କୋଭିଡ ନିୟମ ଉଲ୍ଲଂଘନକାରୀ ସାବଧାନ ବୁଧବାରଠାରୁ କଠୋର ଦଣ୍ଡବିଧାନ: ଏସଆରସି
କୋଭିଡ ନିୟମ ଉଲ୍ଲଂଘନକାରୀ ସାବଧାନ ବୁଧବାରଠାରୁ କଠୋର ଦଣ୍ଡବିଧାନ: ଏସଆରସି
admin
6599
ଭୁବନେଶ୍ୱର: ଯେତେ କହିଲେ ବି ମାନୁନାହାନ୍ତି । କିଛି ନିୟମ ଉଲ୍ଲଂଘନକାରୀଙ୍କ ଯୋଗୁଁ ହାର ବୃଦ୍ଧି ପାଉଛି । ଆସନ୍ତା ବୁଧବାରଠାରୁ ଏପରି ନିୟମ ଉଲ୍ଲଂଘନକାରୀଙ୍କୁ ସ୍ଥାନୀୟ ପ୍ରଶାସନ ଓ ପୁଲିସ କଠୋର ଦଣ୍ଡବିଧାନ କରିବ । କୋଭିଡ ସଂକ୍ରମଣ ନେଇ ସୂଚନା ଦେବା ବେଳେ ଏପରି ସତର୍କ କରାଇ ଦେଇଛନ୍ତି ସ୍ୱତନ୍ତ୍ର ରିଲିଫ କମିସନର ପ୍ରଦୀପ କୁମାର ଜେନା । ଶ୍ରୀ ଜେନା କହିଛନ୍ତି, ସେପ୍ଟେମ୍ବର ମାସରୁ ରାଜ୍ୟରେ ଲକଡାଉନ ଓ ସଟଡାଉନ କଟକଣା କୋହଳ ହେବା ପରେ ବିଶେଷ କରି କଟକ ଓ ଭୁବନେଶ୍ୱରରେ କୋଭିଡ ସଂକ୍ରମଣ ବୃଦ୍ଧି ପାଇଛି । ଏହି ପରିପ୍ରେକ୍ଷୀରେ ସଂକ୍ରମଣ ପ୍ରତିରୋଧ ପାଇଁ ଜନସାଧାରଣ ସବୁ ପ୍ରକାର ସତର୍କତା ମୂଳକ ପଦକ୍ଷେପ ନେବା ଜରୁରୀ । ଓଡ଼ିଶାରେ ଏ ପର୍ଯ୍ୟନ୍ତ ପ୍ରାୟ ୧ ଲକ୍ଷ ୨୪ ହଜାର ଲୋକ କୋଭିଡ ଦ୍ୱାରା ସଂକ୍ରମିତ ହୋଇଛନ୍ତି । ଦୈନିକ ରାଜ୍ୟରେ ୬୦ ହଜାରରୁ ୬୫ ହଜାର ପରୀକ୍ଷଣ କରାଯାଉଛି । ରାଜ୍ୟରେ ୫୦ଟି କୋଭିଡ ହସ୍ପିଟାଲ କରାଯାଇଛି । ଯେଉଁଥିରେ କୋଭିଡ ରୋଗୀଙ୍କୁ ଚିକିତ୍ସା କରିବା ପାଇଁ ୭୩୨ ଟି ଶଯ୍ୟା ବ୍ୟବସ୍ଥା କରାଯାଇଛି । ପର୍ଯ୍ୟାପ୍ତ ସଂଖ୍ୟକ କୋଭିଡ କେୟାର ସେଣ୍ଟର କୋଭିଡ କେୟାର ହୋମ, କ୍ଲଷ୍ଟର ଓ ଟିଏମସି କରାଯାଇଛି । କିନ୍ତୁ ସଂକ୍ରମଣ ରୋକିବା ପାଇଁ ଲୋକମାନଙ୍କର ବ୍ୟାବହାରିକ ଓ ଜୀବନଯାପନ ଶୈଳୀରେ ଆବଶ୍ୟକ ପରିବର୍ତ୍ତନ ଆସିବା ଆବଶ୍ୟକ । ଲକଡାଉନ ଓ ସଟଡାଉନ ଦ୍ୱାରା ରାଜ୍ୟ ଓ ଦେଶର ଅର୍ଥନୀତି ପ୍ରଭାବିତ ହେଉଛି । ତେଣୁ ଜୀବନ ଓ ଜୀବିକାରେ ସନ୍ତୁଳନ ପାଇଁ ଜନସାଧାରଣଙ୍କୁ ଆହୁରି ଦାୟିତ୍ୱବାଦ ହେବାକୁ ପଡ଼ିବ । ପରିବାର ମୁରବୀ, ସମାଜର ସଚେତନ ନାଗରିକ, ଗୋଷ୍ଠୀ ସ୍ତରରେ ନେତୃବୃନ୍ଦ ସାହି ମୁରବୀ ଓ ନାଗରିକ କଲ୍ୟାଣ କର୍ମକର୍ତ୍ତା ନିଜ ନିଜ ସ୍ତରରେ କୋଭିଡ ସଚେତନତା ସୃଷ୍ଟି କରିବା ନିମନ୍ତେ ଶ୍ରୀ ଜେନା ଆହ୍ୱାନ କରିଛନ୍ତି ।
