ମିଶନ ୨୦୨୪: ଖୁବଶୀଘ୍ର ଘୋଷଣା ହେବ ପିସିସି ସଭାପତିଙ୍କ ନୂଆ ଟିମ୍
admin
ଭୁବନେଶ୍ୱର: ରାୟପୁର କଂଗ୍ରେସ ମହାଅଧିବେଶନରୁ ବଳ ନେଇ ଫେରିଛି ଓଡ଼ିଶା କଂଗ୍ରେସ । ଆଗାମୀ ନିର୍ବାଚନ ପାଇଁ ଏବେ ରାଜ୍ୟ କଂଗ୍ରେସ ଆରମ୍ଭ କରିଦେବ ମାରାଥନ କାର୍ୟ୍ୟକ୍ରମ । ଏଥିପାଇଁ ଖୁବଶୀଘ୍ର ଘୋଷଣା ହେବ ପିସିସି ସଭାପତି ଶରତ ପଟ୍ଟନାୟକଙ୍କ ନୂଆ ଟିମ୍ । ଏହି ଟିମ୍ରେ ରହିପାରନ୍ତି ୪ଜଣ କାର୍ୟ୍ୟକାରୀ ସଭାପତି ।
ଛତିଶଗଡ଼ର ରାୟପୁରରେ କଂଗ୍ରେସ ଅଧିବେଶନ ସମୟରେ ରାଜ୍ୟ କଂଗ୍ରେସର କିଛି ବରିଷ୍ଠ ନେତା, ପ୍ରଭାରୀ ଚେଲ୍ଲା କୁମାରଙ୍କ ସହ ଏଆଇସିସି ମହାସଚିବ ଭେନୁଗୋପାଳଙ୍କ ମଧ୍ୟରେ ଗୁରୁତ୍ୱପୂର୍ଣ୍ଣ ଆଲୋଚନା ହୋଇଥିବା ଖବର ମିଳିଛି । ତାରକା ହୋଟେଲରେ ହୋଇଥିବା ଏହି ବୈଠକରେ ଓଡ଼ିଶା କଂଗ୍ରେସର ନୂଆ ଟିମ୍କୁ ନେଇ ଆଲୋଚନା ହୋଇଥିଲା ।
ବିଶ୍ୱସ୍ତ ସୂତ୍ର ଅନୁସାରେ କାର୍ୟ୍ୟକାରୀ ସଭାପତିଙ୍କୁ ପିସିସି ଟିମ୍ରେ ସ୍ଥାନ ଦେବାକୁ ଆଲୋଚନା ହୋଇଥିଲା । ଏଥିରେ ଦଳର ବରିଷ୍ଠ ନେତା ତଥା ଜୟପୁର ବିଧାୟକ ତାରାପ୍ରସାଦ ବାହିନୀପତିଙ୍କ ନାଁ ସର୍ବାଗ୍ରେ ରହିଛି । ଏହାବାଦ୍ ବିଧାୟକ ରାଜନ ଏକ୍କା, ଦେବାଶିଷ ପଟ୍ଟନାୟକ, ମାନସ ଚୌଧୁରୀ ଏବଂ ବିଧାୟକ ଅଧିରାଜ ପାଣିଗ୍ରାହୀଙ୍କୁ ନେଇ ଆଲୋଚନା ହୋଇଥିବା ଶୁଣିବାକୁ ମିଳିଛି । ଏହି ୫ ନେତାଙ୍କ ମଧ୍ୟରୁ ୪ଜଣଙ୍କୁ କାର୍ୟ୍ୟକାରୀ ସଭାପତି ପଦ ମିଳିପାରେ । ପିସିସିର ନୂଆ ଟିମ୍ରେ ଏଥର ଯୁବବର୍ଗଙ୍କୁ ବିଶେଷ ଗୁରୁତ୍ୱ ମିଳିବ । ଏମିତି ଟିମ୍ ଗଢ଼ାଯିବ, ଯାହା ଭୁବନେଶ୍ୱର କଂଗ୍ରେସ ଭବନରେ ନ ବସି କ୍ଷେତ୍ରକୁ ଯିବ । କାର୍ୟ୍ୟକାରୀ ସଭାପତିମାନଙ୍କୁ ବିଭିନ୍ନ ଜୋନ୍ ଦାୟିତ୍ୱ ଦିଆଯିବ । ସେହି ଜୋନ୍ରେ କିଛି ସାଧାରଣ ସମ୍ପାଦକ, ସମ୍ପାଦକ ମଧ୍ୟ ନିୟୋଜିତ ହେବେ । ମାର୍ଚ୍ଚ ୭ ତାରିଖ ସୁଦ୍ଧା ନୂଆ ଟିମ୍ ଘୋଷଣା ହେବା ସମ୍ଭାବନା ରହିଛି । ଆଉ ଏକ ବଡ଼ ଖବର ହେଲା, ରାଜ୍ୟ କଂଗ୍ରେସରେ ନୂଆ କରି ଯୋଗ ଦେଇଥିବା ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକଙ୍କୁ ଦଳ ବଡ଼ ଦାୟିତ୍ୱ ଦେଇପାରେ । ବିଜୟଙ୍କୁ ଇସ୍ତାହାର କମିଟି ଅଧ୍ୟକ୍ଷ ପଦବୀ ଦେବା ନେଇ ଆଲୋଚନା ଚାଲିଥିବା ଜଣାପଡ଼ିଛି ।
