ବିଜେପି ପାଇଁ ଆହ୍ୱାନ ଛାତ୍ର ସଂସଦ ନିର୍ବାଚନ
ANGIKAR NEWS
ଭୁବନେଶ୍ୱର : ଛଅ ବର୍ଷ ଧରି ଛାତ୍ର ସଂସଦରେ ଶୁଭୁନାହିଁ ଅମୁକ ଭାଇ ଜିନ୍ଦାବାଦର ନାରା । ଖାଲି ପତିଆରା ଦେଖାଇବା ପାଇଁ କିଛି ଛାତ୍ରନେତା ପୋଷ୍ଟର ବ୍ୟାନରରେ ହିଁ ନିଜକୁ ସୀମିତ ରଖିଦେଇଛନ୍ତି । ନିର୍ବାଚନ ହେଉନଥିବାରୁ କ୍ୟାମ୍ପସ ବି ମାନ୍ଦା ହୋଇଯାଇଛି । ଏଥର କିନ୍ତୁ ନିର୍ବାଚନ ହେବବୋଲି ସରକାର ସଂକେତ ଦେଇଛନ୍ତି । ଯାହାକୁ ନେଇ ଛାତ୍ରନେତାମାନେ ଉତ୍ସାହିତ ହୋଇଯାଇଛନ୍ତି । ତେବେ ଛାତ୍ର ସଂସଦ ନିର୍ବାଚନ ଏବେ ବିଜେପି ପାଇଁ ଆହ୍ୱାନ ସୃଷ୍ଟିକରିଛି । କାହିଁକିନା ଏହା ବିଜେପି ସରକାର ଗଠନ ପରେ ପ୍ରଥମ ନିର୍ବାଚନ ହେବ ।
ଏସବୁ ଭିତରେ ରାଜନୀତିକ ଫାଇଦାକୁ ନେଇ ବି ଅଙ୍କକଷା ଆରମ୍ଭ ହୋଇଗଲାଣି । ଦଳରେ ଫାଟ ହେବା ଆଶଙ୍କାରେ ବିଜେଡ଼ି ଛାତ୍ର ନିର୍ବାଚନ ଚାହୁଁନଥିଲା । ଏବେ ବିଜେପି ସରକାର ପାଦେ ଆଗେଇଥିବାରୁ ଏହା ଦଳକୁ ଫାଇଦା ଦେବ ନା ଘାଟାରେ ପକାଇବ ସେନେଇ ବି ଚର୍ଚ୍ଚା ହେବା ସ୍ୱାଭାବିକ । ୨୦୧୭ ସେପ୍ଟେମ୍ବରରେ ଶେଷ ଥର ପାଇଁ ନିର୍ବାଚନ ହୋଇଥିଲା । ଏହାପରେ କ୍ୟାମ୍ପସରେ ହିଂସା ଯୋଗୁଁ ୨୦୧୮ରେ ନିର୍ବାଚନ ବନ୍ଦ କରାଯାଇଥିଲା । ପରେପରେ କରୋନା ଓ ଅନ୍ୟ ଆଳ ଦେଖାଇ ତତ୍କାଳୀନ ବିଜେଡ଼ି ସରକାର ଆଉ ନିର୍ବାଚନ କରିନଥିଲେ । ଛାତ୍ର ସଂଗଠନଗୁଡ଼ିକ ଦାବି କରିଥିଲେ ବି କର୍ଣ୍ଣପାତ କରିନଥିଲେ । ଯାହାକୁ ନେଇ ବିଜେଡ଼ିର ଛାତ୍ରନେତାମାନେ ବି ମନେମନେ ଅସନ୍ତୁଷ୍ଟ ଥିଲେ । ତେବେ ଦଳରେ ଛାତ୍ର ନିର୍ବାଚନକୁ ନେଇ ଫାଟ ନହେଉ ବୋଲି ବିଜେଡ଼ି ଚାହୁଁଥିଲା । ସେତେବେଳେ ବିଜେଡ଼ି ବେଶ୍ ମଜବୁତ ସ୍ଥିତିରେ ଥିଲା । ଯଦି ଛାତ୍ର ସଂଗଠନ ନିର୍ବାଚନ ହୋଇଥା’ନ୍ତା ତେବେ ଦଳରେ କନ୍ଦଳ ହୋଇଥା’ନ୍ତା । ନେତା ନେତାମାନେ ନିଜ ନିଜ ପ୍ରାର୍ଥୀଙ୍କୁ ଲଢ଼ାଇଥା’ନ୍ତେ । ଯାହାକୁ ନେଇ ବିଜେଡ଼ି ନେତାଙ୍କ ମଧ୍ୟରେ ଗୋଷ୍ଠୀକନ୍ଦଳ ବି ବଢ଼ିବାର ଆଶଙ୍କା ରହିଥିଲା । ସେହିପରି କ୍ୟାମ୍ପସରେ ହିଂସାକାଣ୍ଡ ଘଟିଥିଲେବି ସରକାର ବଦନାମ୍ ହୋଇଥା’ନ୍ତେ । ରାଜନୀତିକ ଦୃଷ୍ଟିକୋଣରୁ ବିଜେଡ଼ି ଘାଟାରେ ପଡ଼ିଥିବାରୁ ଦଳ ପ୍ରତ୍ୟକ୍ଷ କ୍ୟାମ୍ପସ ରାଜନୀତିରୁ ଦୂରେଇ ରହିଥିଲା ।
