ଇନ୍ଦ୍ରପାଳସ୍ଥିତ କୁଆଖାଇ ଘାଟରେ ଏହି ହୃଦୟ ବିଦାରକ ଘଟଣା ଘଟିଛି । ମୃତକ ମାନେ ହେଲେ ତମାଣ୍ଡୋ ଥାନା ଅଞ୍ଚଳରେ ରହୁଥିବା ସ୍ମୃତି ସୌରଭ ପ୍ରଧାନ ଓ ଅନୁଗୁଳ ଜିଲ୍ଲା ରେଙ୍ଗାଲି ଥାନା ଅଞ୍ଚଳର ସତ୍ୟଜିତ ଦାସ ସୌଭାଗ୍ୟକୁ ଏହି ଅଘଟଣରୁ ଅନ୍ୟଦୁଇ ଇଞ୍ଜିନିୟର ସୌମ୍ୟରଞ୍ଜନ ଲେଙ୍କା ଓ ରୁଦ୍ର ନାରାୟଣ ଭୂୟାଁ ବଞ୍ଚିଯାଉଛନ୍ତି । ଅଗ୍ନିଶମ ବାହିନୀ ମୃତଦେହ ଦ୍ୱୟକୁ ଗଭୀର ଜଳରୁ ଉଦ୍ଧାର କରି ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ପଠାଯାଇଛି ।
ସୂଚନାନୁସାରେ ଚାରି ବନ୍ଧୁ ଏକାଠି ନଦୀପଠାରେ ପହଞ୍ଚି ଗାଧୋଇବାକୁ ପାଣିରେ ପଶିଥିଲେ । ସତ୍ୟଜିତ ଗଭୀର ଜଳକୁ ଖସି ଯାଇ ଭାସିଯାଉଥିବା ବେଳେ ସ୍ମୃତି ତାଙ୍କୁ ଉଦ୍ଧାର କରିବାକୁ ଚେଷ୍ଟା କରିଥିଲେ କିନ୍ତୁ ସ୍ମୃତି ମଧ୍ୟ ଗଭୀର ଜଳର ପ୍ରଖରରେ ଭାସି ଯାଇଥିଲେ । ସେମାନେ ବୁଡ଼ିଯିବାର ଦେଖି ଅନ୍ୟ ଦୁଇଜଣ ସାଙ୍କ ସୌମ୍ୟ ଓ ରୁଦ୍ର ସେମାନଙ୍କୁ ଉଦ୍ଧାର କରିବାକୁ ହାତ ବଢ଼ାଇଥିଲେ । ଉଦ୍ଧାର କରିବାରେ ଅସଫଳ ହେବାରୁ ସେମାନେ ସ୍ଥାନୀୟ ଲୋକଙ୍କୁ ଡ଼ାକିଥିଲେ । ବହୁ ଖୋଜାଖୋଜି ପରେ ସେମାନେ ଅଗ୍ନିଶମ ବିଭାଗକୁ ଖବର ଦେଇଥିଲେ । ଏହାପରେ ଅଗ୍ନିଶମ କର୍ମଚାରୀ ପହଞ୍ଚି ସେମାନଙ୍କୁ ଉଦ୍ଧାର କରି ବଞ୍ଚିଥିବା ଆଶାରେ ହସ୍ପିଟାଲକୁ ପଠାଇଥିଲେ, ମାତ୍ର ହସ୍ପିଟାଲରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ ।
admin
