ଓଡ଼ିଶାରେ ଚଳିତ ମୌସୁମୀରେ ବର୍ଷାର ପରିମାଣ ସ୍ୱାଭାବିକ ଠାରୁ କମ ରହିବ
ଓଡ଼ିଶାରେ ଚଳିତ ମୌସୁମୀରେ ବର୍ଷାର ପରିମାଣ ସ୍ୱାଭାବିକ ଠାରୁ କମ ରହିବ
admin
3912
ଭୁବନେଶ୍ୱର: ଦେଶର ଚାଷୀକୁଳ ପାଇଁ ଖୁସି ଖବର । ଚଳିତ ବର୍ଷ ଭାରତରେ ଦକ୍ଷିଣ ପଶ୍ଚିମ ମୌସୁମୀ ବାୟୁ ପ୍ରଭାବରେ ସ୍ୱାଭାବିକ ବର୍ଷା ହେବ । କିନ୍ତୁ ଓଡିଶା ଏଥିରୁ ବଞ୍ଚିତ ହେବ । କାରଣ ଓଡ଼ିଶାରେ ଚଳିତ ମୌସୁମୀରେ ବର୍ଷାର ପରିମାଣ ସ୍ୱାଭାବିକ ଠାରୁ କମ ରହିବ । ଅର୍ଥାତ ରାଜ୍ୟରେ ଏଥର କମ୍ ବର୍ଷା ହେବାର ସମ୍ଭାବନା ରହିଛି । ତେବେ ଖାଲି ଓଡ଼ିଶା ନୁହେଁ, ଆସାମ, ଛତିଶଗଡ, ଉତ୍ତରପ୍ରଦେଶ, ବିହାର, ପଶ୍ଚିମବଙ୍ଗ ଓ ଝାଡ଼ଖଣ୍ଡ ଆଦି ରାଜ୍ୟରେ ମଧ୍ୟ କମ ବର୍ଷା ପରିସ୍ଥିତି ସୃଷ୍ଟି ହେବ । ଓଡ଼ିଶା ସମତେ ଏସବୁ ରାଜ୍ୟରେ କମ୍ ବର୍ଷା ହେବାର ପ୍ରାୟ ୩୫ ରୁ ୬୫% ପର୍ଯ୍ୟନ୍ତ ସମ୍ଭାବନା ରହିଛି ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ମିଳିଛି । ଭାରତୀୟ ପାଣିପାଗ ବିଜ୍ଞାନ ବିଭାଗ ପକ୍ଷରୁ ଜାରି କରାଯାଇଥିବା ପ୍ରେସ ବିବୃତ୍ତିରେ କୁହାଯାଇଛି, ଦକ୍ଷିଣ ପଶ୍ଚିମ ମୌସୁମୀ କାରଣରୁ ଚଳିତ ବର୍ଷ ଦେଶରେ ଭଲ ବର୍ଷା ହେବ । କିଛି କିଛି ସ୍ଥାନରେ ସ୍ୱାଭାବିକ ଠାରୁ ଢେ଼ର ଅଧିକ ଓ କେତେକ ରାଜ୍ୟରେ କମ୍ ବର୍ଷା ବି ହୋଇପାରେ । ଏସବୁ ହିସାବକୁ ନେଇ ଆଇଏମଡି କହୁଛି ଗତ ଦୁଇ ବର୍ଷ ଧରି ଦେଶରେ ସ୍ୱାଭାବିକଠାରୁ ଅଧିକ ବର୍ଷା ହୋଇଥିବା ବେଳେ ଚଳିତ ବର୍ଷ ସ୍ୱାଭାବିକ ବର୍ଷା ହେବ । ୧୯୯୬, ୯୭ ଓ ୯୮ ମସିହାରେ ଲଗାତାର ୩ ବର୍ଷ ଧରି ଦେଶରେ ସ୍ୱାଭାବିକ ବର୍ଷା ହୋଇଥିବା ରେକର୍ଡ ରହିଛି ।
