ବଡ ଖବର : ଭାରତରେ ୨ ଓମିକ୍ରନ ଆକ୍ରାନ୍ତ ଚିହ୍ନଟ
ବଡ ଖବର : ଭାରତରେ ୨ ଓମିକ୍ରନ ଆକ୍ରାନ୍ତ ଚିହ୍ନଟ
admin
ବେଙ୍ଗାଲୁର : ଶେଷରେ ଭାରତରେ ପହଁଚି ଯାଇଛି କରୋନାର ନୂଆ ଭାରିଆଂଟ ଓମିକ୍ରନ । ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଏହା ସ୍ପଷ୍ଟ କରାଯାଇଛି । ପୂର୍ବରୁ ୨୯ଟି ଦେଶରେ ଓମିକ୍ରନ ଭୂତାଣୁ ପହଁଚିଥିବାବେଳେ ଏବେ ଭାରତରେ ଓମିକ୍ରନର ଉପସ୍ଥିତି ଚିନ୍ତା ବଢ଼ାଇ ଦେଇଛି ।
କର୍ଣ୍ଣାଟକର ୨ ଜଣ ବ୍ୟକ୍ତି ଓମିକ୍ରନରେ ଆକ୍ରାନ୍ତ ହୋଇଛନ୍ତି । ସେମାନଙ୍କ ବୟସ ୬୬ ଓ ୪୬ ବର୍ଷ ବୋଲି ସ୍ୱାସ୍ଥ୍ୟ ମନ୍ତ୍ରଣାଳୟର ଯୁଗ୍ମ ସଚିବ ଲବ ଅଗ୍ରୱାଲ ପ୍ରକାଶ କରିଛନ୍ତି । ୬୬ ବର୍ଷୀୟ ବ୍ୟକ୍ତି ଜଣଙ୍କ ଜଣେ ବିଦେଶୀ ହୋଇଥିବାବେଳେ ନିକଟରେ ସେ ଦକ୍ଷିଣ ଆଫ୍ରିକା ଯାଇଥିଲେ । ଅପରପକ୍ଷରେ ଅନ୍ୟ ୪୬ ବର୍ଷୀୟ ବ୍ୟକ୍ତି ଜଣଙ୍କ ଜଣେ ସ୍ୱାସ୍ଥ୍ୟକର୍ମୀ ବୋଲି ଜଣାପଡିଛି । ସେହି ଦୁଇ ବ୍ୟକ୍ତିଙ୍କ ସହ ଯେଉଁମାନେ ସଂସ୍ପର୍ଶରେ ଆସିଥିଲେ ସେମାନଙ୍କୁ ଖୋଜିବା ସହ ପରୀକ୍ଷା କରାଯାଇଛି । ତେବେ ଉଭୟଙ୍କ ଠାରେ କୌଣସି ପ୍ରକାର ଗୁରୁତର ଲକ୍ଷଣ ଦେଖିବାକୁ ମିଳିନାହିଁ । ଏଥିରେ ଭୟଭୀତ ନହୋଇ ଆବଶ୍ୟକୀୟ କୋଭିଡ଼ କଟକଣା ଅନୁପାଳନ ପାଇଁ ସେ ପରାମର୍ଶ ଦେଇଛନ୍ତି । ସେହିପରି ସ୍ଥିତି ଏବେ ନିୟନ୍ତ୍ରଣାଧିନ ରହିଛି ବୋଲି କୋଭିଡ଼ ୧୯ ଟାସ୍କଫୋର୍ସର ମୁଖ୍ୟ ଡାକ୍ତର ଭିକେ ପଲ କହିଛନ୍ତି ।
ସୂଚନାଯୋଗ୍ୟଯେ, କରୋନାର ପୂର୍ବ ଭାରିଆଂଟ ତୁଳନାରେ ଓମିକ୍ରନ ଅତ୍ୟନ୍ତ ଉଗ୍ର ରୂପ ଧାରଣ କରୁଛି । ଏହା ସଂକ୍ରମଣକୁ ବହୁ ଶୀଘ୍ର ବୃଦ୍ଧି କରୁଛି । ତେବେ ଏହି ଷ୍ଟ୍ରେନ ମରଣାନ୍ତକ ହୋଇଥିବା ନେଇ କୌଣସି ପ୍ରମାଣ ମିଳିନାହିଁ ।
