ଲାଇଫ ଜ୍ୟାକେଟ ବିନା ଡଙ୍ଗାରେ ଯାତାୟାତ ମନା ବୋଲି କହିଛନ୍ତି ପ୍ରଦୀପ ଜେନା
admin
ଭୁବନେଶ୍ୱର : ଲାଇଫ ଜ୍ୟାକେଟ ବିନା ଡଙ୍ଗାରେ ଯାତାୟାତ ମନା । ଏ ନିୟମକୁ କଡ଼ାକଡ଼ି ପାଳନ କରିବାକୁ ନିର୍ଦ୍ଦେଶ ଜାରି କରିଛନ୍ତି ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା । ସ୍ପଷ୍ଟ ଭାବେ କୁହାଯାଇଛି, ଡଙ୍ଗାରେ ଯାତ୍ରା କରିବାକୁ ହେଲେ ଲାଇଫ ଜ୍ୟାକେଟ ପିନ୍ଧିବା ବାଧ୍ୟତାମୂଳକ ।
ଏ କଥା ନୁହେଁ ଯେ, ଏଥିପାଇଁ କୌଣସି ନୂଆ ନିୟମ ଜାରି ହୋଇଛି । ୨୦୦୪ରୁ ଓଡ଼ିଶା ଡଙ୍ଗା ନିୟମ ରହିଛି । ମାତ୍ର ପରିବହନ ବିଭାଗର ଏ ନିୟମକୁ ପ୍ରାୟତଃ ଡଙ୍ଗା ଚାଳକ ଓ ଡଙ୍ଗା ଯାତ୍ରୀ ମାନୁନାହାନ୍ତି । ଯେଉଁଥିପାଇଁ ପ୍ରତିବର୍ଷ ପାଣିରେ ବୁଡ଼ି ବହୁ ସଂଖ୍ୟାରେ ଲୋକଙ୍କ ଜୀବନ ଯାଉଛି । ୨୦୨୨ରେ ପାଣିରେ ବୁଡ଼ି ୧୪୭୬ ଜଣଙ୍କ ମୃତ୍ୟୁ ହୋଇଛି । ପାଣିରେ ବୁଡ଼ି ମୃତ୍ୟୁ ଘଟଣା ରୋକିବାକୁ ରାଜ୍ୟ ସରକାର ଏବେ କଠୋର ଆଭିମୁଖ୍ୟ ଗ୍ରହଣ କରିଛନ୍ତି । ମୁଖ୍ୟମନ୍ତ୍ରୀଙ୍କ ଜିରୋ କାଜୁଆଲିଟି ମନ୍ତ୍ରକୁ ଆଧାର କରି ମୁଖ୍ୟ ଶାସନ ସଚିବ ଶ୍ରୀ ଜେନା ଡଙ୍ଗା ନିୟମକୁ କଡ଼ାକଡ଼ି ଭାବେ ପାଳନ ପାଇଁ ନିର୍ଦ୍ଦେଶ ଦେଇଛନ୍ତି ।
ସୋମବାର ଲୋକସେବା ଭବନରେ ଏହି ପ୍ରସଙ୍ଗ ନେଇ ମୁଖ୍ୟ ଶାସନ ସଚିବ ଶ୍ରୀ ଜେନାଙ୍କ ଅଧ୍ୟକ୍ଷତାରେ ବୈଠକ ବସିଥିଲା। ଏଥିରେ ନିର୍ଦ୍ଦେଶ ଦିଆଯାଇଛି, ସମୁଦ୍ର, ନଦୀ, ହ୍ରଦ, ଜଳଭଣ୍ଡାର ଆଦିରେ ପର୍ୟ୍ୟଟନ ପାଇଁ ହେଉ ବା ଯାତାୟାତ ପାଇଁ, ଡଙ୍ଗାରେ ସମସ୍ତ ଯାତ୍ରୀ ଲାଇଫ ଜ୍ୟାକେଟ ପିନ୍ଧିବାକୁ ବାଧ୍ୟ । ଡଙ୍ଗା ଚାଳକଙ୍କୁ ଡଙ୍ଗାରେ ଲାଇଫ୍-ବୋଏ (ପାଣିରେ ଭାସମାନ ରହୁଥିବା ଜୀବନ ସୁରକ୍ଷାକାରୀ ବଳୟ) ନେବା ପାଇଁ ବାଧ୍ୟତାମୂଳକ କରାଯାଇଛି । ଯାତ୍ରୀବାହୀ ଡଙ୍ଗା ଓ ଦ୍ରବ୍ୟ ପରିବହନ କରୁଥିବା ଡଙ୍ଗାଗୁଡ଼ିକର ପଞ୍ଜୀକରଣ, ଡଙ୍ଗା ଓ ଲଞ୍ଚ ଚାଳକଙ୍କୁ ଲାଇଫ୍ ବୋଏ ସାମଗ୍ରୀ ବଣ୍ଟନ ସହ ବିଭିନ୍ନ ନିୟମକୁ ପାଳନ କରିବାକୁ ବୈଠକରେ ଗୁରୁତ୍ୱ ଦିଆଯାଇଛି । ଘାଟ ନିଲାମି ସମୟରେ ଡଙ୍ଗା ଚାଳକଙ୍କୁ ନିୟମ ପାଳନ ସମ୍ପର୍କରେ ଅବଗତ କରାଇବା ଓ ନିୟମିତ ତଦାରଖ କରିବାକୁ ପଞ୍ଚାୟତିରାଜ ବିଭାଗକୁ କୁହାଯାଇଛି । ବିଭିନ୍ନ ଜଳଭଣ୍ଡାରରେ ଚଳାଚଳ କରୁଥିବା ଡଙ୍ଗା ସମ୍ପର୍କରେ ଅନୁଧ୍ୟାନ କରିବା ସହ କାର୍ୟ୍ୟାନୁଷ୍ଠାନ ନେବାକୁ ବିଡିଓ, ଅଗ୍ନିଶମ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ଅନଧିକୃତ ଭାବେ ଯାତ୍ରୀ ଓ ପର୍ୟ୍ୟଟକଙ୍କୁ ନେଉଥିବା ମାଛ ଧରା ଡଙ୍ଗା ଓ ଅନ୍ୟ ଡଙ୍ଗାକୁ ଜବତ କରିବାକୁ କୁହାଯାଇଛି ।
ବୈଠକରେ ପରିବହନ ବିଭାଗ ପ୍ରମୁଖ ଶାସନ ସଚିବ ଉଷା ପାଢ଼ୀ କହିଲେ, ଯାତ୍ରୀ ପରିବହନ କରୁଥିବା ଡଙ୍ଗା ମାଲିକ, ଲଞ୍ଚ ଅପରେଟରଙ୍କ କ୍ଷେତ୍ରରେ ସହିଦ ବାଜି ରାଉତ ନୌଯାତ୍ରା ସୁରକ୍ଷା ଯୋଜନାରେ ୭ ହଜାର ସଂଖ୍ୟକ ଲାଇଫ୍-ବୋଏ, ୩୫ ହଜାର ଲାଇଫ ଜ୍ୟାକେଟ ଓ ଅଗ୍ନି ନିର୍ବାପକ ଯନ୍ତ୍ର ବ୍ୟବସ୍ଥା କରାଯାଇଛି । ବୈଠକରେ ଉନ୍ନୟନ କମିଶନର ଅନୁ ଗର୍ଗ, ସ୍ୱତନ୍ତ୍ର ରିଲିଫ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁ, ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ପ୍ରମୁଖ ଶାସନ ସଚିବ ସୁରେଶ କୁମାର ବଶିଷ୍ଠ, ଓସଡମା ପରିଚାଳନା ନିର୍ଦ୍ଦେଶକ ତଥା କାର୍ୟ୍ୟ ନିର୍ବାହୀ ନିର୍ଦ୍ଦେଶକ ଡଃ ଜ୍ଞାନ ରଂଜନ ଦାସ ପ୍ରମୁଖ ଅଂଶଗ୍ରହଣ କରିଥିଲେ ।
