ଶାଳକକୁ ବୋତଲରେ ଭୁସି ଭିଣୋଇ ଗିରଫ

Dec 7, 2020 - 12:22 Updated: Dec 7, 2020 - 12:22

5815

ଭୁବନେଶ୍ୱର: ଶାଳକକୁ ବିଅର ବୋତଲରେ ଭୁସି ଗୁରୁତର କରି ପକାଇବା ଅଭିଯୋଗରେ ଖଣ୍ଡଗିରି ଥାନା ପୁଲିସ ଭିଣୋଇକୁ ଗିରଫ କରିଛି । ଗିରଫ ବ୍ୟକ୍ତିଙ୍କ ନାମ କାଳୁ ବାରିକ (୩୩) । ଘର ପାତ୍ରପଡ଼ା ଫୁଲେଶ୍ୱର ବସ୍ତି । ପୁଲିସ ସୂଚନା ଅନୁଯାୟୀ, କାଳୁ ସବୁବେଳେ ତାଙ୍କ ପତ୍ନୀଙ୍କୁ ମାରଧର କରୁଥିଲେ । ଗତକାଲି ମଧ୍ୟ ସେ ପତ୍ନୀଙ୍କୁ ଆକ୍ରମଣ କରିଥିଲେ । ଖବର ପାଇ ଶାଳକ ଧୀରେନ୍ଦ୍ର ବାରିକ ପହଞ୍ଚି ଭିଣୋଇଙ୍କୁ ପଚରା ଉଚରା କରିବାରୁ ପ୍ରଥମେ ଉଭୟଙ୍କ ମଧ୍ୟରେ କଥା କଟାକଟି ହୋଇଥିଲେ । ଏଥିରେ ଉତକ୍ଷୀପ୍ତ ହୋଇ କାଳୁ ଏକ ବିଅର ବୋତଲ ଭାଙ୍ଗି ଧୀରେନ୍ଦ୍ରଙ୍କ ପେଟ ସମେତ ଶରୀରର ବିଭିନ୍ନ ସ୍ଥାନକୁ ଭୁସି ପକାଇଥିଲେ । ସାହି ପଡେ଼ାଶୀ ଉଠି ଆସିବାରୁ କାଳୁ ସେଠାରୁ ଚମ୍ପଟ ମାରିଥିଲେ । ଲୋକମାନେ ଧୀରେନ୍ଦ୍ରଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିଲେ । ଏ ନେଇ ରାତିରେ ଧୀରେନ୍ଦ୍ର କାଳୁଙ୍କ ନାମରେ ଖଣ୍ଡଗିରି ଥାନାରେ ଅଭିଯୋଗ କରିଥିଲେ । ପୁଲିସ ଏକ ମାମଲା ରୁଜୁ କରି ସକାଳୁ କାଳୁଙ୍କୁ ଗିରଫ କରିଥିଲା । ମଧ୍ୟାହ୍ନରେ କାଳୁଙ୍କୁ କୋର୍ଟ ଚାଲାଣ କରାଯାଇଛି ।