କଳ୍ପନା ଚାୱଲାଙ୍କ ପରେ ସିରିଶା ବାନ୍ଦଲା ହେବେ ଦ୍ୱିତୀୟ ଭାରତ ଜନ୍ମିତ ଆମେରିକୀୟ ମହାକାଶଚାରୀ
କଳ୍ପନା ଚାୱଲାଙ୍କ ପରେ ସିରିଶା ବାନ୍ଦଲା ହେବେ ଦ୍ୱିତୀୟ ଭାରତ ଜନ୍ମିତ ଆମେରିକୀୟ ମହାକାଶଚାରୀ
admin
ନୂଆଦିଲ୍ଲୀ: ଭାରତ ଜନ୍ମିତ ଆଉ ଜଣେ ମହିଳା ଚଳିତମାସ ୧୧ ତାରିଖରେ ଅନ୍ତରୀକ୍ଷକୁ ଯାତ୍ରା କରିବେ । କଳ୍ପନା ଚାୱଲାଙ୍କ ପରେ ସେ ହେବେ ଦ୍ୱିତୀୟ ଭାରତ ଜନ୍ମିତ ଆମେରିକୀୟ ମହାକାଶଚାରୀ । ଆନ୍ଧପ୍ରଦେଶର ଗୁଣ୍ଟୁର ଜିଲ୍ଲାରେ ଜନ୍ମିତ ସିରିଶାଙ୍କ ବୟସ ଏବେ ୩୪ ବର୍ଷ । ରିଚାର୍ଡ ବ୍ରାନସନଙ୍କ ଦ୍ୱାରା ସ୍ଥାପିତ କମ୍ପାନି ଭର୍ଜିନ ଗାଲାକ୍ଟିକର ମହାକାଶ ଯାନ ‘ଭିଏସଏସ ୟୁନିଟି’ରେ ମହାକାଶକୁ ଯାତ୍ରା କରିବା ପାଇଁ ସିରିଶା ସାମିଲ ହୋଇଛନ୍ତି । ଉକ୍ତ ମହାକାଶ ଯାତ୍ରା ପାଇଁ କମ୍ପାନି ପକ୍ଷରୁ ଅବଗଣନା ଆରମ୍ଭ ହୋଇଯାଇଛି । ମୋଟ ୬ ଜଣଙ୍କୁ ନେଇ ଯାନଟି ମହାକାଶକୁ ଯିବ । ସେମାନଙ୍କ ମଧ୍ୟରେ ସିରିଶା ଓ ଅନ୍ୟ ଜଣେ ମହିଳା ମହାକାଶଚାରୀ ମଧ୍ୟ ରହିବେ । ଭିଏସଏସ ୟୁନିଟି ମହାକାଶଯାନ ନୁ୍ୟ ମେକ୍ସିକୋରୁ ମହାକାଶକୁ ଯାତ୍ରା କରିବ । ସିରିଶା ଭର୍ଜିନ ଗାଲାକ୍ଟିକର ଉପସଭାପତି ଭାବେ ରିସର୍ଚ୍ଚ ଅପରେସନ୍ ଏବଂ ସରକାରୀ ବ୍ୟାପାର ବିଷୟ ବୁଝୁଛନ୍ତି । ଗୁଣ୍ଟୁରର ମାନାରଗୁଡ଼ିରେ ସେ ବିଦ୍ୟାଳୟ ଶିକ୍ଷା ସମାପ୍ତ କରିବା ପରେ ଆମେରିକାର ପ୍ରୁଡୁ୍ୟ ବିଶ୍ୱବିଦ୍ୟାଳୟରୁ ଏରୋନଟିକାଲ ଇଞ୍ଜିନିୟରିଂରେ ସ୍ନାତକ ଏବଂ ଜର୍ଜ ଟାଉନ୍ ବିଶ୍ୱବିଦ୍ୟାୟରୁ ଏମବିଏ ଡିଗ୍ରି ହାସଲ କରିଛନ୍ତି । ଆମେରିକାରେ ତାଙ୍କର ନିଜ ସହର ହୁ୍ୟଷ୍ଟନ୍ ହୋଇଥିବା ବେଳେ ସେ ଏବେ ନୁ୍ୟ ମେକ୍ସିକୋରେ ରହୁଛନ୍ତି । ମହାକାଶ ଯାନ ଉଡ଼ାଣ ସମୟରେ ସିରିଶା ହୁ୍ୟମାନ ଟେଣ୍ଡେଡ ରିସର୍ଚ୍ଚ ଏକ୍ସପେରିଏନ୍ସ ଦାୟିତ୍ୱରେ ରହିବ । ମହାକାଶ ଯାତ୍ରା ସମୟରେ ମହାକାଶଚାରୀଙ୍କ ଯାତ୍ରା ଅନୁଭୂତି ତାଙ୍କୁ ଜାଣିବାକୁ ମିଳିବ । ପିଲାବେଳୁ ମହାକାଶ ସଂପର୍କରେ ଜାଣିବା ଲାଗି ତାଙ୍କର ପ୍ରବଳ ଆଗ୍ରହ ରହିଥିଲା । ରକେଟ୍ ଏବଂ ମହାକାଶ ଯାନ ତାଙ୍କୁ ରୋମାଞ୍ଚିତ କରୁଥିଲା । ଏଥିରୁ ସେ ମହାକାଶଚାରୀ ହେବା ଲାଗି ପ୍ରେରଣା ପାଇଥିଲେ । ଉଲ୍ଲେଖଯୋଗ୍ୟ, ହରିୟାଣାର କର୍ଣ୍ଣଲରେ ଜନ୍ମିତ କଳ୍ପନା ଚାୱଲା ପ୍ରଥମ ଭାରତ ଜନ୍ମିତ ମହାକାଶଚାରୀ । ଆମେରିକାରୁ ସେ ମହାକାଶକୁ ଯାତ୍ରା କରିଥିଲେ । କିନ୍ତୁ ଯାନଟି ପୃଥିବୀ ପୃଷ୍ଠରେ ଅବତରଣ କରିବାର କିଛି ସମୟ ପୂର୍ବରୁ ଧ୍ୱଂସ ହୋଇଯାଇଥିଲା । ଏଥିରେ ସେ ମୃତୁ୍ୟବରଣ କରିଥିଲେ ।
