ଚିନ୍ତା ବଢାଇଲାଣି ବାର୍ଡଫ୍ଲୁ : ସରକାର ଛାନିଆ

Jan 28, 2020 - 05:33 Updated: Jan 28, 2020 - 05:33

2576

ଭୁବନେଶ୍ୱର - ରାଜ୍ୟ ସରକାର ବାର୍ଡ ଫ୍ଲୁ କୁ ନେଇ ଯେଭଳି ଛାନିଆ କଲେଣି ତାହା କୁକୁଡ଼ା ଚାଷକୁ ବୁଡ଼ାଇବ । ଶହ ଶହ ଯୁବକ ବେପାର ହେବାର ସମ୍ଭାବନା ଉପୁଜିଲାଣି । ଅତୀତରେ ଜଣେ ହେଲେ କେହି ଏଥିରେ ମୃତୁ୍ୟ ବରଣ କରିନଥିବା ବେଳେ ସରକାର ଯେଭଳି ପ୍ରଚାର ଚଳାଇଛନ୍ତି ତାହା ରାଜ୍ୟରେ କୁକୁଡ଼ା ଚାଷୀଙ୍କୁ ବୁଡ଼ାଇ ଦେବ ବୋଲି ଅନେକ ଚାଷୀ କ୍ଷୋଭର ସହ କହିଛନ୍ତି । ତେଣୁ ସରକାର ତୁରନ୍ତ ବାସ୍ତବ ସ୍ଥିତି ଜଣାଇବାକୁ ଚାଷୀମାନେ ଦାବି କରିଛନ୍ତି । ସରକାର କୁକୁଡ଼ା ଚାଷକୁ ଶିଳ୍ପ ଘୋଷଣା କରିବା ପରେ ରାଜ୍ୟର ଗାଁ ଗହଳ ଠାରୁ ଆରମ୍ଭ କରି ସହର ପର୍ଯ୍ୟନ୍ତ ଲୋକେ କୁକୁଡ଼ା ଚାଷ କରୁଛନ୍ତି । ଏହାଦ୍ୱାରା ସେମାନଙ୍କ ପରିବାର ଚଳୁଛି । ଫନି ପରେ ପରେ କୁକୁଡ଼ା ଚାଷକୁ ରାଜ୍ୟ ସରକାର ଅଧିକ ପ୍ରୋତ୍ସାହନ ଦେଇଛନ୍ତି । ତେଣୁ ଏବେ ରାଜ୍ୟର ଅନ୍ୟ ଅଞ୍ଚଳ ତୁଳନାରେ ଉପକୂଳରେ କୁକୁଡ଼ାଚାଷୀଙ୍କ ସଂଖ୍ୟା ସର୍ବାଧିକ ଓ ଅଧିକରୁ ଅଧିକ ଯୁବକ ଏ କ୍ଷେତ୍ରରେ ଆତ୍ମନିଯୁକ୍ତି ପାଇଛନ୍ତି । ତେଣୁ ରାଜ୍ୟ ସରକାର ହଠାତ୍ ଯେଭଳି ବାର୍ଡ ଫ୍ଲୁ ଚିହ୍ନଟ ଘୋଷଣା କରିଛନ୍ତି ତାହା କୁକୁଡ଼ାଚାଷୀଙ୍କ ଆଖିରୁ ନିଦ ହଜାଇ ଦେଇଛି । କୁକୁଡ଼ାଚାଷୀଙ୍କ କହିବା କଥା ଯେ ଓୟୁଏଟିରେ ବାର୍ଡ ଫ୍ଲୁ ଏକ ସାଧାରଣ ଘଟଣା । ଏଠାରେ ଥିବା କୁକୁଡ଼ା ଗବେଷଣା କେନ୍ଦ୍ରର ଠିକଣା ରକ୍ଷଣା ବେକ୍ଷଣ ହେଉନଥିବାରୁ ବାହାର ପକ୍ଷୀଙ୍କ ମଳତ୍ୟାଗ ଯୋଗୁଁ ଏଭଳି ସଂକ୍ରମଣ ହେବାରେ ଲାଗିଛି । ଉପକୂଳ ଅଞ୍ଚଳରେ ମଧ୍ୟ ବାର୍ଡ ଫ୍ଲୁ ଏକ ସାଧାରଣ ଘଟଣା ହେଲାଣି । ଏହା ଦ୍ୱାରା କୌଣସି ବ୍ୟକ୍ତି ମୃତୁ୍ୟ ତ ଦୂରର କଥା ସଂକ୍ରମଣର ଶିକାର ହେଉନଥିବା ବେଳେ ସରକାରୀକଳ କିନ୍ତୁ କୁକୁଡ଼ା ବଧ ପାଇଁ ବୀରଦର୍ପରେ ବାହାରନ୍ତି । ଏହାଦ୍ୱାରା କୁକୁଡ଼ା ଚାଷୀଟି ବର୍ଷ ବର୍ଷ ପାଇଁ ଉଠିପାରେ ନାହିଁ । ସରକାର ପ୍ରଥମେ ନିୟନ୍ତ୍ରଣାତ୍ମକ ପଦକ୍ଷେପ ଗ୍ରହଣ କରନ୍ତୁ ଓ ରାଜ୍ୟରୁ କୁକୁଡ଼ାଚାଷ ବୁଡ଼ାଇବାକୁ ନିବୃତ ରୁହନ୍ତୁ । ନ ହେଲେ ଖାଲି ଉପକୂଳ କାହିଁକି ସମଗ୍ର ରାଜ୍ୟରେ ହଜାର ହଜାର କୁକୁଡ଼ା ଚାଷୀ ବେକାର ହୋଇଯିବେ ।