ଋଷିଆରେ ୧ ଲକ୍ଷ ଲୋକଙ୍କର ହୋଇଛି ଟିକାକରଣ
ଋଷିଆରେ ୧ ଲକ୍ଷ ଲୋକଙ୍କର ହୋଇଛି ଟିକାକରଣ
admin
1863
ମସ୍କୋ : ଗତକାଲି ବ୍ରିଟେନରେ ଫାଇଜର ଟିକା ବ୍ୟବହାରକୁ ଅନୁମତି ପ୍ରଦାନ କରାଯାଇଥିଲା । ତେବେ ଆଜି ତାଠାରୁ ବଡ ଖବର ସାମ୍ନାକୁ ଆସିଛି । ଋଷରେ ବର୍ତ୍ତମାନ ସୁଦ୍ଧା ପ୍ରାୟ ୧ ଲକ୍ଷ ଲୋକଙ୍କୁ ଟିକାକରଣ ସରିଲାଣି । ଋଷ ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ଏହି ସୂଚନା ପ୍ରଦାନ କରାଯାଇଛି । ମିଳିତ ଜାତିସଂଘର ଅଧିକାରୀଙ୍କ ସହିତ ଭିଡିଓ କନଫରେନ୍ସିଂରେ ଆଲୋଚନା ସମୟରେ ଋଷ ସ୍ୱାସ୍ଥ୍ୟମନ୍ତ୍ରୀ ଏହି ସୂଚନା ପ୍ରଦାନ କରିଛନ୍ତି । ବୁଧବାର ଋଷ ସ୍ୱାସ୍ଥ୍ୟମନ୍ତ୍ରୀ ମିଖାଇଲ ମୁରାସ୍କୋ ମିଳିତ ଜାତିସଂଘ ଅଧିକାରୀଙ୍କୁ ଏହି ସୂଚନା ଦେଇଛନ୍ତି ।
ଋଷରେ ଅଗଷ୍ଟ ୧୧ ତାରିଖରେ ରାଷ୍ଟ୍ରପତି ଭ୍ଲାଦିମିର ପୁତିନ ବିଶ୍ୱର ପ୍ରଥମ କରୋନା ଟିକା ସ୍ପୁଟନିକ ଭି ସମ୍ପର୍କରେ ଘୋଷଣା କରିଥିଲେ । ଋଷର ପ୍ରଥମ ଉପଗ୍ରହ ନାମରେ ନାମିତ ଏହି ଟିକା ଗାମାଲିଆ ରିସର୍ଚ୍ଚ ଇନଷ୍ଟିଚ୍ୟୁଟ ଦ୍ୱାରା ପ୍ରସ୍ତୁତ । ଏହି ଟିକାଟି ୯୨ ପ୍ରତିଶତ ଫଳପ୍ରଦ ବୋଲି ଗତମାସରେ ଋଷ ପକ୍ଷରୁ କୁହାଯାଇଥିଲା । ତେବେ ଏହି ଟିକାର ବ୍ୟବହାରକୁ ନେଇ ପ୍ରଥମେ ଋଷର ୬୦ ପ୍ରତିଶତ ସ୍ୱାସ୍ଥୃ୍ୟକର୍ମୀ ମନା କରି ଦେଇଥିଲେ ।
ତେବେ ଏହି ଟିକାର ବ୍ୟବହାର ସତ୍ତ୍ୱେ ମଧ୍ୟ ଋଷରେ କରୋନାର ପ୍ରକୋପ କମ ହେଉନାହିଁ । ଜନ ହପକିନସ ବିଶ୍ୱ ବିଦ୍ୟାଳୟ ପକ୍ଷରୁ ପ୍ରକାଶିତ ସୂଚନା ଅନୁଯାୟୀ ଋଷରେ କରୋନା ସଂକ୍ରମିତଙ୍କ ସଂଖ୍ୟା ୨୩ ଲକ୍ଷ ୨୭ ହଜାର ୧୦୫ରେ ପହଞ୍ଚିଛି । ବିଗତ ୨୪ ଘଣ୍ଟା ମଧ୍ୟରେ ୨୮ ହଜାର ୧୪୫ ଜଣ ନୂତନ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି ।
