ସାରା ବିଶ୍ୱରେ ଏପ୍ରିଲ ମାସରେ ବିଭିନ୍ନ ପ୍ରକାର ଖାଦ୍ୟ ସାମଗ୍ରୀ ମହଙ୍ଗା ହୋଇଛି

May 7, 2021 - 08:10 Updated: May 7, 2021 - 08:10

5068

ନୂଆଦିଲ୍ଲୀ: ସାରା ବିଶ୍ୱରେ ଏପ୍ରିଲ ମାସରେ ବିଭିନ୍ନ ପ୍ରକାର ଖାଦ୍ୟ ସାମଗ୍ରୀ ମହଙ୍ଗା ହୋଇଛି । କ୍ରମାଗତ ୧୧ ମାସ ଧରି ସାମଗ୍ରୀଗୁଡ଼ିକର ଦାମ ବଢ଼ୁଛି । ଜାତିସଂଘର ସଂସ୍ଥା ଖାଦ୍ୟ ଓ କୃଷି ସଂଗଠନ (ଏଫଏଓ) ପକ୍ଷରୁ ଜାରି କରାଯାଇଥିବା ଖାଦ୍ୟ ମୂଲ୍ୟ ସୂଚୀରୁ ଏହା ଜଣାପଡ଼ିଛି । ୨୦୧୪ ମେ’ ପରେ ପ୍ରଥମ ଥର ଲାଗି ଖାଦ୍ୟ ସାମଗ୍ରୀ ଦାମ ଏତେ ଅଧିକ ହୋଇଥିବା ଜଣାପଡ଼ିଛି । ଏଫଏଓ ରିପୋର୍ଟ ଅନୁଯାୟୀ, ଦାନାଯୁକ୍ତ ଖାଦ୍ୟ, ତୈଳ ବୀଜ, ଦୁଗ୍ଧଜାତ ଉତ୍ପାଦ, ମାଂସ ଏବଂ ଚିନି ଦାମ ଅଧିକ ବଢ଼ିଛି । ପ୍ରତି ମାସରେ ଏହି ସାମଗ୍ରୀଗୁଡ଼ିକ ଦାମରେ ବୃଦ୍ଧି ଘଟୁଛି । ଫଳରେ ଖାଦ୍ୟ ମୂଲ୍ୟ ସୂଚୀ ୧୨୦.୯ ପଏଣ୍ଟକୁ ବୃଦ୍ଧି ପାଇଛି । ଏପ୍ରିଲ ମାସରେ ଦାନାଯୁକ୍ତ ଖାଦ୍ୟ ଦାମ ୧.୨ ପ୍ରତିଶତ ବଢ଼ିଛି । କିନ୍ତୁ ଗତବର୍ଷର ମୂଲ୍ୟ ସହ ତୁଳନାରେ କଲେ ଏହି ଦାମ୍ ୨୬% ଅଧିକ ହୋଇଛି । ଆର୍ଜେଣ୍ଟିନା, ବାଜିଲ ଓ ଆମେରିକାରେ ଉତ୍ପାଦନ ପ୍ରଭାବିତ ହେବାର ଆଶଙ୍କା ଥିବାରୁ ମକା ଦାମ ୫.୭% ବଢ଼ିଛି । ସେହି ସମୟରେ ଗହମ ମୂଲ୍ୟ ଏକ ପ୍ରକାର ସ୍ଥିର ରହିଥିବା ବେଳେ ଚାଉଳ ମୂଲ୍ୟରେ ହ୍ରାସ ଘଟିଛି । ଏଫଏଓର ମୂଲ୍ୟ ସୂଚୀ ଅନୁସାରେ ଭେଜିଟେବଲ ଅଏଲ ଦାମ୍ ୧.୮% ବଢ଼ିଥିବା ବେଳେ ଦୁଗ୍ଧଜାତ ସାମଗ୍ରୀ ଦାମରେ ୧.୨% ବୃଦ୍ଧି ହୋଇଛି । ଏସିଆରେ ବଟର, ସ୍କିମ୍ ମିଲ୍କ ପାଉଡର ଓ ଚିଜ ଚାହିଦା ଅଧିକ ରହିବାରୁ ଏଗୁଡ଼ିକର ଦାମ ବଢ଼ିଥିବା କୁହାଯାଉଛି । ପୂର୍ବ ଏସିଆରେ ଅଧିକ ଚାହିଦା ରହିବା କାରଣରୁ ମାଂସ ମୂଲ୍ୟ ୧.୭% ବଢ଼ିଛି । ଗତ ମାର୍ଚ୍ଚରେ ଚିନି ମୂଲ୍ୟରେ ହ୍ରାସ ଘଟିବା ପରେ ଏପ୍ରିଲରେ ପୁଣି ଦାମ୍ ବଢ଼ିଛି । ଚିନି ଦାମ ମାର୍ଚ୍ଚ ତୁଳନାରେ ୩.୯% ବଢ଼ିଥିବା େବଳେ ଗତବର୍ଷ ତୁଳନାରେ ୬୦% ବଢ଼ିଛି । ବ୍ରାଜିଲରେ ଉତ୍ପାଦନ କମ ରହିବା ଏବଂ ଫ୍ରାନ୍ସରେ ଫସଲ ନଷ୍ଟ ହୋଇଥିବାରୁ ଚିନି ଯୋଗାଣ ବାଧାପ୍ରାପ୍ତ ହେବାର ଆଶଙ୍କା ରହିଥିଲା । ସେଥିପାଇଁ ଏହାର ଚାହିଦା ବଢ଼ିବା ସହ ଦାମ ବଢ଼ିଛି ବୋଲି ଏଫଏଓ ତରଫରୁ କୁହାଯାଇଛି । ଆଗାମୀ ଦିନରେ ଦାନାଯୁକ୍ତ ଖାଦ୍ୟ ଓ ଗହମ ଉତ୍ପାଦନରେ ଉଲ୍ଲେଖନୀୟ ବୃଦ୍ଧି ହୋଇଥିବା ଆଶା କରାଯାଉଛି । ବ୍ରାଜିଲ, ଚୀନ, ୟୁକ୍ରେନ ଓ ଯୁକ୍ତରାଷ୍ଟ୍ର ଆମେରିକାରେ ଅଧିକ ଜମିରେ ଚାଷ ହୋଇଥିବାରୁ ଖାଦ୍ୟଶସ୍ୟ ଉତ୍ପାଦନ ଏଥର ଅଧିକ ରହିବ ବୋଲି ଏଫଏଓ ଆକଳନ କରିଛି ।