କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଭେଟିଲେ ସମ୍ବିତ ପାତ୍ର
admin
8275
ପୁରୀ,୧୦ା୪: ପୁରୀ ଜିଲ୍ଲା କଣାସ ବ୍ଲକ୍ ଅନ୍ତର୍ଗତ ଅଁଳାଯୋଡି ପଞ୍ଚାୟତରେ ପୋଷ୍ଟ ଅଫିସ୍ ନାହିଁ । ଯାହାଫଳରେ ସେଠାକାର ଲୋକମାନେ ବିଭିନ୍ନ ଅସୁବିଧାର ସମ୍ମୁଖୀନ ହେଉଛନ୍ତି । ତେଣୁ ଏହି ପଞ୍ଚାୟତରେ ଏକ ପୋଷ୍ଟ ଅଫିସ ପ୍ରତିଷ୍ଠା କରିବାକୁ ବିଜେପିର ଜାତୀୟ ମୁଖପାତ୍ର ସମ୍ବିତ ପାତ୍ର ପ୍ରୟାସ କରିଛନ୍ତି । ଏନେଇ ସେ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଦିଲ୍ଲୀରେ ଭେଟି ଏକ ଦାବିପତ୍ର ଦେଇଛନ୍ତି । ଯଥାଶୀଘ୍ର ଅଁଳାଯୋଡି ପଞ୍ଚାୟତରେ ଏକ ପୋଷ୍ଟ ଅଫିସ ପ୍ରତିଷ୍ଠା କରିବାକୁ ସେ କେନ୍ଦ୍ରମନ୍ତ୍ରୀଙ୍କୁ ଅନୁରୋଧ କରିଛନ୍ତି । ମନ୍ତ୍ରୀ ମଧ୍ୟ ଏହି ପତ୍ର ଗ୍ରହଣ କରି ବିଭାଗୀୟ ଅଧିକାରୀଙ୍କ ସହ ଆଲୋଚନା କରିବେ ବୋଲି ପ୍ରତିଶ୍ରୁତି ଦେଇଛନ୍ତି ।
ଅଁଳାଯୋଡି ପଞ୍ଚାୟତରେ ହଜାରହଜାର ଲୋକ ବସବାସ କରନ୍ତି । କୌଣସି ଚିଠି ପଠାଇବା, ଟଙ୍କା ଜମା କରିବା, ମନି ଅର୍ଡର, ପାର୍ସଲ ପଠାଇବା ଆଦି କାମ ପାଇଁ ସେମାନଙ୍କୁ ବହୁତ ଦୂରରେ ଥିବା ପୋଷ୍ଟ ଅଫିସ ଉପରେ ନିର୍ଭର କରିବାକୁ ପଡୁଛି । ନିକଟରେ ଶ୍ରୀ ପାତ୍ର ଏହି ଅଞ୍ଚଳ ବୁଲିବାକୁ ଯାଇଥିଲେ । ଏହି ସମୟରେ ସେଠାକାର ଲୋକମାନେ ବିଭିନ୍ନ ଅସୁବିଧା ସମ୍ପର୍କରେ ଦୃଷ୍ଟି ଆକର୍ଷଣ କରିବା ସହ ଏକ ପୋଷ୍ଟ ଅଫିସ ପ୍ରତିଷ୍ଠା କରିବା ପାଇଁ ଶ୍ରୀ ପାତ୍ରଙ୍କୁ ଅନୁରୋଧ କରିଥିଲେ । ଯେଉଁଥିପାଇଁ ଶ୍ରୀ ପାତ୍ର କେନ୍ଦ୍ରମନ୍ତ୍ରୀଙ୍କୁ ଭେଟି ଏହି ଅସୁବିଧା ସମ୍ପର୍କରେ ଜଣାଇଛନ୍ତି । ଏହି ପୋଷ୍ଟ ଅଫିସ ପ୍ରତିଷ୍ଠା ହେଲେ ସ୍ଥାନୀୟ ଅଞ୍ଚଳର ଅର୍ଥନୀତିରେ ବୃଦ୍ଧି ଘଟିବା ସହ ଲୋକମାନେ ସହଜରେ ପୋଷ୍ଟାଲ ସେବା ପାଇପାରିବେ ବୋଲି ଶ୍ରୀ ପାତ୍ର କହିଛନ୍ତି ।
