ସରପଞ୍ଚଙ୍କ ସ୍ୱାମୀ ଓ ସାମ୍ବାଦିକଙ୍କୁ ମାରିଦେଲେ
ସରପଞ୍ଚଙ୍କ ସ୍ୱାମୀ ଓ ସାମ୍ବାଦିକଙ୍କୁ ମାରିଦେଲେ
admin
1957
ବାଙ୍କୀ : ବାଙ୍କୀ ବୈଦେଶ୍ୱର ଥାନା ଅଞ୍ଚଳରେ ହୋଇଥିବା ଡବଲ ମର୍ଡର ରାଜ୍ୟବ୍ୟାପୀ ଆଲୋଡ଼ନ ସୃଷ୍ଟି କରିଛି । ଦିବାଲୋକରେ ବିଚ ରାସ୍ତାରେ ଦୁଇ ଜଣ ବ୍ୟକ୍ତିଙ୍କୁ ଦୁର୍ବୃତ୍ତମାନେ ଗୋଡେ଼ଇ ଗୋଡେ଼ଇ ହତ୍ୟା କରିଛନ୍ତି । ମୃତ ବ୍ୟକ୍ତିଙ୍କ ମଧ୍ୟରେ ଜଣେ ଯୁବ ସାମ୍ବାଦିକ ଥିବା ବେଳେ ଅନ୍ୟ ଜଣେ ହେଉଛନ୍ତି ସରପଞ୍ଚଙ୍କ ସ୍ୱାମୀ । ତେବେ ରକ୍ତମୁଖା ହତ୍ୟାକାରୀଙ୍କ କବଳରୁ ଜଣେ ନାବାଳକ ସୌଭାଗ୍ୟକ୍ରମେ ବର୍ତ୍ତି ଯାଇଛନ୍ତି । ଘଟଣାକୁ ନେଇ ବାଙ୍କୀ ଅଞ୍ଚଳରେ ତୀବ୍ର ଉତ୍ତେଜନା ସୃଷ୍ଟି ହୋଇଛି । ଘଟଣାସ୍ଥଳରେ କଟକ ଜିଲ୍ଲା ଏସପି ରାଧାବିନୋଦ ପାଣିଗ୍ରାହୀ ଓ ଅନ୍ୟ ବରିଷ୍ଠ ଅଧିକାରୀ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ସରପଞ୍ଚଙ୍କ ମୃତ ସ୍ୱାମୀ କଂଗ୍ରେସର ଜଣେ ଟାଣୁଆ କର୍ମୀ ହୋଇଥିବା ବେଳେ ଏହାକୁ ନେଇ ରାଜନୈତିକ ଛକାପଞ୍ଝା ବି ଆରମ୍ଭ ହୋଇଯାଇଛି ।
ଶନିବାର ଦିନ ପ୍ରାୟ ୩ଟା ସମୟରେ ବାଙ୍କୀ ବ୍ଲକ ନୂଆଗାଁ ପଞ୍ଚାୟତର ସରପଞ୍ଚ ମମତା ମହାପାତ୍ରଙ୍କ ସ୍ୱାମୀ ଭଗବାନ ସ୍ୱାଇଁ (୫୦), ଏକ ୱେବ୍ ଚ୍ୟାନେଲର ସାମ୍ବାଦିକ ଆଦିତ୍ୟ କୁମାର ରଣସିଂହ (୩୫) ଓ ଅନ୍ୟ ଜଣେ ୧୬/୧୭ ବର୍ଷର ନାବାଳକ ଏକ ବାଇକରେ ବସି ବାଙ୍କୀ-କଳାପଥର ରାସ୍ତାରେ ଯାଉଥିଲେ । ଜୋକଲାଞ୍ଜି ଡ୍ୟାମ ନିକଟ ନିଛାଟିଆ ରାସ୍ତାରେ ପୂର୍ବରୁ ଯୋଜନାବଦ୍ଧ ଭାବେ ଦୁର୍ବୃତ୍ତ ରାସ୍ତା ମଝିରେ ସରୁ ଜିଆଇ ତାର ଭିଡ଼ି ଦେଇଥିଲେ । ବାଇକ୍ ଚଳାଉଥିବା ଭଗବାନ ସ୍ୱାଇଁ ଏହା ଜାଣି ପାରି ନଥିବା ବେଳେ ତାରରେ ବାଇକ ଲାଗିଯିବାରୁ ସେମାନେ ତଳେ ପଡ଼ି ଯାଇଥିଲେ । ସେହି ସମୟରେ ରାସ୍ତାରେ ଛକି ରହିଥିବା ୫/୬ ଜଣ ଦୁର୍ବୃତ୍ତ ଭଗବାନ ଓ ଆଦିତ୍ୟଙ୍କ ଉପରେ ଅତର୍କିତ ଆକ୍ରମଣ କରିଥିଲେ । ଜୀବନ ବଞ୍ଚାଇବାକୁ ଉଭୟ ରାସ୍ତାରେ ଦୌଡୁ ଥିବା ବେଳେ ଦୁର୍ବୃତ୍ତମାନେ ସେମାନଙ୍କୁ ଗୋଡେ଼ଇ ଗୋଡେ଼ଇ ହାଣିଥିଲେ ।
