ଓସିଏର ସଭାପତି ଭାବେ ନିର୍ବାଚନକୁ ଓହ୍ଲାଇବେ ଯାଜପୁର ବିଧାୟକ ପ୍ରଣବ ପ୍ରକାଶ ଦାସ
ଓସିଏର ସଭାପତି ଭାବେ ନିର୍ବାଚନକୁ ଓହ୍ଲାଇବେ ଯାଜପୁର ବିଧାୟକ ପ୍ରଣବ ପ୍ରକାଶ ଦାସ
admin
କଟକ: ପୂର୍ବାନୁମାନ ସତ ହେଲା । ଓଡ଼ିଶା କ୍ରିକେଟ ଆସୋସିଏସନ୍(ଓସିଏ)ର ସଭାପତି ଭାବେ ଏଥର ନିର୍ବାଚନକୁ ଓହ୍ଲାଇବେ ଯାଜପୁର ବିଧାୟକ ପ୍ରଣବ ପ୍ରକାଶ ଦାସ (ବବି)। ବର୍ତ୍ତମାନର ସଭାପତି ତଥା ଶିଳ୍ପପତି ପଙ୍କଜଲୋଚନ ମହାନ୍ତି ଉପସଭାପତି ଓ ସଞ୍ଜୟ ବେହେରା ପୁନର୍ବାର ସାଧାରଣ ସମ୍ପାଦକ ପଦ ପାଇଁ ପ୍ରାର୍ଥୀ ହେବେ । ଓସିଏ ନିର୍ବାଚନକୁ ନେଇ ପୁରୀରେ ଅନୁଷ୍ଠିତ ଗୋପନ ବୈଠକରେ ଏହି ନିଷ୍ପତ୍ତି ନିଆଯାଇଛି । ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି ଏହି ବୈଠକରେ ଓସିଏର ୭୩ଜଣ ଭୋଟର୍ଙ୍କ ମଧ୍ୟରୁ ୬୦ରୁ ଅଧିକ ଭୋଟର ଯୋଗ ଦେଇଥିଲେ । ତେଣୁ ପରାଜୟର ଆଶଙ୍କା ସ୍ପଷ୍ଟ ହୋଇଥିବାରୁ ପ୍ରତିପକ୍ଷ ଶିବିର ନିର୍ବାଚନ ଲଢ଼ିବା ପାଇଁ ପଛଘୁଞ୍ଚା ଦେଉଛି । ଫଳରେ ତେଣୁ ଏଥର ସଭାପତି, ଉପସଭାପତି ଓ ସାଧାରଣ ସଂପାଦକ ନିଦ୍ୱର୍ନ୍ଦ୍ୱରେ ନିର୍ବାଚିତ ହେବେ ବୋଲି ଏକରକମ ନିଶ୍ଚିତ ବୋଲି କୁହାଯାଉଛି ।
ମିଳିଥିବା ସୂଚନା ଅନୁସାରେ, ପୁରୀରେ ହୋଇଥିବା ବୈଠକରେ ସର୍ବସମ୍ମତିକ୍ରମେ ପ୍ୟାନେଲ୍ ନିଷ୍ପତ୍ତିକୁ ସମସ୍ତେ ସମର୍ଥନ ଦେଇଛନ୍ତି । ତେଣୁ ଏଥର ଓସିଏରେ ନିର୍ବଚନୀ ଟକ୍କର ଦେଖିବାକୁ ମିଳିନପାରେ । ଗତ ୧୧ତାରିଖରେ ଓସିଏ ନିର୍ବାଚନ ପାଇଁ ଭୋଟର ତାଲିକା ପ୍ରକାଶ ପାଇଥିଲା । ଏଥିରେ ଯାଜପୁର ଜିଲ୍ଲାରୁ ଭୋଟର ଭାବେ ତାଲିକାଭୁକ୍ତ ହୋଇଥିଲେ ବିଧାୟକ ପ୍ରଣବ ପ୍ରକାଶ ଦାସ । ଯାହାକୁ ନେଇ ଚର୍ଚ୍ଚା ଆରମ୍ଭ ହୋଇଥିଲା । ଏଥର ପ୍ରଣବ ଓସିଏ ନିର୍ବାଚନକୁ ଓହ୍ଲାଇବେ ବୋଲି ସମ୍ଭାବନା ମଧ୍ୟ ସୃଷ୍ଟି ହୋଇଥିଲା । ତେବେ ପ୍ରାରମ୍ଭରେ ସଞ୍ଜୟଙ୍କ ପ୍ୟାନେଲ୍ ଏଭଳି ସମ୍ଭାବନାକୁ ଅସ୍ୱୀକାର କରିଥିଲେ । କିନ୍ତୁ ପୁରୀରେ ପ୍ୟାନେଲ୍ର ଗୋପନ ବୈଠକରେ ପ୍ରଣବଙ୍କୁ ପୂର୍ଣ୍ଣ ସମର୍ଥନ ମିଳିଥିବା ଜଣାପଡ଼ିଛି । ଫଳରେ ବର୍ତ୍ତମାନର ସଭାପତି ପଙ୍କଜଲୋଚନ ମହାନ୍ତିଙ୍କ ପୁନର୍ବାର ସଭାପତି ହେବାର ଆଶା ମଉଳି ଯାଇଛି ।
ସୂଚନାଯୋଗ୍ୟ, ୨୧ ତାରିଖରେ ପ୍ରାର୍ଥିପତ୍ର ଦାଖଲ ହେବ । ସକାଳ ୧୦ଟା ୩୦ ରୁ ଅପରାହ୍ନ ୫ଟା ଯାଏ ଓସିଏ ସମ୍ମିଳନୀ କକ୍ଷରେ ପ୍ରାର୍ଥିପତ୍ର ଦାଖଲ କରାଯିବ । ୨୨ ତାରିଖରେ ତାଲିକା ପ୍ରସ୍ତୁତ କରାଯାଇ ଆପତ୍ତି, ଅଭିଯୋଗ ଶୁଣାଣି କରାଯିବ । ୨୩ତାରିଖରେ ଓସିଏ ନିର୍ବାଚନର ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ । ୫ଦିନର ବ୍ୟବଧାନ ପରେ ୨୮ତାରିଖରେ ନିର୍ବାଚନ ଅନୁଷ୍ଠିତ ହେବ ବୋଲି ନିର୍ବାଚନ ଅଧିକାରୀଙ୍କ ତରଫରୁ ଜାରି କରାଯାଇଥିବା ବିଜ୍ଞପ୍ତିରେ ସୂଚନା ଦିଆଯାଇଛି ।
