ଟିକଟକରେ ପ୍ରେମ : ନାବାଳିକା ଫେରାର, ଭାପୁରରୁ ଉଦ୍ଧାର
ଟିକଟକରେ ପ୍ରେମ : ନାବାଳିକା ଫେରାର, ଭାପୁରରୁ ଉଦ୍ଧାର
admin
2168
ଭୁବନେଶ୍ୱର : ଟିକଟକ ମାଧ୍ୟମରେ ପ୍ରେମ । ଶେଷରେ ଘର ଛାଡ଼ି ନାବାଳିକା ଜଣକ ଉକ୍ତ ଯୁବକ ସହିତ ଫେରାର । ଏବେ ନାବାଳିକା ଜଣକ ପୁଲିସ ଦ୍ୱାରା ଉଦ୍ଧାର ହେବା ଓ ଯୁବକ ଜଣକ ଗିରଫ ଘଟଣା ଭାପୁର ଅଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ପୁଲିସ ସୂତ୍ରରୁ ପ୍ରକାଶ ଯେ, ଭାପୁର ବ୍ଲକ ଫତେଗଡ଼ ଥାନା କରବର ଗ୍ରାମର କାଠିଆ ବେହେରାଙ୍କ ପୁଅ ରାଜିବ ବେହେରା (୨୭) ଟିକଟକ ମାଧ୍ୟମରେ ଭୁବନେଶ୍ୱର ସଦିଦନଗର ଥାନା ଅନ୍ତର୍ଗତ ଭିଏସଏସ ନଗରର ମହାବୀର ବସ୍ତିର ଜଣେ ଷଷ୍ଠ ଶ୍ରେଣୀର ନାବାଳିକାଙ୍କ ସହିତ ସମ୍ପର୍କ ଗଢ଼ି ଉଠିଥିଲା । ଏହି ପ୍ରେମ ସମ୍ପର୍କକୁ ପାଥେୟ କରି ଚଳିତ ମାସ ୩ ତାରିଖ ଦିନ ଉକ୍ତ ନାବାଳିକା ଯୁବକଙ୍କ ସହିତ କରବର ଗ୍ରାମକୁ ପଳାଇ ଆସିଥିଲେ । ନାବାଳିକାଙ୍କୁ ପରିବାର ଲୋକ ନ ପାଇ ଖୋଜା ଖୋଜି କରି ଶେଷରେ ହତାଶ ହୋଇ ୪ ତାରିଖରେ ସହିଦ ନଗର ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ସହିଦ ନଗର ଥାନା ପକ୍ଷରୁ କେସ ନଂ ୩୭୯/୨୦ ରେ ଏକ ଅପହରଣ ମାମଲା ରୁଜୁ କରି ତଦନ୍ତ ଚଳାଇଥିଲେ । ସହିଦନଗର ଥାନା ଏସଆଇ ପଦ୍ମଚରଣ ଭଟ୍ଟ ଏହି ମାମଲାର ତଦନ୍ତ ଭାର ନେଇ ଫୋନ ଟ୍ରାକିଙ୍ଗ ମାଧ୍ୟମରେ ଫତେଗଡ଼ ଥାନା କରବର ଗ୍ରାମରେ ଥିବା ଜାଣିବାକୁ ପାଇଥିଲେ । ଫଳରେ ଗତ ୬ ତାରିଖରେ ରାତିରେ ଉକ୍ତ ନାବାଳିକାର ବାପା, ମାଆଙ୍କୁ ଧରି ଫତେଗଡ଼ ଥାନାରେ ପହଞ୍ଚିଥିଲେ । ଫତେଗଡ଼ ଥାନା ପକ୍ଷରୁ ସମସ୍ତ ପ୍ରକାରର ସହଯୋଗ କରାଯାଇଥିଲା । ଫତେଗଡ଼ ଥାନା ଏସଆଇ ରଇବାରୀ ତିରିଆ ଓ ଦୁଇ ଜଣ ଫୋର୍ସଙ୍କ ସମେତ ଏସଆଇ ଶ୍ରୀ ଭଟ୍ଟ ଓ ନାବାଳିକାର ବାପା ମାଆ କରବର ଗ୍ରାମର ଉକ୍ତ ଯୁବକଙ୍କ ଘରେ ଚଢ଼ଉ କରିଥିଲା । ପୁଲିସ ଯୁବକଙ୍କୁ ଗିରଫ କରିବା ସହ ନାବାଳିକାକୁ ଉଦ୍ଧାର କରି ଭୁବନେଶ୍ୱର ସହିଦନଗର ଥାନାକୁ ନେଇଯାଇଥିଲେ । ସୋମବାର ଉଭୟଙ୍କର ଡାକ୍ତରୀ ମାଇନା ପରେ ନାବାଳିକାଙ୍କୁ ତାର ପରିବାରକୁ ହସ୍ତାନ୍ତର କରାଯାଇଥିବା ଏସଆଇ ଶ୍ରୀ ଭଟ୍ଟଙ୍କ ଠାରୁ ପ୍ରକାଶ ।
