ରାଜଧାନୀରେ ନାବାଳିକା ଅସୁରକ୍ଷିତ
ରାଜଧାନୀରେ ନାବାଳିକା ଅସୁରକ୍ଷିତ
admin
2929
ଭୁବନେଶ୍ୱର: ଶିଶୁଙ୍କୁ ସୁରକ୍ଷିତ ରଖିବା ପାଇଁ ସରକାରଙ୍କ ପକ୍ଷରୁ ବହୁବିଧ ଯୋଜନା କରାଯାଉଛି । ରାଜ୍ୟରେ ମହିଳା ଓ ଶିଶୁଙ୍କ ସୁରକ୍ଷା ପ୍ରତି ଅଧିକ ଗୁରୁତ୍ୱ ଦିଆଯାଉଥିଲେ ମଧ୍ୟ ଖୋଦ୍ ରାଜଧାନୀରେ ନାବାଳିକା ଅସୁରକ୍ଷିତ ହୋଇପଡିଛନ୍ତି । କରୋନା ମହାମାରୀ ସମୟରେ ୨୬୧ ଜଣ ଶିଶୁ ଚାଲାଣ ହୋଇଥିବାବେଳେ ଅଧିକାଂଶ ନିର୍ଯାତନା, ବାଲ୍ୟବିବାହ ଓ ଶିଶୁ ଶ୍ରମିକ ଭାବେ କାମ କରୁଥିବା ଜଣାପଡିଛି । ତେବେ ରାଜଧାନୀରେ ଏଭଳି ଶିଶୁଙ୍କ ସୁରକ୍ଷାକୁ ଦେଖି ବୁଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଛି ।
ରାଜଧାନୀରେ ଶିଶୁ ନିଖୋଜ ସ୍ଥିତି ଉଦ୍ବେଗଜନକ ହୋଇଛି । ନିଖୋଜ ଶିଶୁଙ୍କୁ ଶ୍ରମିକ ଓ ନାବାଳିକାଙ୍କୁ ରାଜ୍ୟ ବାହାରକୁ ଚାଲାଣ କରାଯିବା ପରେ ସେମାନଙ୍କୁ ଘରୋଇ କାମ ସହ ଅନୈତିକ କାମରେ ନିୟୋଜିତ କରାଯାଉଛି । ଏଥିସହ ପ୍ରାୟ ୫୦%ରୁଅଧିକ ନାବାଳିକା ପ୍ରେମ ବ୍ୟାପାରକୁ ନେଇ ନିଖୋଜ ହେବାର ନଜିର ରହିଛି । ସେହିପରି ପର ଘରେ ନଚେତ ଇଟାଭାଟି ଭଳି ସ୍ଥାନରେ ଶିଶୁଙ୍କୁ କାର୍ଯ୍ୟରେ ଲଗାଯାଉଛି । ରାଜ୍ୟ ସରକାରଙ୍କ ପକ୍ଷରୁ ନିଖୋଜ ପିଲାଙ୍କୁ ଖୋଜିବା ପାଇଁ ଅପରେସନ ମୁସ୍କାନ, ସ୍ମାଇଲ ଓ ପରୀ ଭଳି ଯୋଜନା ସଠିକ୍ ଭାବେ କାର୍ଯ୍ୟକାରୀ ହେଉନାହିଁ । ଡିସିପି କାର୍ଯ୍ୟାଳୟ ପରିସରରେ ଥିବା ‘ୟାହାତୁ’ ପକ୍ଷରୁ ଜଣାପଡିଛି ଯେ, କେବଳ ରାଜଧାନୀରେ ୨୦୨୦ ବର୍ଷରେ ୨୬୧ ଶିଶୁ ନିଖୋଜ ହୋଇଛନ୍ତିି । ସେଥିରୁ ୧୮୭ ଜଣ ନାବାଳିକା ଥିବାବେଳେ ୩୫ଜଣ ନାବାଳକ ରହିଛନ୍ତି । ଏଥିରୁ ୫୪ ନାବାଳିକା ଓ ୬ ନାବାଳକଙ୍କୁ ଉଦ୍ଧାର କରାଯାଇଛି । ଏମାନଙ୍କ ମଧ୍ୟରେ ଏକ ବର୍ଷ ଶିଶୁ ଠାରୁ ଆରମ୍ଭ କରି ୧୭ ବର୍ଷର ନାବାଳିକା ରହିଛନ୍ତି । ୨୦୧୯ରେ ୨୩୯ଜଣ ନାବାଳିକା ଓ ୫୬ଟି ନାବାଳକ ନିଖୋଜ ହୋଇଥିଲେ । ସେଥିରୁ ୨୯ ନାବାଳକ ଓ ୮୦ ନାବାଳିକାଙ୍କୁ ଉଦ୍ଧାର କରାଯାଇଛି । ରାଜାଧାନୀରେ ଚାଲାଣ ହୋଇଥିବା ୨୦୦ ଶିଶୁଙ୍କ ପତା ଏଯାବତ ପୁଲିସକୁ ମିଳିପାରିନାହିଁ ।
