ରାଜଧାନୀରୁ ଡେଲିଭରି ବଏ ଅପହୃତ!
ରାଜଧାନୀରୁ ଡେଲିଭରି ବଏ ଅପହୃତ!
admin
ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ପୁଣି ଏକ ବଡ଼ ଅପରାଧ । ଜଣେ ଡେଲିଭରି ବଏକୁ ବିଳମ୍ବିତ ରାତିରେ ଅପହରଣ କରାଯାଇଥିବା ଅଭିଯୋଗ ହୋଇଛି । ଧଉଳି ଥାନା ଅନ୍ତର୍ଗତ ଲିଙ୍ଗିପୁର ପାଖ ଦୟା ନଦୀ ବନ୍ଧରୁ ତାଙ୍କ ଚପଲ, ବ୍ୟାଗ, ପର୍ସ ଆଦି ମିଳିଛି । ଗୋଟିଏ ଛୁରୀ ବି ସେଠାରୁ ଜବତ ହୋଇଛି । ପରିବାର ଲୋକେ ଅଭିଯୋଗ କରିଛନ୍ତି, ତାଙ୍କୁ କେହି ଅପହରଣ କରିନେଇଛନ୍ତି । ସେ ନିଜେ ପତ୍ନୀଙ୍କ ମୋବାଇଲକୁ ଭଏସ ମେସେଜ କରି ଏହି ସୂଚନା ଦେଇଛନ୍ତି । ମାତ୍ର ଏହାପରଠୁ ତାଙ୍କ ଫୋନ ବନ୍ଦ ରହିଛି । ଏହି ଘଟଣା କମିଶନରେଟ ପୁଲିସ ପାଇଁ ଆଉ ଏକ ବଡ଼ ଚାଲେଞ୍ଜ ଆଣିଛି ।
ନିଖୋଜ ଡେଲିଭରି ବଏଙ୍କ ନାଁ ପତିତପାବନ ପୃଷ୍ଟି ବୋଲି ଜଣାପଡ଼ିଛି । ସେ ଭୁବନେଶ୍ୱର ନୂଆଗାଁର ବିଜୟବିହାରରେ ଘର ଭଡ଼ା ନେଇ ପରିବାର ଲୋକଙ୍କ ସହ ରହୁଥିଲେ । ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ସେ ଘରକୁ ଫେରିନଥିଲେ । ତାଙ୍କ ପତ୍ନୀଙ୍କ ମୋବାଇଲକୁ ସେ ରାତି ପ୍ରାୟ ୧୦ଟା ୧୫ ମିନିଟରେ ଏକ ଭଏସ ମେସେଜେ ପଠାଇଥିଲେ । ମାତ୍ର ତାଙ୍କ ପତ୍ନୀଙ୍କ ମୋବାଇଲ୍ରେ ଇଣ୍ଟରନେଟ ବନ୍ଦ ଥିବାବେଳେ ସେ ରାତି ପ୍ରାୟ ୨ଟାବେଳେ ଏହି ମେସେଜ ଦେଖିଥିଲେ । ମେସେଜରେ ସେ ଜଣାଇଥିଲେ, ତାଙ୍କ ଗାଡ଼ି ଖରାପ ହୋଇଯାଇଛି । ତେବେ କିଛି ମଦୁଆ ତାଙ୍କୁ ଅନୁସରଣ କରୁଥିବା ନେଇ ସେ ଜଣାଇଥିଲେ । ତୁରନ୍ତ ତାଙ୍କୁ ସାହାଯ୍ୟ କରିବାକୁ ବି ପରିବାରକୁ ଜଣାଇଥିଲେ । ଏହି ମେସେଜ ପାଇବା ପରଠୁ ପରିବାର ଲୋକେ ତାଙ୍କୁ ଖୋଜାଖୋଜି ଆରମ୍ଭ କରିଥିଲେ । ପରିବାର ଲୋକଙ୍କ କହିବା କଥା ହେଲା, ରାତିରେ ସେମାନେ ପୁଲିସ ପାଖକୁ ଯାଇଥିଲେ ମଧ୍ୟ ପୁଲିସ ସେମାନଙ୍କ କଥାକୁ ଗୁରୁତ୍ୱ ଦେଇନଥିଲେ । ଧଉଳି ଥାନାରୁ ଲିଙ୍ଗରାଜ ଥାନା ଓ ଲିଙ୍ଗରାଜ ଥାନାରୁ ଧଉଲି ଥାନା ଚକ୍କର କାଟିବାକୁ ପଡ଼ିଥିଲା । ପରିବାର ଲୋକେ ଦୟା ନଦୀ ଅଂଚଳରେ ଖୋଜାଖୋଜି କରିଥିଲେ । ସକାଳୁ ପତିତପାବନଙ୍କ ଗଞ୍ଜି, ବ୍ୟାଗ, ପର୍ସ ଆଦି ନଈ ବନ୍ଧରୁ ମିଳିଥିଲା । ପାଖରେ ଛୁରିଟିଏ ବି ପଡ଼ିଥିଲା । ଏ ନେଇ ଧଉଳି ପୁଲିସ ତଦନ୍ତ ଆରମ୍ଭ କରିଛି । ରିପୋର୍ଟ ଲେଖା ହେବାବେଳକୁ ପତିତପାବନଙ୍କ କୌଣସି ଖବର ମିଳିନାହିଁ । ଅନ୍ୟପକ୍ଷରେ ପରିବାର ଲୋକଙ୍କ ଚିନ୍ତା ବଢ଼ିଯାଇଛି ।
