ଦାରା ସିଂ ସହଯୋଗୀ ଗିରଫ
ଦାରା ସିଂ ସହଯୋଗୀ ଗିରଫ
admin
2808
ଠାକୁରମୁଣ୍ଡା : ବହୁ ଚର୍ଚ୍ଚିତ ଅଷ୍ଟ୍ରେଲୀୟ ମିସନାରୀ ଗ୍ରାହାମ ଷ୍ଟେନସ୍ ଓ ତାଙ୍କ ଦୁଇ ଶିଶୁପୁତ୍ରର ହତ୍ୟା ମାମଲାରେ ଜଡ଼ିତ ଥିବା ଦାରା ସିଂର ଜଣେ ଘନିଷ୍ଠ ସହଯୋଗୀକୁ ଦୀର୍ଘ ୨୦ ବର୍ଷ ପରେ ସିବିଆଇ ଗିରଫ କରିଛି । ଅଭିଯୁକ୍ତ ହେଉଛି ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ଥାନା ଅଧୀନ ଭରଣ୍ଡିଆ ପଞ୍ଚାୟତ ନିଶ୍ଚିତପୁର ଗ୍ରାମର ବୁଦ୍ଧଦେବ ନାଏକ(୪୫) । ଏହି ଗିରଫଦାରୀ ପରେ ଏହି ଘଟଣା ପୁଣିଥରେ ଚର୍ଚ୍ଚା ପରିସରକୁ ଆସିଛି ।
ନିଶ୍ଚିତପୁର ଗ୍ରାମରେ ଥିବା ନିଜ ଘରେ ବୁଦ୍ଧଦେବ ରହିଥିବା ଖବର ପାଇ ଗତକାଲି ବିଳମ୍ବିତ ରାତିରେ କୋଲକାତାରୁ ଆସିଥିବା ସିବିଆଇ ଟିମ୍ ଚଢ଼ାଉ କରି ବୁଦ୍ଧଦେବକୁ ଗିରଫ କରିଥିଲା । ଆଜି ସକାଳେ ତାକୁ ଠାକୁରମୁଣ୍ଡା ମେଡିକାଲକୁ ସ୍ୱାସ୍ଥ୍ୟ ପରୀକ୍ଷା ପାଇଁ ସିବିଆଇ ଅଧିକାରୀମାନେ ଆଣିବା ପରେ ଘଟଣାଟି ଲୋକଲୋଚନକୁ ଆସିଥିଲା । ପରେ ତାକୁ ସିବିଆଇ ଭୁବନେଶ୍ୱର ନେଇ ଯାଇଥିବା ବିଶେଷ ସୂତ୍ରରୁ ଜଣାପଡ଼ିଛି ।
ସୂଚନାଯୋଗ୍ୟ, ୧୯୯୯ ମସିହାରେ କେନ୍ଦୁଝର ଜିଲ୍ଲା ମନୋହରପୁର ଗ୍ରାମରେ ଗ୍ରାହାମ ଷ୍ଟେନସ ଓ ତାଙ୍କ ଦୁଇ ଶିଶୁପୁତ୍ରଙ୍କୁ ଜୀବନ୍ତ ଅବସ୍ଥାରେ ପୋଡ଼ି ହତ୍ୟା କରାଯାଇଥିଲା । ଏହି ମାମଲାରେ ମୁଖ୍ୟ ଅଭିଯୁକ୍ତ ଦାରା ସିଂ ଦୋଷୀ ସାବ୍ୟସ୍ତ ହୋଇ ଜେଲରେ ସଜା କାଟୁଥିବା ବେଳେ ଏହି ଘଟଣାକୁ ପ୍ରାୟ ଅନେକେ ଭୁଲି ଯାଇଥିଲେ । ଏହି ଜଘନ୍ୟ ହତ୍ୟା ମାମଲାରେ ବୁଦ୍ଧଦେବ ଦାରା ସିଂର ଘନିଷ୍ଠ ସହଯୋଗୀ ଥିଲା । ମାତ୍ର ସିବିଆଇ ନଜରରେ ସେ ଫେରାର୍ ଥିଲା । ଆଉ ଗିରଫ ଭୟ ନ ଥିବା ଭାବି ବୁଦ୍ଧଦେବ ତା'ର ନିଜ ଘରେ ରହି ଆସୁଥିଲା । ଆଜି ବୁଦ୍ଧଦେବର ଗିରଫଦାରୀ ପରେ ଅନ୍ୟ ଅଭିଯୁକ୍ତଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି ।
