ଜମିଜମା ବିବାଦରୁ ପୁତୁରାର ନାରକୀୟ କାଣ୍ଡ, ବଡ଼ବାପାକୁ ବୀଭତ୍ସ ହତ୍ୟା
ଜମିଜମା ବିବାଦରୁ ପୁତୁରାର ନାରକୀୟ କାଣ୍ଡ, ବଡ଼ବାପାକୁ ବୀଭତ୍ସ ହତ୍ୟା
admin
6583
ଆଠମଲ୍ଲିକ: ମଙ୍ଗଳବାର ଆଠମଲ୍ଲିକ ଥାନା ତଥା କୁଦଗାଁ ପଞ୍ଚାୟତର ବିଜପୁର ଗ୍ରାମରେ ଏକ ଲୋମଟାଙ୍କୁରା ହତ୍ୟା କାଣ୍ଡ ସମଗ୍ର ଅଞ୍ଚଳରେ ଆଲୋଡ଼ନ ଖେଳାଇ ଦେଇଛି । ଜମିଜମା ବିବାଦରୁ ବଡ଼ବାପାକୁ ପୁତୁରା ଟାଙ୍ଗିଆ ପଶାରେ ପିଟି ପିଟି ହତ୍ୟା କରିଛି । ସେତିକିରେ ରାଗ ଶାନ୍ତ ହେଲାନି ଯେ ନିସ୍ତେଜ ଶରୀର ବେକରେ ଦଉଡ଼ି ବାନ୍ଧିବା ସହ ବଳଦ ଯୋଚି ଗାଁ ଦାଣ୍ଡରେ ବୁଲାଇଛି । ଅପରାହ୍ନରେ ମୃତଦେହ ଡାକ୍ତରଖାନାରେ ପହଞ୍ଚିଥିବା ବେଳେ ସନ୍ଧ୍ୟାରେ ଅଭିଯୋଗ ପାଇ ପୁଲିସ ଛାନଭିନ ଚଳାଇଛି । ଅଭିଯୁକ୍ତ ପୁତୁରା ଫେରାର ହୋଇଯାଇଚି । ପୁଲିସ ସୂତ୍ରରୁ ପ୍ରକାଶ ଯେ, ବିଜପୁର ଗ୍ରାମର ସତ୍ୟା ପ୍ରଧାନ (୬୫) ଓ ତାଙ୍କର ସାନ ଭାଇ ପରିବାର ସହ ଘରଡିହ ଜାଗାକୁ ନେଇ ଦୀର୍ଘ ଦିନ ହେଲା ବିବାଦ ଲାଗି ରହିଥିଲା । ମଧ୍ୟାହ୍ନ ବେଳେ ସତ୍ୟା ପ୍ରଧାନଙ୍କ ଘର ସମ୍ମୁଖ କୂଅରେ ସାନଭାଇର ପୁଅ ଅର୍ଜ୍ଜୁନପ୍ରଧାନ ଗାଧୋଉଥିଲା । ଘରବାଡ଼ିକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ବେଳେ ହଠାତ ଅର୍ଜୁନ ଟାଙ୍ଗିଆ ଆଣି ବଡ଼ବାପାଙ୍କୁ ଆକ୍ରମଣ କରିଥିଲା । ଟାଙ୍ଗିଆ ମାଡ଼ରେ ସତ୍ୟା ପ୍ରଧାନ ଅଚେତ ହୋଇ ପଡ଼ିଯାଇଥିଲେ । ରକ୍ତମୁଖା ପୁତୁରା ବଡ଼ବାପା ବେକ ଦଉଡ଼ିରେ ବାନ୍ଧି ଗୋଟିଏ ବଳଦର ବେକରେ ଯୋଚିଥିଲା । ଗାଁ ଦାଣ୍ଡରେ ଘୋଷାଡ଼ିବା ପରେ ତାଙ୍କ ଘର ସମ୍ମୁଖରେ ଛାଡ଼ି ଫେରାର ହୋଇଯାଇଥିଲା । ଦିନ ସାଢେ଼ ୧୨ଟାରୁ ଅପରାହ୍ନ ୪ଟା ପର୍ଯ୍ୟନ୍ତ ସତ୍ୟା ପ୍ରଧାନଙ୍କ ନିଶ୍ଚଳ ଶରୀର ସେମିତି ଦାଣ୍ଡରେ ପଡ଼ି ରହିଥିଲା । ଛେଳି ଚରାଇବାକୁ ଯାଇଥିବା ସତ୍ୟାଙ୍କ ପୁଅ ପ୍ରକାଶ ପ୍ରଧାନ ଅପରାହ୍ନରେ ଘରକୁ ଫେରିଥିଲେ । ୧୦୮ ଆମ୍ବୁଲାନ୍ସ ଯୋଗେ ବାପାଙ୍କୁ ଆଠମଲ୍ଲିକ ଡାକ୍ତରଖାନା ଆଣିଥିଲେ ହେଁ ଡାକ୍ତର ସତ୍ୟାଙ୍କୁ ମୃତ ଘୋଷଣା କରିଥିଲେ । ସନ୍ଧ୍ୟାରେ ପ୍ରକାଶ ଏ ନେଇ ଥାନାରେ ଏତଲା ଦେବା ପରେ ପୁଲିସ ଅନୁସନ୍ଧାନ ଚଳାଇଛି ।