ଏବେ ବିଜେପି ସରକାର ଆସିବା ପରେ ଆଭିମୁଖ୍ୟ ବଦଳିଛି । ଉଚ୍ଚଶିକ୍ଷା ମନ୍ତ୍ରୀ ସୂରଜ ସୂର୍ଯ୍ୟବଂଶୀ ଛାତ୍ର ରାଜନୀତିରୁ ଆସିଛନ୍ତି । ସେହିପରି ଛାତ୍ର ସଂସଦ ନିର୍ବାଚନ ପାଇଁ ପୂର୍ବରୁ ଅଖିଳ ଭାରତୀୟ ବିଦ୍ୟାର୍ଥି ପରିଷଦ ମଧ୍ୟ କୋର୍ଟକୁ ଯାଇଥିଲା । ବାସ୍ତବରେ ବିଜେପିର ଛାତ୍ର ଶାଖା ନାହିଁ । ରାଷ୍ଟ୍ରୀୟ ସ୍ୱୟଂସେବକ ସଂଘର ଅନ୍ୟତମ ଶାଖା ଏବିଭିପିକୁ ହିଁ ବିଜେପିର ଛାତ୍ର ସଂଗଠନ ବୋଲି ଆଖ୍ୟାୟିତ କରାଯାଏ । ବିଜେପି ରାଜନୀତି ସହ ଏବିଭିପିର ପ୍ରତ୍ୟକ୍ଷ ଭାବେ ଦେଣନେଣ ନାହିଁ । କାହିଁକିନା କଂଗ୍ରେସ କିମ୍ବା ବିଜେଡ଼ିରେ ଦଳର ନେତା ହିଁ ଛାତ୍ର ନେତା ବାଛୁଥିଲେ । ତେବେ ଏବିଭିପିର ନେତା ଆରଏସଏସ ଦ୍ୱାରା ହିଁ ବଛା ଯାଇଥାଏ ।
୨୦୨୪ ନିର୍ବାଚନରେ ବିଜେପି ସରକାରକୁ ଆସିଥିଲେବି ବିଜେଡ଼ିର ସଂଗଠନକୁ ଅଣଦେଖା କରାଯାଇପାରିବ ନାହିଁ । ଦଳ ବିଜେପି ଠାରୁ ବି ଅଧିକ ଭୋଟ୍ ପାଇଛି । ସେହିପରି ବିଜେପି ସରକାର ଏଯାଏଁ ସଂକଳ୍ପ ପତ୍ର ଆଧାରରେ ପୂର୍ଣ୍ଣଭାବେ କାର୍ଯ୍ୟକ୍ଷମ ହୋଇପାରିନାହିଁ । ନୂଆ ଓ’ କାର୍ଯ୍ୟକ୍ରମ ଜରିଆରେ ପୂର୍ବରୁ ବିଜେଡ଼ି କ୍ୟାମ୍ପସରେ ପହଁଚିସାରିଛି । ଏବେବି ବିଜେଡ଼ିର ଛାତ୍ର ସଂଗଠନ ଅନ୍ୟ ଦୁଇ ଦଳ ଅପେକ୍ଷା ଭଲ ସ୍ଥିତିରେ ରହିଛି । ଗୋଷ୍ଠୀକନ୍ଦଳ ଓ ଓଡ଼ିଆ ଅସ୍ମିତା ପ୍ରସଙ୍ଗରେ ହିଁ ବିଜେଡ଼ି ହାରି ଯାଇଥିଲା । ହାରିଯିବା ପରେ ବିଜେଡ଼ି ନେତାଙ୍କ ମନରେ ଚେତା ପଶିଛି । ଏବେ ସମସ୍ତେ ଏକାଠି ହୋଇ ଲଢ଼ିବାକୁ ଯୋଜନା କରିଛନ୍ତି । ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ମଧ୍ୟ ଏହି ଆଧାରରେ ଦଳୀୟ କର୍ମୀଙ୍କୁ ଆହ୍ୱାନ ଦେଇଛନ୍ତି । ଯଦି ଛାତ୍ର ନିର୍ବାଚନରେ ବିଜେଡ଼ି ଭଲ ପ୍ରଦର୍ଶନ କରେ ତେବେ ତାହା ନିଶ୍ଚିତ ଭାବେ ବିଜେପି ସରକାରକୁ ଝଟକା ଦେବ । ଦଳକୁ ଏକ ମାନସିକ ଚାପରେ ପକାଇଦେବ । କିନ୍ତୁ ବିଜେପି ସରକାର ଆସିବା ପରେ ଯଦି ନୂଆ ପୀଢ଼ିର ଛାତ୍ରମାନେ ଏବିଭିପିକୁ ସହଯୋଗ କରନ୍ତି ତେବେ ବିଜେପି ବି ଢେ଼ର ସଫଳତା ପାଇପାରିବ । ଯାହାକି ରାଜ୍ୟ ରାଜନୀତିର ମୋଡ଼ ବଦଳାଇପାରିବ । ଏବେ ବିଜେପି ଘାଟାରେ ପଡ଼ିବ ନା ଲାଭରେ ରହିବ ଦଳ ସେନେଇ ଅଙ୍କକଷା ଆରମ୍ଭ କରିଦେଇଛି ।
