ଆଇସକି୍ରମ କାଠିରେ କୁନି ରଥ, ଇଣ୍ଡିଆ ବୁକ ଅଫ ରେକର୍ଡସରେ ସ୍ଥାନ ପାଇଲେ
ଆଇସକି୍ରମ କାଠିରେ କୁନି ରଥ, ଇଣ୍ଡିଆ ବୁକ ଅଫ ରେକର୍ଡସରେ ସ୍ଥାନ ପାଇଲେ
admin
4844
ପୁରୀ: ଆଇସକି୍ରମ କାଠିରେ ଏକ ସୁନ୍ଦର ଓ ଅତିକ୍ଷୁଦ୍ର ରଥ ତିଆରି କରି ପୁରୀର ଜଣେ ଛାତ୍ର ଇଣ୍ଡିଆ ବୁକ ଅଫ ରେକର୍ଡସରେ ସ୍ଥାନ ପାଇଛନ୍ତି । ଏହି ଛାତ୍ର ଜଣଙ୍କ ପୁରୀ ପୌରାଞ୍ଚଳ କୁଣ୍ଢାଇବେଣ୍ଟସାହି ବାନାମ୍ବର ମନ୍ଦିର ପାଖର ସତ୍ୟପ୍ରକାଶ ନାୟକ (୧୮) । ସେ ସୂଚନା ଦେଇ କହିଛନ୍ତି, ତାଙ୍କ ପରିବାର ବଂଶାନୁକ୍ରମିକ ଭାବେ ଶ୍ରୀଜଗନ୍ନାଥଙ୍କ ଘଣ୍ଟୁଆ ସେବା କରି ଆସୁଛନ୍ତି । ହେଲେ ଚଳିତ ବର୍ଷ କରୋନା ମହାମାରୀ ନିମନ୍ତେ ପ୍ରଶାସନିକ କଟକଣା ହେତୁ ଏହି ସେବାରୁ ବଞ୍ଚିତ ହୋଇଥିଲେ । ତେଣୁ ଏହି ସ୍ମୃତିକୁ ରୋମନ୍ଥନ କରି ଗତ ରଥଯାତ୍ରା ଦିନ ଏହି କ୍ଷୁଦ୍ର ରଥ ନିର୍ମାଣ କରିବା ଆରମ୍ଭ କରିଥିଲେ । ଯାହାକୁ ହେରାପଞ୍ଚମୀ ଦିନ ଶେଷ କରି ମହାପ୍ରଭୁ ଓ ମା’ମହାଲକ୍ଷ୍ମୀଙ୍କ ଚରଣରେ ସମର୍ପଣ କରିଥିଲେ । ଏହି କ୍ଷୁଦ୍ର କଳାକୃତିକୁ ବିଶ୍ୱ ବିଦିତ କରିବା ନିମନ୍ତେ ଅନଲାଇନ ଯୋଗେ ଇଣ୍ଡିଆ ବୁକ ରେକର୍ଡସ ହାସଲ ନିମନ୍ତେ ଆବେଦନ କରିଥିଲେ । ଇଣ୍ଡିଆ ବୁକ ଅଫ ରେକର୍ଡସ କର୍ତ୍ତୃପକ୍ଷ ତାଙ୍କ ପାଖକୁ ମେଡାଲ, ସାର୍ଟିଫିକେଟ ପଠାଇଛନ୍ତି । ଯାହାକୁ ପାଇବା ପରେ ତାଙ୍କ ପରିବାର ଲୋକ ଖୁସି ହୋଇଯାଇଛନ୍ତି । ସେ ପୁରୀର ଏକ ଘରୋଇ କଲେଜରେ ଅଧ୍ୟୟନ କରୁଛନ୍ତି । ତାଙ୍କ ବାପା କିମ୍ବା ପରିବାର ସଦସ୍ୟ ପ୍ରତିବର୍ଷ ରଥ ଭିଡ଼ା ବେଳେ ତାଳଧ୍ୱଜ ରଥ ଉପରେ ଓ ପହଣ୍ଡିରେ ଘଣ୍ଟ ବଜାଇଥାନ୍ତି । ହେଲେ ଚଳିତ ବର୍ଷ ଏହି ସୁଯୋଗ ନ ମିଳିବାରୁ ଘରେ ବସି ୫ ଦିନ ଭିତରେ ୬୫୦ ଆଇସକି୍ରମ କାଠି ବ୍ୟବହାର କରି ନନ୍ଦିଘୋଷ ରଥ ନିର୍ମାଣ କରିଥିଲେ । ମହାପ୍ରଭୁ, ପିତା ବାଳକୃଷ୍ଣ ନାୟକ, ମାତା ରାଜଲକ୍ଷ୍ମୀଙ୍କ ଆଶୀର୍ବାଦ ଯୋଗୁଁ ସଫଳ ହୋଇପାରିଛି ବୋଲି କହିଛନ୍ତି ।
