ଧୁ ଧୁ ଖରା ପ୍ରକୋପରୁ ମିଳିବ ଆଶ୍ୱସ୍ତି

Apr 2, 2021 - 07:31 Updated: Apr 2, 2021 - 07:31

2507

ଭୁବନେଶ୍ୱର : ଧୁ ଧୁ ଖରା ପ୍ରକୋପରୁ ମିଳିବ ଆଶ୍ୱସ୍ତି । ସବୁଠି କମିବ ତାପମାତ୍ରା । ବର୍ତ୍ତମାନ ତୁଳନାରେ ପ୍ରାୟ ୩ ରୁ ୪ ଡିଗ୍ରୀ ସେଲସିୟସ ଖସିବ ପାରଦ । କାଳବୈଶାଖୀ ବର୍ଷା ବି ହେବ । ଯଦିଓ ରାଜ୍ୟରେ ଗରମ କମିବ, ତେବେ ଉପକୂଳ ଓଡ଼ିଶାରେ ସାମୁଦି୍ରକ ପବନ ଯୋଗୁଁ ଗୁଳୁଗୁଳି ବଢ଼ିବ । ଲଗାତାର ଗ୍ରୀଷ୍ମ ପ୍ରକୋପରେ ସିଝୁଥିବା ଓଡ଼ିଶାରେ ଗୁରୁବାର ତାତି ପ୍ରକୋପ ସାମାନ୍ୟ କମିଥିଲା । ଯଦିଓ ରାଜ୍ୟର ୧୫ଟି ସ୍ଥାନରେ ପାରଦ ୪୦ ଡିଗ୍ରୀ ଉପରେ ଥିଲା । ତଥାପି କୌଣସି ଅଞ୍ଚଳ ୪୩ ଡିଗ୍ରୀ ଛୁଇଁ ନଥିଲା । ଦିନକ ତଳେ ବିଶ୍ୱର ସବୁଠୁ ଉତ୍ତପ୍ତ ସହର ପାଲଟିଥିବା ଭୁବନେଶ୍ୱର ପାରଦ ୪୦ ଡିଗ୍ରୀ ତଳକୁ ଖସି ଆସିଛି । ପାଣିପାଗ ବିଭାଗ କହୁଛି ଏବେ ସାମୟିକ ଭାବେ ଗ୍ରୀଷ୍ମ ଲହରୀ ଆଶଙ୍କା ନାହିଁ । ଶୁକ୍ରବାରଠାରୁ ପାରଦ କ୍ରମାଗତ ଭାବେ କମିବ । ଆସନ୍ତା ଦିନରେ ୩ ରୁ ୪ ଡିଗ୍ରୀ ଖସିପାରେ । ୨ ତାରିଖ ଠାରୁ ରାଜ୍ୟରେ କାଳବୈଶାଖୀ ହେବ । ଶୁକ୍ରବାର ଗଜପତି, ଗଞ୍ଜାମ, ଖୋର୍ଦ୍ଧା, ପୁରୀ, ନୟାଗଡ଼, କନ୍ଧମାଳ, କଟକ, ଜଗତସିଂହପୁର, କେନ୍ଦ୍ରାପଡ଼ା ବାଲେଶ୍ୱର ଭଦ୍ରକରେ ହାଲୁକାରୁ ମଧ୍ୟମ ବର୍ଷା ହୋଇପାରେ । କଟକ, ଖୋର୍ଦ୍ଧା, ଗଞ୍ଜାମ, ଗଜପତି, ନୟାଗଡ଼, ଜଗତସିଂହପୁର, କେନ୍ଦ୍ରାପଡ଼ାରେ ବଜ୍ରପାତ ସହ ୪୦ ରୁ ୫୦ କିମି ବେଗରେ ପବନ ଆଶଙ୍କା ଅଛି ।