ଜମି ବିବାଦରୁ ଜଘନ୍ୟକାଣ୍ଡ, ଭାଇଗୁଳିରେ ଭାଇ ମୃତ
ଜମି ବିବାଦରୁ ଜଘନ୍ୟକାଣ୍ଡ, ଭାଇଗୁଳିରେ ଭାଇ ମୃତ
admin
6197
ବନ୍ତଳା: ରାତି ସାଢେ଼ ୮ଟାରେ ୫୫ ନମ୍ବର ଜାତୀୟ ରାଜପଥରେ ଫୁଟିଛି ଗୁଳି । ଅନୁଗୁଳ ସହରଠାରୁ ମାତ୍ର ୭ କିମି ଦୂର ହରିବରେଣୀ ଛକରେ ଦୁଇଭାଇ ସେମାନଙ୍କର ଜଣେ ସମ୍ପର୍କୀୟ ଭାଇଙ୍କୁ ଗୁଳି କରି ହତ୍ୟା କରିବା ସହ ମୃତକଙ୍କ ବଡ଼ଭାଇଙ୍କୁ ଭୁଜାଲିରେ ହାଣି ଦରମଲା କରି ପକାଇ ଦେବା ଘଟଣା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ସଶସ୍ତ୍ର ଆକ୍ରମଣ ପରେ ରକ୍ତ ମୁଖା ଦୁଇ ଭାଇ ଜାତୀୟ ରାଜପଥରେ କୁହାଟ ମାରି କିଛି ସମୟ ଆତଙ୍କରାଜ ଚଳାଇବା ପରେ ଫେରାର ହୋଇଯାଇଛନ୍ତି । ପାରିବାରିକ ପୁରୁଣା ଜମି ବିବାଦରୁ ଏହି ଲୋମଟାଙ୍କୁରା ହତ୍ୟାକାଣ୍ଡ ଘଟିଥିବା ପୁଲିସ ପ୍ରାଥମିକ ତଦନ୍ତରୁ ଜଣାପଡ଼ିଛି । ସୂଚନା ଅନୁସାରେ ଅନୁଗୁଳ ଥାନା ରନ୍ତଜେଇ ଗାଁ ପଡ଼ାଖମଣି ସାହି ନିବାସୀ ଦୁଃଶାସନ ସେନାପତି (୪୫) ଓ ତାଙ୍କ ଦାଦା ପୁଅ ଭାଇ ସୁଜନ ସେନାପତିଙ୍କ ମଧ୍ୟରେ ଜମି ବିବାଦ ଲାଗି ରହିଥିଲା । ନିର୍ମାଣ ସାମଗ୍ରୀ ଯୋଗାଣ ବ୍ୟବସାୟ କରୁଥିବା ଦୁଃଶାସନ ପ୍ରତିଦିନ ଭଳି ସନ୍ଧ୍ୟାରେ ଗାଁଠାରୁ ଦୁଇ କିଲୋମିଟର ଦୂର ହରିବରେଣୀ ଛକକୁ ବୁଲିବାକୁ ଯାଇଥିଲେ । ହରିବରେଣି ଛକରେ ସୁଜନ ସେନାପତିଙ୍କର ଏକ ୱେଲଡିଂ ଦୋକାନ ରହିଛି । ସୁଜନ ଓ ତାଙ୍କ ଭାଇ ସନ୍ତୋଷ ଦୁଃଶାସନକୁ ଆକ୍ରମଣ କରିବା ପାଇଁ ପୂର୍ବରୁ ପ୍ରସ୍ତୁତ ହୋଇ ରହିଥିଲେ । ଛକରେ ଦୁଃଶାସନ ପହଞ୍ଚିବା ପରେ ସୁଜନଙ୍କ ମଧ୍ୟରେ କିଛି ସମୟ ଧରି ବଚସା ହୋଇଥିଲା । ଉଭୟେ ଧସ୍ତାଧସ୍ତି ହୋଇଥିଲେ । ତେବେ ପୂର୍ବ ପ୍ରସ୍ତୁତି ଅନୁଯାୟୀ ସୁଜନ ଓ ସନ୍ତୋଷ ଲୁଚାଇ ରଖିଥିବା ଭୁଜାଲିରେ ଦୁଃଶାସନକୁ ଆକ୍ରମଣ କରିଥିଲେ । ଶରୀରର ବିଭିନ୍ନ ସ୍ଥାନରେ ଚୋଟ ପରେ ଚୋଟ ମାରିଥିଲେ । ଦୁଃଶାସନ ରାସ୍ତା ପାଶ୍ୱର୍ରେ ପଡ଼ି ଛଟପଟ ହେଉଥିଲେ ହେଁ ଛକରେ ଥିବା ଲୋକମାନେ ତାଙ୍କୁ ଉଦ୍ଧାର କରିବା ପାଇଁ ସାହସ ଜୁଟାଇ ପାରିନଥିଲେ । ତେବେ ଘଟଣା ସଂକ୍ରାନ୍ତରେ ଖବର ପାଇ ସାନ ଭାଇ ଦୁଷ୍ମନ୍ତ ସେନାପତି (୩୫) ନିଜ ଟେମ୍ପୋ ଧରି ବଡ଼ଭାଇ ଦୁଶାସନକୁ ଉଦ୍ଧାର କରିବାକୁ ସେଠାରେ ପହଞ୍ଚିଥିଲେ ।
