ନିରଞ୍ଜନଙ୍କୁ ତାରାଙ୍କ ପରାମର୍ଶ : ଘରେ ନବସି ବାହାରେ ବୁଲ
ନିରଞ୍ଜନଙ୍କୁ ତାରାଙ୍କ ପରାମର୍ଶ : ଘରେ ନବସି ବାହାରେ ବୁଲ
admin
3634
ଭୁବନେଶ୍ୱର :କଂଗ୍ରେସର କମିଟି ନଥିବାରୁ କଂଗ୍ରେସ ସଫା ହୋଇଗଲାଣି । ଜଲଦି କମିଟି କରାଗଲେ ଭଲ । ନିରଞ୍ଜନଙ୍କ ଦାୟିତ୍ୱ ହେଉଛି ଦଳକୁ ସଂଗଠିତ କରିବା । ଘରେ ବସିଲେ ଚଳିବ ନାହିଁ । ସେ ବାହାରେ ବୁଲିବା ଦରକାର । ବରିଷ୍ଠ କଂଗ୍ରେସ ନେତା ତାରା ବାହିନୀପତି ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କୁ ଏଭଳି ପରାମର୍ଶ ଦେଇଛନ୍ତି ।
ତାରା କହିଛନ୍ତିଯେ, ଆମେ ଚାହିଁଲେ ପରିବର୍ତନ ହେବନାହିଁ । ସୋନିଆ ଓ ରାହୁଲ ଚାହିଁଲେ ପରିବର୍ତନ ହେବ । ମୁଁ ପରିବର୍ତନ ଲବିରେ ନାହିଁ, କିନ୍ତୁ ମିଳିଲେ ଛାଡ଼ିବାର ନାହିଁ ବୋଲି ତାରା କହିଛନ୍ତି ।
ଅପରପକ୍ଷରେ ଜାନକୀ ପଟ୍ଟନାୟକଙ୍କ ପର ଠାରୁ ଓଡ଼ିଶା କଂଗ୍ରେସରେ ଶୂନ୍ୟସ୍ଥାନ ସୃଷ୍ଟି ହୋଇଛି । ପସିସି ପରିବର୍ତ୍ତନ ପ୍ରସଙ୍ଗରେ ଏହା କହିଛନ୍ତି ବରିଷ୍ଠ କଂଗ୍ରେସ ନେତା ଶରତ ରାଉତ ।
ସେ କହିଛନ୍ତି ଯେ, ଲୋକେ ଯେବେ ପରିବର୍ତ୍ତନ ଚିନ୍ତା କରିବେ, ହାଇକମାଣ୍ଡ ସେତେବେଳେ ଚିନ୍ତା କରିବେ । ଜାନକୀ ପଟ୍ଟନାୟକଙ୍କ ପର ଠାରୁ ଓଡ଼ିଶା କଂଗ୍ରେସରେ ଶୂନ୍ୟସ୍ଥାନ ସୃଷ୍ଟି ହୋଇଛି । ଜାନକୀଙ୍କ ଶୂନ୍ୟସ୍ଥାନ ପୂରଣ ପାଇଁ କେହି ନେତା ଆଗଭର ହେଉନାହାନ୍ତି । ଓଡ଼ିଶାରେ କଂଗ୍ରେସକୁ ଶକ୍ତିଶାଳୀ କରିବାକୁ ଏଆଇସିସି ଅଧ୍ୟକ୍ଷ ନିଷ୍ପତ୍ତି ନେବେ ବୋଲି କହିବା ସହ ଆସନ୍ତା ଉପନିର୍ବାଚନ ପାଇଁ କଂଗ୍ରେସ ଆପାତତଃ ପ୍ରାର୍ଥୀ ସ୍ଥିର କରିସାରିଥିବା ଶରତ ରାଉତ କହିଛନ୍ତି ।
ଏହା ପୂର୍ବରୁ ପୂର୍ବତନ ପିସିସି ସଭାପତି ଜୟଦେବ ଜେନା କହିଥିଲେ ଯେ, କରୋନା ପାଇଁ କୌଣସି ରାଜନୈତିକ ଦଳ ସକ୍ରିୟ କାମ କରିପାରୁନାହାନ୍ତି । ଏବେ କରୋନା ମୁକାବିଲା ସମସ୍ତଙ୍କ ପ୍ରାଥମିକତା । ଆସନ୍ତାକାଲି ଅନୁଷ୍ଠିତ ହେବାକୁ ଥିବା ସିଡବ୍ଲୁ୍ୟସି ବୈଠକରେ ଦଳକୁ ମଜବୁତ କରିବା ସମ୍ପର୍କରେ ଆଲୋଚନା ହେବ । ଏବେ ଦଳକୁ ସକ୍ରିୟ କରିବାକୁ ତୃଣମୂଳସ୍ତରରୁ ପରିବର୍ତ୍ତନ ଦାବି ହେଉଛି । ଓଡ଼ିଶାରେ କ’ଣ ହେବ ଆସନ୍ତାକାଲି ବୈଠକରେ ଜଣାପଡ଼ିବ । ସମନ୍ୱୟ ଅଭାବରୁ ରାଜ୍ୟରେ ଆଜି କଂଗ୍ରେସର ସ୍ଥିତି ଏପରି ରହିଥିବା ଶ୍ରୀ ଜେନା କହିଥିଲେ ।
