କଂଗ୍ରେସରେ ମିଶିଲେ ରାଜସ୍ଥାନର ୬ ବସପା ବିଧାୟକ
କଂଗ୍ରେସରେ ମିଶିଲେ ରାଜସ୍ଥାନର ୬ ବସପା ବିଧାୟକ
admin
2248
ଜୟପୁର : ଏକ ରାଜନୈତିକ ଘଟଣାକ୍ରମରେ ଆଜି ରାତିରେ ରାଜସ୍ଥାନର ୬ ଜଣ ବହୁଜନ ସମାଜ ପାର୍ଟି (ବସପା) ବିଧାୟକ କଂଗ୍ରେସରେ ସାମିଲ ହୋଇଛନ୍ତି । ଏଥିସହିତ କଂଗ୍ରେସରେ ବସପା ବିଧାୟକ ଦଳର ମିଶ୍ରଣ ହେଲା ବୋଲି ଦର୍ଶାଇ ସେମାନେ ବିଧାନସଭା ବାଚସ୍ପତି ସି.ପି ଯୋଶୀଙ୍କୁ ଚିଠି ଲେଖିଛନ୍ତି । ବାଚସ୍ପତି ମଧ୍ୟ ବସପା ବିଧାୟକଙ୍କ ଚିଠି ପାଇଥିବା ସ୍ପଷ୍ଟ କରିଛନ୍ତି । ବସପାର ଏହି ୬ ବିଧାୟକ ହେଲେ ରାଜେନ୍ଦ୍ର ସିଂହ ଗୁଧା, ଯୋଗେନ୍ଦ୍ର ସିଂହ ଆହ୍ୱାନ, ୱାଜିବ ଅଲି, ଲଖନ ସିଂହ ମୀନା, ସନ୍ଦୀପ ଯାଦବ ଓ ଦୀପଚାନ୍ଦ । ବସପା ବିଧାୟକଙ୍କ ମିଶ୍ରଣ ଫଳରେ ରାଜସ୍ଥାନରେ କଂଗ୍ରେସ ଏକ ପୂର୍ଣ୍ଣ ବହୁମତ ହାସଲ କରିଛି । ରାଜସ୍ଥାନର ପଞ୍ଚାୟତ ନିର୍ବାଚନ ପୂର୍ବରୁ ବସପା ବିଧାୟକମାନେ କଂଗ୍ରେସରେ ସାମିଲ ହୋଇ ଦଳର ମୁଖ୍ୟ ମାୟାବତୀଙ୍କୁ ଆଜି ଶକ୍ତ ଝଟକା ଦେଇଛନ୍ତି । ରାଜସ୍ଥାନରେ ଗତବର୍ଷ ଡିସେମ୍ବର ମାସରେ ଅନୁଷ୍ଠିତ ବିଧାନସଭା ନିର୍ବାଚନରେ ରାଜ୍ୟର ମୋଟ ୨୦୦ ଆସନରୁ କଂଗ୍ରେସ ୧୦୦ଟି ଆସନ ପାଇଥିଲା ବେଳେ ବିଜେପିକୁ ୭୩ଟି ଆସନ ମିଳିଥିଲା । ସେହିଭଳି ବସପା ୬ଟି ଆସନ ପାଇଥିଲା ବେଳେ ସ୍ୱାଧୀନ ପ୍ରାର୍ଥୀ ୧୩ଟି ଆସନରେ ଓ ଅନ୍ୟାନ୍ୟ ଛୋଟ ଦଳର ପ୍ରାର୍ଥୀମାନେ ୮ଟି ଆସନ ହାସଲ କରିଥିଲେ । କୌଣସି ଦଳକୁ ସ୍ପଷ୍ଟ ବହୁମତ ମିଳିନଥିଲା ବେଳେ ବସପା ଓ ସ୍ୱାଧୀନ ପ୍ରାର୍ଥୀଙ୍କ ସମର୍ଥନରେ କଂଗ୍ରେସ ସରକାର ଗଢ଼ିଥିଲା ।
