ଶ୍ୱଶୁର କାଟିଲା ଜ୍ୱାଇଁର ବେକ
ଶ୍ୱଶୁର କାଟିଲା ଜ୍ୱାଇଁର ବେକ
admin
2201
ଦାମନଯୋଡ଼ି: କୋରାପୁଟ ଜିଲ୍ଲା ଦାମନଯୋଡ଼ି ଥାନା ଅନ୍ତର୍ଗତ ନାଲକୋ ବିସ୍ଥାପିତ ଅଁଳାବାଡ଼ି କଲୋନୀରେ ଘଟିଛି ଏକ ଅମାନବୀୟ ଘଟଣା । ଏକ ଧାରୁଆ ଛୁରୀରେ ଜ୍ୱାଇଁଙ୍କ ବେକ କାଟି ଦେଇଛି ଶ୍ୱଶୁର । ଗୁରୁତର ଅବସ୍ଥାରେ ଜ୍ୱାଇଁ ବିନୋଦ ମାଝିଙ୍କୁ ନାଲକୋ ହସ୍ପିଟାଲରେ ଭର୍ତ୍ତି କରାଯାଇଛି । ତାଙ୍କ ବେକର ଡାହାଣ ପାଖର ଏକ ଶିର କଟିଯାଇଥିବା ବେଳେ ୮ଟି ଷ୍ଟିଚ ପଡ଼ିଛି । ଅଭିଯୁକ୍ତ ଶ୍ୱଶୁର ପୂର୍ଣ୍ଣ ବଡ଼ନାୟକଙ୍କୁ ପୁଲିସ ଗିରଫ କରି କୋର୍ଟଚାଲାଣ କରିଛି ।
ସୂଚନା ଅନୁଯାୟୀ ବିନୋଦ ୨୦୧୮ରେ ପୂର୍ଣ୍ଣଙ୍କ ବଡ଼ଝିଅ ରୂପାଲିଙ୍କୁ ପ୍ରେମ ବିବାହ କରିଥିଲେ । ଏହାକୁ କେନ୍ଦ୍ର କରି ପୂର୍ଣ୍ଣ ସେହି ସମୟର ବିନୋଦଙ୍କୁ କୁଆଡେ଼ ମାଡ଼ ମାରି ଗୋଡ଼ ହାତ ଭାଙ୍ଗି ଦେଇଥିଲା । ଏକ କାର ଡିକିରେ ପୂରାଇ ଅପହରଣ କରିଥିଲା । ଜୀବନରେ ମାରିଦେବାକୁ ଧମକ ଦେଇଥିଲା ବୋଲି ବିନୋଦଙ୍କ ମା ସୁବତୀ ମାଝୀ କହିଛନ୍ତି । ପରେ ଗାଁ ଲୋକଙ୍କ ମଧ୍ୟସ୍ଥତାରେ ଆପୋଷ ବୁଝାମଣା କରାଯାଇଥିଲା । ପରେ କୋର୍ଟରେ ପୂର୍ଣ୍ଣ ଓ ରୂପାଲିଙ୍କ ବାହାଘର ହୋଇଥିଲା । ଉଭୟ ପରିବାର ଆଗକୁ କୌଣସି ଗଣ୍ଡଗୋଳ କିମ୍ବା ମାରଧର କରିବେ ନାହିଁ ବୋଲି ଚୁକ୍ତିନାମା ହୋଇଥିଲା । ମଙ୍ଗଳବାର ଦାମଯୋଡ଼ି କଲୋନିରେ ଏକ ବିବାହ ଉତ୍ସବ ଚାଲିଥିଲା । ପ୍ରୋସେସନ ଏବଂ ନାଚଗୀତ ଚାଲିଥିବା ବେଳେ ବିନୋଦ ଏହାକୁ ଦେଖୁଥିଲେ । ରାତି ପାଖାପାଖି ସାଢେ଼ ୮ଟା ବେଳେ ପୂର୍ବର ରାଗ ରଖିଥିବା ପୂର୍ଣ୍ଣ ଏକ ଧାରୁଆ ଛୁରୀରେ ବିନୋଦଙ୍କ ବେକରେ ଆକ୍ରମଣ କରିଥିଲେ । ଫଳରେ ବେକର ଏକ ଶିର କଟିଯାଇଥିଲା । ସଙ୍ଗେ ସଙ୍ଗେ ବିନୋଦଙ୍କ ଆତ୍ମୀୟମାନେ ପହଞ୍ଚି ଡାକ୍ତରଖାନା ନେଇଥିଲେ । ପରେ ପୁଲିସ ପହଞ୍ଚି ଅଭିଯୁକ୍ତକୁ ଗିରଫ କରିଥିଲା । ସୂଚନା ଥାଉ କି ଗିରଫ ଅଭିଯୁକ୍ତ ନାଲକୋର ଜଣେ କର୍ମଚାରୀ ।
