ନୀଳଗିରି ଅଙ୍ଗନବାଡିରେ ସ୍ୱିଟର ଦୁର୍ନୀତି ଅଭିଯୋଗ : ଟୁକୁନି ସାହୁଙ୍କୁ ସାଂସଦଙ୍କ ଚିଠି
ନୀଳଗିରି ଅଙ୍ଗନବାଡିରେ ସ୍ୱିଟର ଦୁର୍ନୀତି ଅଭିଯୋଗ : ଟୁକୁନି ସାହୁଙ୍କୁ ସାଂସଦଙ୍କ ଚିଠି
admin
5396
ଭୁବନେଶ୍ୱର : ନୀଳଗିରିରେ ରହିଥିବା ବିଭିନ୍ନ ଅଙ୍ଗନାବାଡି କେନ୍ଦ୍ରରେ ସ୍ୱିଟର ଦୁର୍ନୀତି ଅଭିଯୋଗରେ ରାଜ୍ୟ ମହିଳା ଓ ଶିଶୁ ବିକାଶ ମନ୍ତ୍ରୀ ଟୁକୁନି ସାହୁଙ୍କୁ ଚିଠି ଲେଖିଛନ୍ତି ବାଲେଶ୍ୱର ସାଂସଦ ପ୍ରତାପ ଷଡଙ୍ଗୀ । ସମସ୍ତ ଅଙ୍ଗନବାଡିରେ ସ୍ୱିଟର ପ୍ରଦାନ ପାଇଁ ସରକାରଙ୍କ ପକ୍ଷରୁ ନିଷ୍ପତ୍ତି ନିଆଯାଇଥିଲା । ବିଭିନ୍ନ ମହିଳା ସ୍ୱୟଂ ସହାୟିକା ଗୋଷ୍ଠୀ ପକ୍ଷରୁ ଏହି ସ୍ୱିଟର ନିର୍ମାଣ କରାଯାଇଥିବା ବେଳେ ସିଡିପିଓଙ୍କ ଏକଚାଟିଆ ନିଷ୍ପତ୍ତି କାରଣରୁ ଅକଳରେ ପଡିଛନ୍ତି ଏକାଧିକ ମହିଳା ସ୍ୱୟଂ ସହାୟକ ଗୋଷ୍ଠୀ ।
ନୀଳଗିରି ବ୍ଲକ ଏବଂ ଏନଏସି ଅଧୀନରେ ରହିଥିବା ଏକାଦିକ ଏସଏଚଜିଙ୍କ ନିକଟରୁ ଅଭିଯୋଗ ଆସିବା ପରେ ସାଂସଦ ଏହି ଚିଠି ଲେଖିଛନ୍ତି । ଅଙ୍ଗନବାଡି ଶିଶୁ ମାନଙ୍କ ପାଇଁ ଉଲର ସ୍ୱିଟର ବୁଣିବା ନିମନ୍ତେ ବିଭିନ୍ନ ମହିଳା ସ୍ୱୟଂ ସହାୟିକା ଗୋଷ୍ଠୀଙ୍କୁ ସିଡିପିଓଙ୍କ ପକ୍ଷରୁ ନିଦେ୍ର୍ଧଶ ଦିଆଯାଇଥିଲା । ସ୍ୱିଟର ସିଲାଇ ନିମନ୍ତେ ଏସଏଚଜି ମାନେ ବିପୁଳ ପରିମାଣର ଋଣ ନେଇଥିଲେ । ବର୍ତ୍ତମାନ ସ୍ୱିଟର ନିର୍ମାଣ ସରିଥିଲେ ମଧ୍ୟ ଅଙ୍ଗନବାଡି କେନ୍ଦ୍ର ଗୁଡିକ ଶୀତବସ୍ତ୍ର ଗ୍ରହଣ କରୁନାହାନ୍ତି । ଶୀତବସ୍ତ୍ରଗୁଡିକୁ ଗ୍ରହଣ ନକରିବାକୁ ସିଡିପିଓଙ୍କ ପକ୍ଷରୁ ଅଙ୍ଗନବାଡି କେନ୍ଦ୍ର ମାନଙ୍କୁ ନିଦେ୍ର୍ଧଶ ଦିଆଯାଇଥିଲା ।
ଏ ସମ୍ପର୍କରେ ଏସଏଚଜି ମାନେ ସିଡିପିଓଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ ଫଳ ଶୂନ ରହିଛି । ସିଡିପିଓଙ୍କ ମନମାନୀ ଫଳରେ ମହିଳା ସ୍ୱୟଂ ସହାୟିକା ଗୋଷ୍ଠୀ ଗୁଡିକ ସଙ୍କଟରେ ଥିବାରୁ ଏହି ମାମଲା ଉପରେ ଧ୍ୟାନ ଦେବା ପାଇଁ ମହିଳା ଏବଂ ଶିଶୁ ବିକାଶ ମନ୍ତ୍ରୀ ଟୁକୁନି ସାହୁଙ୍କୁ ପତ୍ର ଲେଖିଛନ୍ତି ବାଲେଶ୍ୱର ସାଂସଦ ପ୍ରତାପ ଚନ୍ଦ୍ର ଷଡଙ୍ଗୀ । ଏହା ସହିତ ଏହି ଚିଠିର ଆଉ ଦୁଇ କିତା ନକଲ ମହିଳା ଏବଂ ଶିଶୁ ବିକାଶ ବିଭାଗର ପ୍ରମୁଖ ଅନୁ ଗର୍ଗ ଏବଂ ବାଲେଶ୍ୱର ଜିଲ୍ଲାପାଳ କେ ସୁଦର୍ଶନ ଚକ୍ରବର୍ତ୍ତୀଙ୍କ ନିକଟକୁ ପଠାଯାଇଛି ।
